Advaes
◼ Buk we yumi seremaot long Janewari: Eniwan long ol buk we kongregesen i gat finis, we oli kamaot bifo long 1985 mo we oli gat 192 pej. Ol kongregesen we oli no gat ol buk olsem, oli save seremaot Save Blong Lidim Yu Long Laef We i No Save Finis, blong 130 VT. Febuwari: Revelesen—Kolosap i Kasem Nambawan En Blong Hem! blong 350 VT. Maj: Save Blong Lidim Yu Long Laef We i No Save Finis blong 130 VT. Traehad blong statem ol nyufala Baebol stadi. Epril: Sabskripsen blong Wajtaoa (Bislama, Engglis, Franis) mo Wekap! (Engglis, Franis) blong 600 VT (wan yia) no 300 VT (sikis manis).
◼ Olgeta pablisa we oli baptaes finis mo we oli stap long Miting Blong Kingdom Wok long wik we i stat long Janewari 5, bambae oli kasem wan Kad Blong Hospital mo Aedentiti Kad blong ol pikinini blong olgeta.
◼ Stat long Febuwari, nyufala pablik tok blong ol seket elda hemia, “?Yu Yu Gat Semfala Tingting Olsem God, Long Saed Blong Laef?”
◼ Ol kongregesen oli mas mekem ol stret plan blong Memoriol long yia ya, hemia long Sarede, Epril 11, afta we san i godaon. Tok i save stat bifo long taem ya, be yumi no mas pasem bred mo waen gogo san i godaon finis. Jekem wanem taem san bambae i godaon long ples blong yufala. Memoriol i no mas stat let tumas, mekem se, ol man we oli intres oli faenem i hadwok tumas blong kam. Mo tu, yumi no mas hareap tumas, we i mekem se yumi no gat taem bifo mo afta long Memoriol blong talem halo long ol man we oli kam blong fastaem, mo blong mekem plan blong givhan moa long ol man we oli intres, mo blong haremgud long kampani blong ol brata sista blong yumi. Afta we ol elda oli tokbaot evri samting, oli save tekem disisen se wanem plan nao i moagud, blong mekem se Memoriol i givhan fulwan long olgeta we oli kam. Ol pablisa we oli wantem se i gat Memoriol long wan aelan blong Vanuatu, oli mas talemaot long ol elda kwiktaem, blong oli save mekem plan from.
◼ Spesel pablik tok kolosap long taem blong Memoriol long 1998, i stap long Sande, Maj 29. Bambae ol kongregesen oli kasem wan plan blong tok ya. Kongregesen we i gat visit blong seket elda long wik ya, i save mekem spesel tok long wik biaen. Kongregesen i no mas mekem spesel tok ya bifo long Maj 29, 1998.
◼ Ol elda oli mas save ol jenis we oli nidim blong mekem taem kongregesen i gat wan asembli: Taem i gat spesel dei asembli, kongregesen i save mekem ol narafala miting long wik ya, be i no Pablik Tok mo Stadi blong Wajtaoa. Taem i gat seket asembli, oli no mekem Tiokratik Skul mo Miting blong Kingdom Wok tu. Oli mekem Buk Stadi nomo long wik ya.