?Baebol i Talem Wanem Long Saed Blong Ol Pandemik?
Ansa we Baebol i givim
Baebol i talemaot se long ol las dei, bambae i gat ol strong sik (we oli spred i go olbaot, olsem ol pandemik). (Luk 21:11) Be God i no stap givim ol sik ya long ol man blong panisim olgeta, nogat. Blong talem stret, i no longtaem, bambae God i yusum Kingdom blong hem blong finisim olgeta sik.
?Baebol i talemaot ol pandemik?
Baebol i no talemaot nem blong ol sik o pandemik, olsem COVID-19, AIDS, mo Spanis flu. Be Baebol i talemaot “ol strong sik.” (Luk 21:11; Revelesen 6:8) Hemia haf blong saen blong “ol las dei” o “lashaf blong sistem blong wol ya.”—2 Timoti 3:1; Matiu 24:3.
?Samtaem God i bin yusum sik blong panisim ol man?
Baebol i tokbaot sam taem we God i yusum sik blong panisim ol man. Eksampol, hem i mekem se samfala oli kasem sik ya leprosi. (Namba 12:1-16; 2 King 5:20-27; 2 Kronikel 26:16-21) Be hemia i no olsem pandemik we i spred i go long ol gudfala man tu. God i bin mekem se sik i kasem sam man we oli rebel agensem hem, olsem wan jajmen long olgeta.
?Ol pandemik tede, oli panis we i kamaot long God?
Nogat. Samfala oli talem se God i stap mekem ol man tede oli sik blong panisim olgeta. Be Baebol i no agri. ?From wanem?
Wan risen se, sam man blong wosipim God bifo mo tede, olgeta tu oli kasem ol sik. Wan long olgeta, hemia gudfala man ya Timoti. Baebol i talem se hem i “stap sik oltaem.” (1 Timoti 5:23) Be Baebol i no talem se hemia from we God i no glad long hem. Tede tu, samfala we oli holemstrong long God oli stap siksik o oli kasem wan strong sik. Plante taem, hemia from we oli stap long wan rong ples we narafala man i save pasem sik ya long olgeta.—Prija 9:11.
Baebol i tijim tu se i no stret taem yet blong God i panisim ol rabis man. Yumi stap yet long “dei blong sevem man,” i min se God i stap invaetem ol man yet blong oli kam klosap long hem, nao hem i save sevem olgeta. (2 Korin 6:2) Rod we hem i yusum blong invaetem olgeta, hemia wok we i gohed long fulwol blong talemaot “gud nius ya blong Kingdom.”—Matiu 24:14.
?Bambae ol pandemik oli finis samtaem?
Yes. Baebol i talem se i no longtaem, bambae i no moa gat man i sik. Kingdom blong God we i rul, bambae i finisim olgeta problem blong helt. (Aesea 33:24; 35:5, 6) Bambae ol man oli no moa safa, harem i soa long bodi long olgeta, mo ded. (Revelesen 21:4) Mo bambae God i mekem ol dedman oli laef bakegen, blong oli save stap long wol ya we i stret gud olgeta, mo gat gudfala helt.—Ol Sam 37:29; Ol Wok 24:15.
Ol vas blong Baebol long saed blong sik
Matiu 4:23: “[Jisas] i wokbaot i go long olgeta ples long Galili, i stap tijim ol man insaed long ol sinagog blong olgeta, mo i stap talemaot gud nius blong Kingdom, mo i stap mekem ol man we oli gat ol defdefren sik mo olgeta we bodi blong olgeta i nogud, oli kam gud bakegen.”
Mining: Jisas i mekem merikel blong tekemaot sik blong sam man, mo hemia i soemaot samting we klosap nao, Kingdom blong God bambae i mekem long olgeta man.
Luk 21:11: “Bambae . . . i gat ol strong sik.”
Mining: Ol problem blong helt long fulwol, oli haf blong saen blong ol las dei.
Revelesen 6:8: “Mi luk wan hos we prapa kala blong hem i lus, mo man we i sidaon long hem, nem blong hem Ded. Mo Gref i stap biaen long hem. Mo tufala i kasem paoa blong kilim man i ded . . . long ol strong sik.”
Mining: Profet tok blong Revelesen long saed blong fo man we oli ron long hos, i soemaot se bambae i gat ol pandemik long taem blong yumi.