LAEF BLONG OL KRISTIN
Bigfala Asembli—Wan Taem Blong Soemaot Lav
?Wanem i mekem se yumi laekem tumas ol bigfala asembli blong yumi we oli kamaot evri yia? Olsem long Isrel bifo, ol bigfala asembli tede oli givim janis blong yumi wosipim Jehova wetem plante handred o taosen brata mo sista. Yumi harem gud long plante rij kakae blong spirit. Mo tu, yumi harem gud tumas blong spenem taem wetem ol fren mo famle. From samting ya, yumi wantem tumas blong stap long ol trifala dei blong bigfala asembli.
Taem yumi gat janis blong joen tugeta, yumi no mas tingbaot yumi nomo, be yumi mas tingbaot tu blong soem lav long ol narafala. (Ga 6:10; Hib 10:24, 25) Taem yumi openem doa long wan brata o sista, o yumi blokem nomo ol jea we yumi nidim, yumi stap soemaot se yumi tingbaot narafala. (Fil 2:3, 4) Ol bigfala asembli oli givim janis long yumi blong faenem ol niufala fren. Bifo mo afta long program mo long lanj taem, yumi save putum mak ya blong go storian wetem olgeta we yumi no save olgeta yet. (2Ko 6:13) !Ol fren we yumi faenem long taem ya, oli save stap olwe! Antap moa, taem ol narafala oli luk trufala lav we yumi soemaot, maet hemia bambae i pulum olgeta blong oli joenem yumi blong wosipim Jehova.—Jon 13:35.
WAJEM VIDEO YA !“LAV I NO SAVE FINIS SAMTAEM”! INTENASNAL ASEMBLI, BIAEN ANSA LONG OL KWESTIN YA:
?Olsem wanem ol brata mo sista oli soem lav long ol deleget we oli kam long intenasnal asembli blong 2019?
?Olsem wanem ol man oli luksave se ol man blong Jehova oli joengud mo oli gat lav?
?Wanem sam poen we ol memba blong Hed Kampani oli makem long saed blong Kristin lav?
?Olsem wanem yu save soem lav, long ol bigfala asembli?
?Wanem i soemaot se lav i joenem ol deleget wetem ol brata sista long Jemani mo Saot Koria?
?Yumi mas gat strong tingting blong mekem wanem?