Spesel Wok Long Fulwol Blong Talemaot Distrik Asembli Ya “!Klosap Nao Yumi Fri!”
Ol Pablisa Blong Ol Wanwan Kongregesen Oli Mas Givimaot Wan Spesel Smol Pepa
1 Stat long Mei 2006 long ol kantri long not blong wol, gogo kasem taem we ol asembli oli finis long ol narafala ples long wol, bambae i gat wan spesel wok long fulwol blong seremaot wan smol pepa blong talemaot distrik asembli we bambae i stap long klosap 155 kantri mo aelan. Long taem ya, bambae oli talemaot tu ol spesel asembli long Jemani, Ripablik blong Jek, mo Polan, we oli kamaot long manis Julae mo faswan wik blong Ogis 2006.
2 From we yumi stap long en blong ol lasdei, asembli ya i tokbaot promes blong God se bambae hem i mekem ol man oli kam fri long ol trabol long wol ya. Hemia bambae i pulum tingting blong olgeta we oli stret blong kasem laef we i no save finis. Ol tok ya bambae i mas pusum olgeta blong tingbaot ol samting we bambae i hapen long fiuja. Blong givim janis long plante milian man blong oli harem ol tok we i save leftemap tingting mo givim hop long olgeta, bitim 98,000 kongregesen blong ol Witnes blong Jeova long olgeta ples long wol oli kasem advaes blong joen wetem glad long wok ya blong talemaot asembli we bambae oli go long hem.
3 Bambae ol kongregesen oli kasem naf smol pepa blong mekem se wanwan pablisa i save gat samwe long 20 kasem 40 blong seremaot. Sipos i gat sam pepa oli stap, ol paenia long kongregesen oli save seremaot. Long wanwan kongregesen, bambae oli statem spesel wok ya tri wik bifo we asembli blong olgeta i stat. Hemia i blong letem naf taem blong ol pablisa oli kavremap bighaf blong teritori no olgeta teritori blong kongregesen.
4 I gud we yumi traem givim wan smol pepa long wan man long evri haos. Be sipos i no gat man long haos, yumi save livim wan smol pepa aninit long doa. Yumi mas traehad blong finisim olgeta smol pepa ya long ol trifala wik blong spesel wok ya.
5 Yumi gat strong tingting se bambae yumi givim wan bigfala witnes taem yumi mekem bigfala wok ya raon long wol blong talemaot Distrik Asembli ya “!Klosap Nao Yumi Fri!” Yumi prea se bambae Jeova i blesem bigwan traehad blong yumi wanwan taem yumi joen long spesel wok ya we bambae i goraon long fulwol.