Ol Rod Blong Soem Lav Long Ol Man

Yumi famle nomo from we yumi kamaot long fas man ya Adam. Evriwan long famle oli mas lavem mo respektem olgeta, be i had tede blong faenem kaen lav ya. Hemia i no samting we God i wantem.

LAV WE BAEBOL I TOKBAOT

‘Lavem ol man raonabaot long yufala, olsem yufala i stap mekem long yufala.’—LEVITIKAS 19:18.

“Gohed blong lavem ol enemi blong yufala.”—MATIU 5:44.

?LAVEM MAN I MINIM WANEM?

Makem olsem wanem God i tokbaot lav long 1 Korin 13:4-7:

“Man we i gat lav, hem i gat longfala tingting mo i kaen.”

Tingbaot: ?Yu filim olsem wanem taem ol narawan oli gat longfala tingting, oli kaen, mo oli no kros taem yu mekem mastik?

“Man we i gat lav, hem i no jalus.”

Tingbaot: ?Yu filim olsem wanem taem ol narawan oli no trastem yu o oli jalus long yu?

“Hem i no tingbaot hem wan nomo.”

Tingbaot: ?Yu filim olsem wanem taem ol narawan oli respektem tingting blong yu mo oli no fosem yu blong folem tingting blong olgeta?

“Hem i no tingbaot rong we ol narafala oli mekem long hem.”

Tingbaot: God i rere blong fogivim ol man we oli tanem tingting from sin blong olgeta. “Hem i no save gohed oltaem blong tok strong long man, mo kros blong hem i no save stap olwe.” (Ol Sam 103:9) Yumi glad taem man we yumi spolem, hem i fogivim yumi. So yumi mas rere tu blong fogivim ol narawan taem oli spolem yumi.—Ol Sam 86:5.

“Hem i no glad long ol fasin we i no stret.”

Tingbaot: Taem yumi safa from wan trabol, yumi no laekem we ol narawan oli glad from. So yumi no mas glad tu taem ol narawan oli fesem hadtaem, nating sipos oli bin tritim nogud yumi.

Sipos yumi folem ol rod ya blong lavem ol narafala, nomata se oli hu, bae yumi kasem blesing blong God. Wan gudfala rod blong folem, hemia blong halpem olgeta we oli gat nid.