Yusumgud Pepa Blong Talemaot Ol Miting
1 I gat ol smosmol pepa long kongregesen blong talemaot adres blong Haos Kingdom mo stret taem blong ol miting. I gud we yu givim wan long evri man we yu prij long hem. From samting ya, kongregesen i mas meksua se i gat plante pepa oli stap. Sipos kongregesen i stap jenisim taem blong miting evri yia long Janewari, oli mas odarem ol nyufala pepa long Oktoba evri yia. Olsem nao, oltaem bambae i gat pepa i stap blong talemaot stret taem blong ol miting. Yufala i mas yusum fom ya Oda Blong Ol Pepa Blong Talemaot Ol Miting blong askem ol pepa ya. Taem yu kasem olgeta, ?olsem wanem bambae yu yusumgud?
2 Plante pablisa oli faenem se i gud blong givim wan pepa long ol man, blong soemaot se oli hu, mo blong statem wan storeyan. Sipos yu soemaot stret taem blong ol miting no smol mesej long narasaed blong pepa ya, maet yu statem wan gudfala storeyan long saed blong wok blong yumi mo risen blong wok ya. Ol smol pikinini oli save joen long wok blong prij wetem papa mama blong olgeta, mo givimaot pepa ya long ol wanwan man. Ol pablisa we oli raetem ol leta blong prij, oli save putum wan pepa i go insaed long leta blong singaot man ya blong kam long miting. Maet yu save livim wan pepa olsem long ol haos we oli no gat man.
3 Ol smol pepa ya oli bin lidim plante man we hat blong olgeta i stret blong oli kasem trutok. Wan woman i bin wantem blong kasem save long Baebol long ful laef blong hem, mo smol pepa ya nao i lidim hem blong mekem samting ya. Hem i prea wan ful naet long God, nao long moning, wan man mo waef blong hem we tufala i Wetnes, oli kilkilim doa blong hem. Woman ya i lukluk i goaot long windo mo i talem long tufala se hem i no gat taem blong storeyan. Tufala i pusum wan smol pepa i go aninit long doa. Pepa ya i talem se: “Kasem Save Long Baebol Blong Yu.” Woman i luk pepa ya mo hem i openem doa. Wan taem nomo, tufala i statem wan stadi wetem hem, mo samtaem biaen, hem i tekem baptaes. Yumi neva mas ting nating long paoa blong speret blong God, be yumi mas yusumgud ol smol pepa ya blong talemaot ol miting, taem yumi gohed blong prij.—Lukluk tu long Kingdom Wok Blong Yumi, Febuwari 1994, pej 1.