Krieta Blong Yumi i Kea Mo i Lavem Yumi
1. KRIETA BLONG YUMI I MEKEM SAN I SAEN
Sipos i no gat laet blong san, bambae i no gat ol laef samting long wol. San i givim paoa long ol tri blong oli save gat ol lif, ol flaoa, ol frut, ol nat, mo ol sid. Mo tu, i mekem se ol rus blong ol tri oli save pulum wota we i stap aninit long graon i go antap long ol lif blong hem, mo biaen wota ya i goaot olsem gas i go long win.
2. KRIETA BLONG YUMI I MEKEM SE I GAT REN
Ren i wan sas presen we God i givim, blong mekem se ol samting long wol oli karem kakae blong yumi save kakae. God i givim ren mo ol frut we oli kamaot long stret taem blong olgeta, mo i mekem yumi haremgud long ol kakae mo i stap mekem yumi glad.
3. KRIETA BLONG YUMI I GIVIM KAKAE MO KLOS
Plante papa oli wari se oli no save givim inaf kakae mo klos long famle blong olgeta. Yu luk tok we Baebol i talem, i se: “Yufala i lukluk gud ol pijin ya we oli stap flae. Olgeta oli no planem kakae mo oli no tekem kakae long garen, mo oli no stap hivimap kakae long haos, be Papa blong yufala long heven i stap givim kakae long olgeta. ?Yufala i no ting se yufala i moa impoten i bitim ol pijin ya?”—Matiu 6:25, 26.
“Yufala i traem tingbaot ol flaoa ya we oli stap gru long bus, yufala i save lanem wan samting long olgeta . . . be mi mi talem long yufala se ol klos blong King Solomon oli no naes olsem ol flaoa ya, nating se hem i gat plante flas samting. Ol flaoa ya oli blong wan dei nomo, tumora bambae ol man oli bonem long faea, be God i stap flasem gud olgeta . . . , ?taswe yufala i no ting se hem i wantem moa blong flasem yufala?”—Matiu 6:28-30.
From we God i save givim kakae mo klos long yumi, i sua se hem i save halpem yumi tu blong kasem ol nara samting we yumi nidim. Sipos yumi traehad blong mekem wil blong God, hem i save blesem traehad blong yumi blong planem kakae, o i halpem yumi blong faenem wan wok, blong yumi save pem ol samting we yumi nidim.—Matiu 6:32, 33.
Yes, yumi gat gudfala risen blong lavem God taem yumi tingbaot san, ren, ol pijin, mo ol flaoa. Nekis haf bambae i tokbaot olsem wanem Krieta blong yumi i toktok wetem ol man.