“?Yu Yu Rere Finis From Wan Sik No Aksiden We i Save Kamaot Enitaem Nomo?”
Long wol ya, “samting we yumi no tingbaot, i save kamaot long yumi enitaem nomo.” Yumi save fesem wan bigfala trabol long saed blong bodi, mo maet ol dokta mo sam narafala oli traem fosem yumi blong tekem blad. (Pri. 9:11, NW) Blong rere from samting ya, Jeova i yusum ogenaesesen blong hem blong wokem plante rod blong givhan long yumi. Be hem i wantem we yumi tu yumi mekem wok blong yumi. I gud yu jekem ol samting ya.
• Oltaem yu mas karem kad ya Advance Medical Directive/Release wetem yu.
• Meksua se ol pikinini blong yu oli no stap karem olfala Aedentiti Kad, oli mas karem laswan we i kamaot.
• Ridim bakegen ol save long Kingdom Wok Blong Yumi long Oktoba 2009. Lanem olsem wanem blong toktok wetem ol dokta mo jaj, long saed blong tritmen blong pikinini blong yu.
• Ridim bakegen ol save long saed blong ol meresin we i gat wan smol samting long hem we i kamaot long blad, mo long saed blong ol narafala rod we dokta i save yusum long ples blong blad. (Hemia sam gudfala save: Wajtaoa, Oktoba 1, 1994, pej 31; Jun 1, 1990, pej 30-31, Fr./Ing.; Maj 1, 1989, pej 30-31, Fr./Ing.; Wekap!, Disemba 8, 1994, pej 23-27, Fr./Ing.; Ogis 8, 1993, pej 22-25, Fr./Ing.; Novemba 22, 1991, pej 10, Fr./Ing.; mo Kingdom Wok blong Yumi, Septemba 1992, Fr./Ing. mo Novemba 1990, Fr./Ing. Holem ol save ya i stap long wan ples we i isi blong faenem.)
• Tingbaot ol masin we ol dokta oli save yusum blong mekem blad blong yu i ron tru long olgeta, mo ol meresin we oli save yusum we i gat wan smol samting we i kamaot long blad, i stap long olgeta. Nao tekem wan desisen long saed blong ol samting ya, we tingting blong yu i no stikim yu from. (I gud yu fulumap wan pepa we oli kolem power of attorney, no proxy. Bambae yu luk wan ples long pepa ya blong talem wanem tritmen we yu yu save agri long hem.)
• Sipos yu gat taem, bifo we yu go long hospital, yu mas talemaot trabol blong yu long ol elda. Olsem nao, bambae oli givhan long yu, mo sipos i gat nid, bambae oli toktok i go long Komiti Blong Toktok Long Ol Dokta. Sipos i wan smol pikinini blong yu we i kasem trabol, yu no mas tektaem blong askem long ol elda blong oli toktok i go long Komiti ya.
Talemaot Klia Se Yu No Wantem Blad: Ol ripot oli soemaot se sam brata mo sista oli wet kasem las minit blong talemaot long ol dokta se oli no wantem blad. I no stret blong mekem olsem, from we dokta i no gat taem blong rerem narafala rod. Mo tu, ol brata sista ya oli stap long denja, from we dokta i save traem fosem olgeta blong tekem blad. I moagud we ol dokta oli save finis tingting blong yu. I gud oli holem wan pepa we yu saenem finis, blong talem stret long olgeta wanem samting we yu yu wantem. Hemia bambae i givhan long ol dokta blong givim tritmen kwiktaem long yu. Mo tu, i save mekem se i gat plante moa rod we oli save yusum blong givim tritmen long yu we i no gat blad long hem.
Enitaem nomo, yu save kasem wan sik no aksiden. Klosap oltaem, samting ya i kamaot taem yumi no tingbaot nating. Taswe, yu mas tekem aksen naoia blong lukaot gud long yu mo ol pikinini blong yu, mo blong meksua se ol dokta oli no traem fosem yufala blong tekem blad.—Prov. 16:20; 22:3.