!Pulum Tingting i Go Moa Long Baebol!

1. ?Long stat, oli wokem Wajtaoa i blong hu, mo magasin ya The Golden Age i blong hu?

¹ Long Oktoba 1, 1919, oli wokem faswan magasin ya The Golden Age. Magasin ya i kam wan nambawan tul long wok blong prij. ?From wanem? From we oli wokem magasin ya speseli blong ol man afsaed long kongregesen. Hemia i defren long narafala magasin ya Wajtaoa. Plante yia finis oli tingbaot Wajtaoa se hem i speseli blong “smol kampani.” (Luk 12⁠:​32, NW ) Taem oli jes wokem The Golden Age, ol pablisa blong Kingdom oli glad tumas long hem, mekem se long plante yia oli seremaot magasin ya moa i bitim Wajtaoa.

2. ?Tede wanem nem blong The Golden Age, mo oli wokem magasin ya blong wanem?

² Oli wokem magasin ya The Golden Age blong soemaot se wan rod nomo blong stretem trabol blong ol man, hemia rul blong Kraes blong Wan Taosen Yia, we bambae i lidim ol man blong oli gat nambawan laef. Long ol yia we oli pas, oli mekem sam jenis long The Golden Age folem ol jenis we oli kamaot long wol mo long laef blong ol man. Long 1937, nem blong magasin ya i jenis i kam Consolation. Long 1946, nem ya i jenis bakegen i kam Wekap!, hemia nem we tede yumi evriwan i save long hem.

3. ?Wekap! i givhan bigwan blong mekem wanem profet tok i kamtru?

³ Long stat kam kasem naoia, magasin ya i givhan bigwan long bigfala wok blong prij we i stat afta long yia 1919. (Mat. 24⁠:14) Be naoia, from we en i klosap tumas, i luk olsem se i waes blong mekem sam jenis bakegen long magasin ya Wekap!

4. (a) ?Sipos man i wantem haed long “dei blong kros” blong Jeova, hem i mas mekem wanem? (b) ?Folem Revelesen 14⁠:​6, 7, ‘enjel we i stap flae antap long skae’ i stap singaot ol man blong oli mekem wanem?

⁴ Plante milian man oli laekem blong ridim Wekap! from we hem i tokbaot plante defren samting we oli intres long hem mo we i no joen wetem jos mo Baebol. I sua se bighaf blong ol man we oli joen evri yia long Memoriol, oli ridim Wekap! oltaem. Be sipos man i wantem haed long “dei blong kros” blong Jeova, hem i mas mekem sam moa samting i bitim we hem i jes ridim ol buk blong yumi nomo.​—⁠Sef. 2⁠:3; Rev. 14⁠:​6, 7.

5. (a) ?Stat long Jenuware 2006, bambae magasin ya Wekap! i tokbaot wanem samting moa? (b) ?Maet save ya i mekem se plante moa man oli wantem mekem wanem, mo hemia bambae i mekem wanem profet tok i kamtru?

⁵ From samting ya, stat long Jenuware 2006, bambae Wekap! i pulum tingting blong ol man i go moa long Kingdom blong God. Magasin ya bambae i tok stret moa long ol man, blong traem pulum olgeta blong lukluk i go long Baebol blong faenem rod blong stretem ol problem blong olgeta. Mo bambae magasin ya i tokbaot moa, mining we Baebol i givim long saed blong ol samting we oli stap hapen tede. Olsem nao, olgeta we oli ridim magasin ya bambae oli kasem save moa from wanem ol samting oli stap hapen tede, mo maet save ya i mekem se oli wantem lanem moa long saed blong Jeova.​—⁠Sek. 8⁠:⁠23.

6, 7. (a) ?Olsem wanem Wekap! bambae i givhan long plante man blong oli folem tok blong 1 Tesalonaeka 2⁠:13? (b) ?Bambae Wekap! i kamaot hamas taem long wan manis, mo jenis ya bambae i afektem hamas lanwis?

⁶ Wekap! bambae i gohed blong tokbaot ol defren samting we ol man oli intres long olgeta. Be, bambae hem i pulum tingting blong ol man i go moa long Baebol. (1 Tes. 2⁠:13) Wajtaoa i stap karem plante dip save blong Baebol, mo naoia Wekap! tu bambae i tokbaot ol samting we oli laenap moa wetem Baebol. Taswe i luk olsem se i no moa gat nid blong wokem Wekap! tu taem long wan manis. From samting ya, stat long Jenuware 2006, bambae Wekap! i kamaot wan taem nomo long wan manis. Samting ya bambae i mekem se wok blong rerem, transletem, mo sanem ol buk mo magasin oli go long olgeta ples, i kam moa isi.

⁷ Jenis ya bambae i afektem samwe 40 pesen blong ol lanwis we Wekap! i stap long olgeta. Long bighaf blong ol lanwis, Wekap! i stap kamaot finis wan taem nomo long wan manis, no fo taem nomo long wan yia olsem oli stap mekem long Bislama. Long saed blong Wajtaoa, bambae i no gat jenis.

8. ?Olsem wanem ol pablisa oli save yusum Wekap! wantaem wetem Wajtaoa?

⁸ Ol pablisa oli save seremaot Wekap! long Inglis mo Franis wantaem wetem wan long tufala Wajtaoa we i kamaot long sem manis. Olgeta we oli laekem tokbaot Wekap! long wok blong prij, oli save yusum sem magasin nomo long ful manis we oli no nid blong jenisim fastok blong olgeta, olsem we yumi stap mekem finis long Bislama.

9. ?Wekap! bambae i gohed blong mekem wanem wok?

⁹ Stat long 1919, taem oli jes wokem The Golden Age we biaen i karem nem ya Consolation, mo naoia Wekap!, magasin ya i givhan bigwan long wok blong prij. Yumi prea se bambae Jeova i gohed blong blesem wok blong seremaot magasin ya naoia we yumi mekem sam jenis long hem, mo se bambae magasin ya i givhan long plante moa man long “olgeta kala, mo long olgeta kantri, mo long olgeta laen, mo long olgeta lanwis” blong oli putum tingting blong olgeta i stap nomo long Kingdom blong God.​—⁠Rev. 7⁠:⁠9.