Ol Pikinini—!Yufala i Givim Bigfala Glad Long Mifala!
1 Ol yangfala boe mo gel, ?yu yu save tok blong Jeova se yufala tu i mas joen long ol wok blong kongregesen? (Dut. 31:12; Sam 127:3) !Mifala i glad tumas we yufala i joen wetem mifala blong mekem wosip long Jeova! Yufala i mekem mifala i haremgud tumas taem yufala i stap kwaet long ol miting mo lesingud. I givim moa glad long mifala taem yufala i traehad blong ansa long prapa toktok blong yufala. Evriwan long kongregesen oli haremgud taem yufala i givim tok long Tiokratik Skul, taem yufala i glad blong joen wetem mifala long wok blong prij, mo taem mifala i harem ol tok se yufala i stap prij long ol fren mo tija blong yufala long skul we yufala i no fraet nating.—Sam 148:12, 13.
2 Mifala i wantem mekem yufala i save se mifala i flas long yufala, taem yufala i soemaot gudfala fasin, yufala i klin long bodi, klos mo fasin blong yufala, mo yufala i gat respek long ol bigman mo woman. Glad blong mifala i bitim mak taem yufala i putum ol tiokratik mak mo traehad blong kasem olgeta, from we samting ya i soem se yufala i stap ‘tingbaot Bigfala Man we i Wokem yufala.’—Ekles. 12:1; Sam 110:3.
3 Talemaot Long Mifala Ol Mak We Yufala i Wantem Kasem: Wan boe we i gat 8 yia i talem long wan distrik elda, se: ‘Fastaem, mi wantem tekem baptaes, mo biaen, mi wantem givhan long kongregesen. Mi wantem pasem ol maekrofon oli goraon, welkamem ol man, givhan wetem ol buk, ridim ol haf long buk stadi mo Wajtaoa stadi. Afta, mi wantem kam wan man blong givhan, mo biaen wan elda. Mi wantem kam wan paenia tu mo go long skul blong ol paenia. Afta, mi wantem go long Betel, kam wan seket elda, no wan distrik elda.’ !Boe ya i soem bigfala tangkyu from blesing we hem i gat blong mekem wok blong God!
4 Yufala we i stap kam bigwan moa long bodi blong yufala mo long saed blong speret, mifala i glad tumas taem yufala i kasem ol mak we yufala i putum. (Skelem wetem Luk 2:52.) Evri yia, plante taosen blong yufala i kam ol pablisa we oli no baptaes yet, mo biaen, yufala i kam naf blong tekem baptaes olsem ol man blong wok blong Jeova we oli givim laef blong olgeta i go long hem. Glad blong mifala i kam antap moa taem mifala i luk we biaen, yufala i joen long wok blong haftaem paenia, mo maet fultaem paenia tu. Tru ya, ol pikinini, yufala i givim bigfala glad long mifala, mo yufala i presem Papa blong yumi long heven long nambawan fasin. !Bambae Jeova i blesem yufala bigwan!—Prov. 23:24, 25.