Soem Respek Long Haos Wosip Blong Jeova
1 Taem wan man i singaot yumi blong go long haos blong hem, yumi soem respek long olting blong hem, yumi lukaotgud blong no spolem wan samting, mo blong no spolem program blong famle ya tu. !Yumi mas soemaot moa respek taem Jeova i singaot yumi blong kam long haos blong hem! Yumi mas save stret fasin blong mekem long haos blong hem. (Sam 15:1; 1 Tim. 3:15) Nating sipos yumi mekem Kristin miting long Haos Kingdom, long haos blong wan man, no long wan haos we oli rentem, bighaf blong yumi i stap soem respek long haos wosip ya, olsem we hem i haos blong Jeova, we ‘nem blong hem i hae moa i bitim heven mo wol.’—Sam 148:13.
2 Be, samfala oli no soem respek taem oli stap long miting. Oli stap mekem noes, mo oli mekem olsem se ol save we i stap kamaot i no impoten. Sam bigman oli storeyan kolosap long doa, long vranda, long toelet, no afsaed long Haos Kingdom, taem miting i stap gohed. Taem wan pikinini we i bigwan lelebet i stap lukaot long wan smol pikinini, samtaem tufala i stat pleplei tugeta mo tufala i no lanem wan samting nating long miting. Sam yangfala oli go afsaed long Haos Kingdom afta long miting, mo oli pleplei, mekem bigfala noes tumas, mo samtaem oli mekem ol aksin olsem karate long olgeta. Sam long olgeta oli bin mekem ol man we oli stap kolosap long Haos Kingdom oli kros, no oli blokem ol trak long rod no long ples blong putum ol trak.
3 ?Olsem Wanem Blong Blokem Fasin Ya Blong No Gat Respek?: Sipos yumi luksave se wosip blong yumi i tabu, mo se i wan bigfala ona blong wosip long Jeova, bambae yumi no mekem ol samting we i blokem ol narafala blong lesin, olsem toktok smol long narafala, kakae, kakae jinggam, mekem noes wetem ol pepa, go plante taem long toelet, mo kam let oltaem long ol miting. Ol papa mama we oli gat respek mo fasin tangkyu, oli no letem ol pikinini blong olgeta oli putum doti long floa, ol jea, no ol wol blong Haos Kingdom no haos we oli mekem buk stadi long hem. Mo i sua se yumi evriwan i agri we i no mas gat enikaen fasin nogud, krangke tok, no doti tok plei, oli kamaot long ples blong mekem ol miting blong yumi.—Efes. 5:4.
4 Sipos oltaem yumi tingbaot risen blong ol Kristin miting blong yumi, bambae yumi lukaotgud se yumi mo ol pikinini blong yumi i soem respek long wosip blong Jeova, long ples we “yumi jusum finis blong stap long hem.”—Sam 84:10, NW.