Spesel Traehad Long Fulwol Blong Talemaot Distrik Asembli Ya “!Folem Kraes!”
Bambae Ol Pablisa Oli Givimaot Wan Spesel Pepa Bakegen
1 Las yia, wok ya we yumi mekem long fulwol blong talemaot Distrik Asembli ya “!Klosap Nao Yumi Fri!” i gat bigfala paoa long ol man we oli intres long trutok. Samfala we oli kasem spesel pepa ya oli kam long asembli. Hemia faswan taem we oli luk wanem i kamaot long ol lafet long saed blong spirit we ol Witnes blong Jeova oli mekem. (Aes. 65:13) Oli haremgud blong joen wetem kampani blong ol Kristin brata blong yumi we oli gat lav mo oli joengud. (Sam 133:1) Blong givhan long plante moa man blong oli kam long Distrik Asembli ya “!Folem Kraes!” bambae yumi givimaot wan spesel pepa bakegen.
2 Frut We i Kamaot Las Yia: Ol ripot we oli kam long ol defren ples long wol, oli soemaot se i gat nambawan frut i kamaot from wok blong yumi blong talemaot Distrik Asembli ya “!Klosap Nao Yumi Fri!” Long plante ples, ol niuspepa oli talem ol gudfala tok long saed blong wok blong yumi. Long wan taon, niuspepa i tokbaot wok blong yumi long sikis laen we i stat antap long pej i kamdaon. Hem i talem se: “Blong givim pepa long evri man bifo long asembli ya, ol Witnes oli stap mekem wan spesel traehad. Oli wok plante moa aoa, oli wokbaot i go longwe moa, mo oli toktok moa kwik.” Long wan narafala bigfala taon, ol man blong raetem niuspepa oli intres tumas long wok ya blong givimaot pepa, nao oli raetem wan bigfala stori long saed ya. I gat tri niuspepa we oli talem ol gudfala tok long saed blong wok blong yumi bifo long asembli ya. Wan man blong niuspepa i raetem plante haf we oli moa long tu pej long wan niuspepa we i kamaot long Sande. Hem i tokbaot ol bilif blong yumi, kampani blong ol brata blong yumi long fulwol, wok blong givimaot spesel pepa ya blong singaot ol man, mo asembli. Taem wan pablisa i givim pepa ya long wan man, man ya i talem se: “Yes. !Naoia nomo mi mi stap ridim stori blong asembli ya long niuspepa!” Wan narafala woman i talem se: “!Mi jes ridim stori blong yufala long niuspepa, mo mi sek we yu stap long haos blong mi finis! ?Hemia pepa blong mi?” Afta, hem i talem se: “Samting ya we ol Witnes blong Jeova oli mekem, i gud tumas.”
3 Plante man we oli intres, oli wokbaot i kam long ples blong asembli mo oli karem pepa ya long han blong olgeta. Samfala we oli intres oli stap long ol taon longwe long ples blong asembli, ale oli draevem trak blong olgeta i kam. Bigfala traehad blong yumi blong singaot ol man oli kam, i mekem se namba blong ol man long ol asembli i kam antap. Long wan kantri, namba blong ol man i 27 pesen antap long namba blong wan yia bifo.
4 Finisim Teritori: Tri wik bifo we asembli i stat, yufala i save stat blong givimaot pepa ya. Yufala i mas traehad blong finisim olgeta teritori blong kongregesen. Long ol kongregesen we teritori i bigwan, ol pablisa oli save lego wan pepa i stap long ol haos we i no gat man, long laswan wik bifo long asembli. Ol kongregesen oli mas traehad blong givimaot olgeta pepa we oli gat, mo blong kavremap plante teritori. Sipos i gat sam pepa i stap, ol paenia long kongregesen oli save yusum olgeta.
5 ?Bambae Yumi Talem Wanem?: Maet yu talem samting olsemia: “Mifala i stap joen long wan wok we i gohed long fulwol, blong givimaot pepa ya blong singaot yu yu kam long wan impoten asembli. Hemia pepa blong yu. Insaed long pepa ya bambae yu faenem save long saed blong asembli ya.” Sipos yumi mekem toktok blong yumi i sot nomo, bambae yumi save givimaot pepa ya long plante moa man. Be sipos man blong haos i wantem askem sam kwestin, i gud yumi tektaem blong ansa long olgeta. Sipos yumi faenem wan man we i intres, yumi mas raetemdaon nem blong hem mo gobak kwik.
6 !I impoten tumas we yumi traehad blong folem Kraes! (Jon 3:36) Distrik asembli long yia ya bambae i halpem yumi blong mekem olsem. Yumi save finis se bambae yumi givim wan nambawan witnes long ol man tru long spesel traehad we yumi mekem blong talemaot Distrik Asembli ya “!Folem Kraes!” Taswe yu mas wok wetem strong tingting blong singaot plante man oli kam. Bambae Jeova i blesem bigfala traehad blong yu wan, taem yu joen long wok ya we kampani blong ol brata blong yumi long fulwol i mekem.