Soemaot Tangkiu From Nambawan Presen We God i Givim
1. ?From wanem yumi mas talem spesel tangkiu, i go long Jeova?
1 Long olgeta gudfala presen we Jeova i givim, beswan presen hemia ransom we Pikinini blong hem we hem i lavem tumas, i givim. (Jem. 1:17) Ransom ya i openem rod blong yumi kasem plante blesing, mo blong God i fogivim sin blong yumi tu. (Efes. 1:7) From samting ya, oltaem yumi talem tangkiu long God. Long ol manis klosap long Memoriol, yumi tekem moa taem blong tingting dip long saed blong nambawan presen ya.
2. ?Olsem wanem blong mekem se yumi mo famle blong yumi i gat tangkiu from ransom?
2 ?Olsem Wanem Blong Givhan Long Famle Blong Gat Tangkiu?: I gud we yu givhan long famle blong yu blong oli gat tangkiu. Blong mekem olsem, long ol wik bifo long Memoriol long Maj 30, long taem blong Famle Wosip no Baebol stadi, maet yufala i save luklukbak long ol save long saed blong ransom. Mo tu, evri dei, yufala evriwan long famle i save joen tugeta blong ridim spesel Baebol riding blong Memoriol. Yufala wanwan i mas tingbaot olsem wanem ransom i givhan long yufala, mo i mekem we yufala i gat gudfala tingting long saed blong Jeova, yufala wanwan, ol narafala, mo fiuja tu.
3. ?Olsem wanem yumi save soemaot tangkiu?
3 Rod Blong Soem Tangkiu: Tangkiu we yumi gat long saed blong ransom, i pusum yumi blong talemaot bigfala lav we Jeova i soemaot taem hem i sanem Pikinini blong hem i kam. (Sam 145:2-7) Long trifala manis ya Maj, Eprel, mo Mei, sam famle oli soemaot tangkiu taem oli mekem plan blong wan memba blong famle i joen long wok blong haftaem paenia. Sipos yu no save mekem wok ya, ?olsem wanem, yu yu save ‘yusum evri janis’ blong joen moa long wok blong prij? (Efes. 5:16) Tangkiu we yumi gat bambae i pusum yumi tu, blong givhan long narafala blong kam long Memoriol wetem yumi. (Rev. 22:17) I gud yu stat blong mekem wan lis blong ol visit, ol Baebol studen, ol famle, ol fren long wok, mo olgeta we oli stap klosap long yu, we yu save singaot olgeta. Mo mekem bes blong yu blong joen long spesel wok ya blong singaot ol man oli kam long Memoriol.
4. ?Long wanem rod maet yumi yusum ol manis klosap long Memoriol long fasin we i waes?
4 Ol manis klosap long Memoriol oli givim sam moa janis long yumi blong soemaot bigfala tangkiu long Jeova, from presen we hem i givim long ol man long wol. I gud yumi yusum taem ya blong gat moa tangkiu mo soemaot tangkiu ya from ransom mo “ol gudgudfala samting ya blong Kraes, we i no gat man i save kaontem.”—Efes. 3:8.