Kasem Blesing Taem Yu Halpem Man We i Gat Nid

Plante man long wol oli nidim kakae mo ples blong slip. Samfala oli jes nidim hop long saed blong fiuja. God i wantem se yumi halpem ol man olsem, nao hem i save blesem yumi.

BAEBOL I TALEM WANEM

‘Taem yu givim samting long puaman, i olsem we yu letem [Jehova] i yusum fastaem, mo hem bambae i givim jenis long yu.’ —OL PROVEB 19:17.

?YU HALPEM MAN WE I GAT NID OLSEM WANEM?

Jisas i talem parabol blong wan man we ol stilman oli kilim mo livim hem i hafded i stap. (Luk 10:29-37) Ale wan strenja i stop nao i kea long man ya we i kil nogud. Man ya i mekem olsem, nating se hem i blong defren ples.

Man ya we i kaen, hem i halpem man ya we i gat kil, i givim samting we hem nidim, mo tu, i mekem hem i haremgud mo i no moa wari.

?Yumi lanem wanem long parabol ya? Jisas i stap soem se yumi mas halpem olgeta we oli gat nid. (Ol Proveb 14:31) Baebol i tijim se klosap nao wil blong God bambae i finisim fasin pua mo safa. Maet yumi wantem askem se: ?God bambae i mekem samting ya wetaem mo olsem wanem? Nekis haf bambae i tokbaot ol blesing we Krieta blong yu i rerem blong yu.