Ol Refrens Blong Kristin Wok Mo Laef—Buk Blong Miting
7-13 OGIS
OL GUDGUDFALA SAMTING LONG BAEBOL | ESIKEL 28-31
“Jehova i Givim Pei Long Wan Neson We i No Wosipim Hem”
it-2 pej 1136 haf 4
Taea
Taon Ya i Foldaon. Long ol taem we Nebukadnesa i raonem Taea, “hea blong [ol soldia blong hem] i kamkamaot evriwan” from ol hat we oli werem, mo ol solda blong olgeta oli “kamkamaot” tu from ol hevi samting we oli stap karem taem oli raonem Taea. Be Nebukadnesa i no kasem “pei” taem hem i faet agensem ol man Taea, ale Jehova i promes blong givim ol gudgudfala samting blong Ijip olsem pei blong hem. (Esik 29:17-20) Josephus wan man Jiu we i stadi long histri, i talem se, Babilon i raonem Taea blong 13 yia (Against Apion, I, 156 [21]), mo oli lusum plante samting long taem ya. Folem histri, ol man oli no raetemdaon ol evri samting we Nebukadnesa i mekem long taem ya. Be i luk olsem se, long taem ya ol man Taea oli lusum plante samting mo plante man tu oli ded.—Esik 26:7-12.
it-1 pej 698 haf 5
Ijip, Ol Man Ijip
Wan olfala hanraet blong Babilon, we oli raetem long namba 37 yia we Nebukadnesa i rul (588 Bifo Kraes), i tokbaot wan taem we Babilon i agensem Ijip. Maet taem ya nao oli tekem ol gudgudfala samting blong Ijip, o maet long wan nara taem bakegen. Nomata se long wanem taem stret, be yet Nebukadnesa i kasem ol gudgudfala samting blong Ijip olsem pei blong hem, from we hem i faet long saed blong Jehova taem hem faet agensem ol man Taea we oli stap spolem ol man blong God.—Esik 29:18-20; 30:10-12.
g86 11/8 pej 27 haf 4-5
?Yumi Mas Pem Evri Takis?
Blong ansa long kwestin ya, i gud yumi luk samting we God hem wan i mekem blong pembak wan kaon long wan king we i no wosipim hem, from wok we king ya i mekem. Stret fasin blong Jehova blong jajem man i pulum hem blong mekem desisen se kantri blong Taea i mas lus. Blong mekem samting ya, God i yusum ol ami blong Babilon we oli stap aninit long King blong olgeta, Nebukadnesa. Babilon i win, be hem i no kasem wan pei nating. Jehova i harem se oli mas kasem pei from samting we oli mekem. Hem i talem long Esikel 29:18, 19 se : “Man blong wol ya. King Nebukadnesa blong Babilonia i goaot blong mekem faet long taon ya Taea. . . . Be long hadwok ya blong olgeta, king ya wetem ol soldia blong hem oli no winim wan samting nating long taon ya olsem pei blong olgeta. Oraet, yu mas talem long hem we mi mi talem se mi mi Hae God, mi Masta blong olgeta man, mo bambae mi givim kantri ya Ijip long hem. Bambae hem i winim kantri ya, mo i go karemaot ol gudgudfala samting blong hem, blong givim i go long ol soldia blong hem olsem pei blong olgeta.”
Ol man we oli stadi long Baebol, oli save se Nebukadnesa i wan flas man, i tingbaot hem wan nomo, mo i wan hiten king. Ol man oli savegud tu ol man Babilon mo ol ami blong hem, from we oli stap mekem i nogud tumas long ol man we oli winim long faet. Jehova i no laekem ol fasin olsem, be yet hem i pembak kaon we hem i gat long ol man Babilon, mo hem i pem long ful praes blong hem.
Traem Faenem Ol Gudgudfala Samting Ya
it-2 pej 604 haf 4-5
Stret Gud Olgeta
Fas man we i sin mo king blong Taea. Sin we ol man oli kasem, i kamaot from sin we wan spirit man i mekem, olsem Jisas i talem long Jon 8:44, mo japta 3 blong Jenesis tu i tokbaot. Sing blong krae we i stap long Esikel 28:12-19 [NW ], i go long “king blong Taea,” be ol save long saed blong king ya i sem mak long samting we i hapen long wan spirit pikinini blong God we i mekem faswan sin. Fasin praod blong “king blong Taea,” fasin ya we hem i mekem hem wan i kam ‘wan god,’ oli singaot hem se wan “enjel,” mo hem i “stap long Iden, we i gudfala ples blong [God],” oli stret long ol save we Baebol i bin talem long saed blong Devel Setan, from we hem tu, tingting blong hem i go antap gogo i kam flas, hem i snek ya long Iden, mo Baebol i talem se hem i “god blong wol ya.”—1Ti 3:6; Jen 3:1-5, 14, 15; Rev 12:9; 2Kor 4:4.
King blong Taea i stap haedem hem wan, hem i stap talem se hem i ‘naes we i naes,’ mo hem i ‘wan man we i waes gud, mo i naes we i naes olgeta.’ Mo ‘fasin blong hem i stret gud,’ stat taem God i mekem hem kasem we oli faenemaot se hem i stap mekem ol rabis fasin. (Esik 27:3; 28:12, 15) Sing blong krae ya we i stap long Esikel, i tokbaot olgeta king blong Taea, i no wan king nomo. (Skelem wetem profet tok God i talem agensem wan narafala king we hem tu i stap haedem hem wan, hemia “king blong kantri ya Babilonia” we Aes 14:4-20 i tokbaot.) Wantaem, King Deved mo Solomon i fren wetem king blong Taea. King blong Taea tu i givhan long wok blong bildim haos tempol blong Jehova we i stap long hil blong Moria. Taswe, fastaem, ol haeman blong Taea oli no mekem eni nogud samting long ol man blong Jehova long Isrel. (1Ki 5:1-18; 9:10, 11, 14; 2Kron 2:3-16) Be ol niufala king blong Taea, oli gowe long ol fasin we i ‘stret gud,’ nao oli stap spolem ol profet blong God olsem Joel, Amos mo Esikel. (Joel 3:4-8; Amos 1:9, 10) Profet tok ya long saed blong “king blong Taea” mo enemi blong God, i soemaot bakegen se ‘wan man we i waes gud’ mo wan man we ‘fasin blong hem i stret gud’ i no save waes mo gat gudfala fasin blong olwe.
14-20 OGIS
OL GUDGUDFALA SAMTING LONG BAEBOL | ESIKEL 32-34
Bigfala Wok We Wan Wajman i Mekem
it-2 pej 1172 haf 2
Wajman
Narafala Mining Blong Wajman. Jehova i putumap sam profet we oli mekem wok tu olsem ol wajman blong ol man Isrel, be oli no wan prapa wajman (Jer 6:17), mo samtaem ol profet ya tu oli yusum wan pijatok blong wan wajman. (Aes 21:6, 8; 52:8; 62:6; Hos 9:8) Ol profet we oli ol wajman, oli gat wok blong wonem ol man long ol panis we bambae oli kasem from ol rabis fasin we oli stap mekem. Sipos ol profet oli no wonem ol man ya, oli gat fol. Be sipos ol man ya oli no lesin long ol profet ya, blad blong olgeta i stap long han blong olgeta wan. (Esik 3:17-21; 33:1-9) Wan profet we i no mekem gud wok blong hem, hem i olsem wan blaenman o wan dog we i stap gad be i no save singaot.—Aes 56:10.
w88 1/1 pej 28 haf 13
Gohed Blong Talemaot Kingdom
Yu No Mas Gat Fol
13 Wok we ol Witnes blong Jehova oli mekem blong wonem ol man long saed blong jajmen blong God, i sem mak long wok we Esikel i mekem. Jehova i putumap Esikel olsem wan wajman blong ol man Isrel. Wok blong hem i blong wonem ol man Isrel se Jehova bambae i panisim olgeta, sipos oli no lego ol rabis fasin blong olgeta. Sipos Esikel i no talemaot ol woning ya, bambae ol man nogud oli stil kasem panis, be blad blong olgeta bambae i stap long han blong Esikel. Jehova i soemaot tingting we hem i gat long ol man Isrel we oli stap mekem rabis fasin, hem i se: “Mi mi no glad nating blong luk wan man nogud i ded long sin blong hem. Mi wantem luk we hem i tanem tingting blong hem, i lego ol sin blong hem, nao bambae i laef i stap. Yufala i mas finis long ol rabis fasin ya we yufala i stap mekem. ?From wanem yufala i wantem ded?”—Esikel 33:1-11.
Traem Faenem Ol Gudgudfala Samting Ya
Folem Spid Blong Kat Blong Jehova
Yu No Mas Letem Tingting i Foldaon From Slak Fasin Blong Narafala
16 Esikel i soem wan gudfala eksampol taem hem i obei gud long Jehova, mo i no letem slak fasin blong ol narafala i mekem tingting blong hem i foldaon. Long sem fasin, sipos yumi stap folem ol niufala jenis we i stap kamaot long ogenaesesen blong Jehova, yumi stap folem ol advaes we i kamaot long man we i sidaon long Kat we Esikel i luk. Yumi kasem trening blong talemaot ol mesej blong hem, mo blong gat strong tingting blong no foldaon from slak fasin blong ol man we yumi stap talemaot mesej blong jajmen blong Jehova long olgeta. Olsem Esikel, Jehova i wonem yumi finis se sam man bambae oli agensem yumi, oli stronghed mo hat blong olgeta i strong. Sam narafala bambae oli no save lesin from we oli no wantem lesin long Jehova. (Esikel 3:7-9) Mo tu, bambae samfala oli gat tu fes, olsem Esikel 33:31, 32 i talem, i se: “Nao oltaem ol man blong mi oli stap kam hivap raon long yu blong oli harem ol samting we bambae yu talem, be oli no stap mekem ol samting we yu yu talem long olgeta blong oli mekem. Long maot blong olgeta oli stap talem se oli glad long tok blong yu, be tingting blong olgeta i stap strong nomo long ol samting we oli save win long hem. Oli stap luk yu olsem we yu wan man we i stap plei long gita, i stap singsing long ol sing blong switat, mo voes blong hem i naes we i naes. Oli stap lesin long ol tok blong yu, be oli no obei long hem nating.”
17 ?Ol tok we Esikel i stap talemaot oli blong nating nomo? Vas 33 i gohed i se: “Ol tok blong yu bambae i mas kamtru, mo taem i kamtru, bambae olgeta oli savegud we i gat wan profet i stap wetem olgeta.” Ol tok ya oli soemaot se Esikel i no lego wok blong hem, nating se ol man ya oli no folem wanem we oli harem. Slak fasin blong ol narafala i no mekem tingting blong hem i foldaon. Nating se ol man oli lesin o nogat, hem i obei nomo long Jehova mo i finisim gud wok blong hem.
21-27 OGIS
OL GUDGUDFALA SAMTING LONG BAEBOL | ESIKEL 35-38
“Klosap Nao Gog Blong Magog Bambae i Lus”
w88 9/15 pej 24 haf 11
‘Bambae Oli Savegud Se Mi Mi Jehova’
11 Afta we smol man Isrel we oli laef yet taem oli go kalabus long Babilon oli gobak long Juda, graon blong Juda we bifo i stap nating nomo i jenis i kam olsem “gudfala ples ya long Iden.” (Ridim Esikel 36:33-36.) Long sem fasin, stat long yia 1919 Jehova i mekem se paradaes blong spirit we ol tabu Kristin oli stap lukaot long hem yet long wol i kam niuwan bakegen, mo “bigfala hip blong ol man” tu oli kasem ol gudfala samting blong paradaes ya. From we paradaes ya i fulap long ol tabu man, i gud we ol Kristin wanwan oli wok blong mekem se i stap klin oltaem.—Esikel 36:37, 38.
28 OGIS–3 SEPTEMBA
OL GUDGUDFALA SAMTING LONG BAEBOL | ESIKEL 39-41
“Tempol We Esikel i Luk Mo Yu”
Traem Faenem Ol Gudgudfala Samting Ya
‘Ol Man Blong Olgeta Kantri Bambae Oli Savegud We Mi Mi Jehova’
Jehova i talem se: “Bambae mi mas mekem we ol man blong mi oli save tabu nem blong mi, nao bambae oli no moa mekem sem long hem bakegen.” Taem ol man oli talem se God i mekem i no stret, oli stap spolem nem blong God. ?From wanem yumi talem olsem? Long Baebol, “nem” i soemaot fasin blong man. Wan buk i talem se nem blong God i joen wetem “save we ol man oli gat long hem mo ol fasin blong hem; i pija tu blong haenem mo ona we hem i gat.” Nem blong Jehova i joen wetem ol gudfala fasin blong hem. ?Wanem filing blong Jehova taem wan man i spolem ol narafala? !Hem i no laekem nating! Hem i sore tu long ol man ya we narafala i spolem olgeta. (Eks 22:22-24) Taswe taem ol man oli talem se God i stap spolem ol man, hemia wan fasin we hem tu i no laekem nating, oli stap sakem doti long ol gudfala fasin blong hem, mo oli soemaot se oli “no respektem nem blong [hem.]”—Sam 74:10, NW
w89 8/15 pej 14 haf 20
Wan Rod We i Open Bakegen i Go Long Paradaes
20 ?Be olsem wanem long ol tul blong faet we ol neson oli lego i stap? Pijatok ya i soemaot se bambae i tekem taem blong oli spolem ol tul ya, from we oli plante tumas. (Esikel 39:8-10) Taswe maet bambae ol man we oli laef tru long Amagedon oli yusum ol tul blong faet ya we ol neson oli lego i stap blong mekem garen.—Aesea 2:2-4.