!Memoriol—Wan Miting We i Impoten Tumas!
1 Long Sande, Maj 23, afta we san i godaon, bambae yumi mekem Memoriol blong ded blong Kraes. (Luk 22:19) !Hemia wan miting we i impoten tumas! Taem Jisas i holemstrong long Jeova gogo hem i ded, hem i pruvum se i gat rod blong fasgud long God long fasin we i stretgud olgeta, nating se yumi kasem bigfala traem. Long rod ya, yumi save pruvum se hae rul blong Jeova i nambawan. (Hib. 5:8) Mo tu, taem Kraes i ded, hem i givim bodi we i stretgud olgeta olsem sakrifaes we ol man oli nidim blong pemaot olgeta, mo hem i mekem rod blong olgeta we oli bilif oli save kasem laef we i no save finis. (Jon 3:16) Taem yumi kam long Memoriol, yumi soemaot se yumi gat bigfala tangkyu long hat blong yumi from lav we Jeova i gat, mo from sakrifaes we Jisas i mekem blong yumi.
2 I gud we yumi evriwan i folem program blong Baebol riding blong Maj 18-23, long 1997 Calendar of Jehovah’s Witnesses. Mo tu, i gud we ol wanwan famle oli tokbaot japta 112-116 blong buk ya, Man We i Hae Moa Long Olgeta Man. Samting ya bambae i givhan long yumi blong tingting i go nomo long wan wik we i impoten moa bitim ol narafala wik long histri blong man.
3 ?Yu yu save mekem moa long wok blong prij raonabaot long taem blong Memoriol? Plante pablisa bambae oli yusum fulwan ol faef wiken long Maj, blong mekem wok blong haftaem paenia. I gud we yu tu yu joen wetem olgeta ya. Yumi evriwan i save joen fulwan long wok blong makemgud long ol narafala se i impoten tumas blong kam long Memoriol. From we Memoriol i stap long Sande, bambae plante moa man oli save kam. Yu mas sua blong singaot olgeta evriwan we yu stadi Baebol wetem olgeta mo ol narafala we oli intres, blong oli joen wetem yumi. Toktok wetem olgeta long ol save long pej 127, haf 18, long Save buk. Hemia long saed blong wan dei blong yia nomo we yumi mas mekem spesel lafet.
4 Kam long miting ya we i moa impoten bitim ol narawan long 1997, wetem bigfala tangkyu from olgeta samting we ded blong Jisas i mekem long yumi. Stap long miting long naet blong Maj 23, taem ol trufala Kristin long evri ples oli mekem Memoriol wetem ful bilif.