?Yu Yu Rere Blong Tekem Janis Blong Prij?
1. ?Wanem ol eksampol we oli soem se taem yumi tekem janis blong prij yumi save karem gudfala frut?
1 Gudfala frut i save kamaot sipos yumi tekem janis blong prij long ol man. I gat plante eksampol long Baebol we man i tekem janis blong prij mo i karem plante frut. (Jon 4:7-15) ?Yumi save mekem wanem blong yumi rere blong prij long fasin olsem?
2. ?Olsem wanem klos mo hea blong yumi i save givhan long yumi blong tekem janis blong prij?
2 Klos Mo Hea: Yumi mas lukaot gud oltaem long klos mo hea blong yumi, blong mekem se ol man oli no tingting nogud long yumi taem yumi serem bilif blong yumi wetem olgeta. (1 Tim. 2:9, 10) Sipos yumi harem se klos mo hea blong yumi i no stret blong prij, maet yumi sem blong tekem janis blong prij. Be sipos ol man oli luk we klos mo hea blong yumi i klin mo i stret, maet oli askem long yumi from wanem yumi jenis gud. Tingbaot tufala Witnes we tufala i stap go long wan trip, tufala i jenis gud mo tufala i sidaon klosap long wan man Muslim. Man ya i luk we tufala i jenis gud ale hem i askem sipos tufala i Kristin. Samting ya i mekem se oli storian blong tri aoa long Baebol.
3. Folem eksampol blong Jisas, ?olsem wanem yu yu bin statem wan storian?
3 Statem Ol Storian: Taem Jisas i luk wan woman Sameria long wel blong Jekob, hem i yusum wan isi rod nomo blong statem storian blong hem. Hem i askem long woman ya blong givim smol wota long hem. Long sem fasin, yumi save statem wan storian taem yumi talem wan smol toktok no askem wan isi kwestin. Be maet i gat sam taem we yumi fraet smol. Sipos yumi askem help blong Jeova, yumi save ‘mekem tingting blong yumi i strong’ blong statem storian.—1 Tes. 2:2.
4. ?Olsem wanem yumi save rere blong tekem janis blong prij long man?
4 Faenem Ol Rod: Plante pablisa oli faenem ol rod blong tekem janis blong givim witnes long ol man. Tingting bakegen long ol defren samting we yu yu mekem evri dei, mo tingbaot ol man we yu save faenem olgeta. Karem sam buk we oli stret mo wan smol Baebol. Lukluk ol man we oli stap raonabaot long yu, mo soem intres long olgeta. Yu save rere blong givim wan gudfala witnes sipos yu tingbaot fastaem ol rod we yu save yusum evri dei.—Fil. 1:12-14; 1 Pita 3:15.
5. ?From wanem yumi mas mekem plan blong tekem janis blong prij long ol man?
5 Yumi gat tu gudfala risen from wanem yumi mas yusum gud ol janis blong prij, hemia from we yumi lavem God mo yumi lavem ol man. (Mat. 22:37-39) From we i no gat plante taem i stap blong prij long ol man, yumi mas mekem plan blong tekem janis blong prij. Naoia we i gat taem yet, yumi mas rere blong tekem evri janis blong talemaot gud nius blong Kingdom long ol narafala man.—Rom 10:13, 14; 2 Tim. 4:2.