Sakrefaes Blong Jisas i Mekem Se Man i Save Laef Bakegen

Memoriol i wan gudfala janis blong tingbaot ol blesing, olsem laef bakegen, we bambae oli kamaot from ded blong Jisas. Ded i wan samting we i no stap long plan blong Jehova. Taswe, taem wan famle no fren blong yumi i ded, yumi harem nogud tumas. (1 Kor. 15:26) Jisas i harem nogud taem hem i luk ol disaepol blong hem oli stap krae from Lasaros we i ded. (Jon 11:33-35) Jisas i soemaot gud fasin blong Papa blong hem. Taswe yumi save se Jehova tu i harem nogud taem hem i luk we yumi stap krae from wan famle we i ded. (Jon 14:7) Jehova i wantem tumas blong mekem ol man blong hem oli laef bakegen, mo yumi tu, yumi wantem tumas blong luk taem ya. —Job 14:14, 15.

Jehova i no wan God we i wok olbaot, taswe yumi save se bambae hem i folem wan gudfala plan blong mekem ol man oli laef bakegen. (1 Kor. 14:33, 40) Bambae i no moa gat ol seves blong berem dedman, be maet i gat ol miting blong welkamem ol man we oli laef bakegen. ?Olsem wanem? ?Yu yu stap tingting dip long laef bakegen, antap moa, taem wan famle no fren blong yu i ded? (2 Kor. 4:17, 18) ?Yu yu talem tangkiu long Jehova, from we hem i letem Pikinini blong hem i ded blong pemaot yumi, mo from we hem i talem long Baebol se ol dedman bambae oli laef bakegen?—Kol. 3:15.

• ?Weswan fren no famle blong yu we yu wantem tumas blong luk bakegen?

• ?Weswan man no woman long Baebol we yu wantem tumas blong storian wetem hem?