“Yu Mas Finisim Olgeta Wok Ya We God i Givim Long Yu Blong Mekem”
1. ?Pol i soemaot wanem gudfala eksampol long wok blong prij?
1 “Yu mas finisim olgeta wok ya we God i givim long yu blong mekem.” (2 Tim. 4:5) Aposol Pol i no fraet blong toktok taem hem i givim advaes ya long Timoti. Samwe long yia 47 mo 56 K.T., Pol i finisim namba tri misinari trip blong hem. Buk blong Ol Wok i talem plante taem se Pol i finisim gud wok ya blong “talemaot” gud nius. (Wok 23:11; 28:23) ?Tede, yumi save folem eksampol blong hem olsem wanem?
2. ?Yumi save mekem olsem wanem blong kasem man taem yumi prij long ol haos wanwan?
2 Long Ol Haos Wanwan: Yumi wantem kasem ol man we oli no harem gud nius yet, taswe yumi go long haos blong olgeta long ol defdefren taem. Maet man blong haos i stap long sapa no long wiken. Mo tu, yumi mas traehad blong toktok long wan man long evri haos, mo sipos i no gat man long haos, yumi gobak bakegen mo bakegen blong faenem man. ?Be olsem wanem sipos yu no faenem hem? Ating yu save kasem hem sipos yu putum wan leta no yu ringim hem.
3. ?Yumi gat janis blong prij long weples?
3 Long Ol Pablik Ples Mo Taem Yumi Tekem Janis Blong Prij: Tede, ol man blong Jehova oli talemaot “waestok” long evri man we oli wantem lesin. Samtaem oli talemaot “long ol big rod,” mo long “ol ples blong mekem maket.” (Prov. 1:20, 21) Taem yumi stap mekem ol wok blong yumi evridei, ?yumi tingbaot blong prij long narafala? ?Ol narafala oli luk se yumi ‘stap oltaem nomo long wok blong talemaot gud nius’? (Wok 18:5) Sipos yes, yumi stap mekemgud wok ya blong “talemaot” gud nius.—Wok 10:42; 17:17; 20:20, 21, 24.
4. ?Prea mo tingting dip i save givhan long yumi olsem wanem?
4 Be samtaem, yumi no prij long narafala from we yumi fraet no yumi sem. Jehova i kasem save se i gat sam samting we yumi no naf blong mekem. (Sam 103:14) Nating se i olsem, i gud we yumi prea long Jehova blong hem i mekem tingting blong yumi i strong blong toktok. (Wok 4:29, 31) Mo tu, yumi mas tinghae moa long gud nius se i save givhan long ol narafala. (Fil. 3:8) Yumi mekem olsem taem yumi stadi yumi wan mo yumi tingting dip long Baebol. !Samting ya bambae i pulum yumi blong yumi gohed strong moa blong talemaot gud nius ya!
5. ?Yumi save givhan olsem wanem blong mekem profet tok blong Joel i kamtru?
5 Profet tok blong Joel i talem se, bifo we bigfala dei blong Jehova i kamtru, ol man blong God bambae oli ‘muv i go, we i no gat wan samting i save blokem olgeta,’ oli gohed nomo long wok blong prij. (Joel 2:2, 7-9) !I gud sipos yumi tu yumi joen fulwan long wok ya blong talemaot gud nius! !Hem i wan wok we bambae yumi no moa mekem bakegen samtaem!