Jeova i Givim Paoa We i Bigfala Tumas i Bitim Paoa Blong Man
1 Olgeta disaepol blong Jisas oli gat nambawan blesing ya blong mekem wan tabu wok—hemia Kristin wok blong prij. (Mat. 24:14; 28:19, 20) Be, sin mo ol wari blong laef oli save mekem se sam samtaem yumi harem se yumi no naf.
2 Taem samting ya i kamaot, yumi save haremgud long tok we aposol Pol i raetem i go long ol tabu Kristin long Korin. Hem i se: “Mifala ya, we mifala i stap holem ol gudgudfala samting ya we God i givim, mifala i olsem ol graonpot nomo.” (2 Kor. 4:7) Pol i gat strong tingting, i se: “Hem i putumap mifala long wok ya, . . . from samting ya, tingting blong mifala i no save foldaon.” (2 Kor. 4:1) Nating we yumi blong grup ya we tabu speret blong God i makemaot olgeta no grup ya blong ‘ol narafala sipsip,’ i tru se i no isi blong gohed oltaem blong talemaot gud nyus, we ‘tingting blong yumi i no foldaon.’ Yumi nidim paoa we God i save givim, ‘we i bigfala tumas, i bitim paoa blong man.’—Jon 10:16; 2 Kor. 4:7b.
3 Samting we i leftemap tingting blong yumi, hemia se plante Wetnes oli gohed strong long wok blong prij, nating se oli kasem bigfala fasin agens, strong sik, no hadtaem long saed blong mane. Yumi evriwan i mas luksave se Jeova i stap sapotem wok blong prij we yumi mekem. Bitim we tingting blong yumi i kam slak long saed blong wok blong prij no yumi fraet, yumi mas ‘joen long Masta blong yumi blong kasem paoa, mo kam strong long bigfala paoa blong hem.’—Efes. 6:10; Prov. 24:10.
4 ?Olsem Wanem Blong Kasem Paoa Blong God?: Prea oltaem, blong askem God blong givhan long yu mo givim paoa long yu. (Rom 12:12; Fil. 4:6, 7) Nao, wetem fulhat blong yu, trastem Jeova blong givim paoa ya we i bigfala tumas, i bitim paoa blong man. (Prov. 3:5) Ridim ol store blong laef blong ol man we oli stap long Wajtaoa mo Wekap!, from we oli pruvum se Jeova i stap givhan long ol man blong hem tede, blong oli stanap strong tru long ol hadtaem. Joen oltaem wetem ol brata mo sista long kongregesen, mo no kam slak blong go long ol miting.—Rom 1:11, 12; Hib. 10:24, 25.
5 Yumi mas mekem evri samting we yumi naf blong mekem, blong kasem paoa blong Jeova—wan paoa we i bigfala tumas i bitim paoa blong man. Hem i save givhan long yumi blong no kam slak long wok ya blong talemaot Kingdom, we i impoten moa i bitim ol narafala wok.