Weta i Jenis—Fiuja Blong Yumi Mo Samting We Baebol i Talem
“Weta i jenis gogo i olsem wan disasta. I had blong ol man oli gohed blong laef long wol.”—The Guardian.
Ol man oli fesem wan bigfala trabol we olgeta nomo oli mekem. Bighaf blong ol saentis oli agri se wol i stap kam hot tumas from ol samting we ol man oli mekem. Taswe, weta i jenis mo i gat plante disasta. Hemia sam long olgeta:
Weta i narakaen, i kam hot bitim mak, drae bitim mak, mo i gat plante moa bigfala hariken. From samting ya, i gat moa ren, wota i ron olbaot, mo i gat plante moa bigfala bus faea tu.
Bigfala aes long Aktik i kam wota nomo.
Solwota i kam antap moa.
Bigfala trabol long saed blong weta i kamaot long evri kona blong wol. Wan ripot long New York Times i talem se 193 kantri i gat problem ya, mo biaen i talem se: “Planet ya i stap singaot se ‘!Help!’” From we narakaen weta i kilim plante man i ded mo i mekem plante moa oli safa, Wol Helt Oganaesesen i talem se weta ya “i denja moa long helt blong ol man i bitim olgeta narafala samting.”
Be yumi save putum tingting blong yumi long wan gudfala hop blong fiuja. Baebol i talemaot ol samting we i stap hapen tede, from wanem yumi save sua se God bambae i tekem aksen, mo samting we bambae hem i mekem blong protektem wol long fiuja.
Taem weta i jenis, ?hemia i mekem profet tok blong Baebol i kamtru?
Yes. Narakaen weta we i kamaot taem wol i stap kam hot moa, i stret long samting we Baebol i talem se bambae i hapen long taem blong yumi.
Profet Tok: God bambae i “spolem ol man ya we oli stap spolem wol.”—Revelesen 11:18.
Baebol i tokbaot wan taem we klosap wol bambae i lus from ol samting we ol man oli mekem. Oli stap spolem wol bitim olgeta taem bifo, from we oli stap mekem i kam hot tumas.
Profet tok ya i soemaot from wanem yumi no mas ekspektem se ol man bambae oli sevem wol. Makem gud se God bambae i tekem aksen taem ol man oli “stap spolem wol.” Samfala oli stap wok had blong traem blokem ol jenis long weta, be oli no naf blong stopem ol man we oli stap spolem wol.
Profet Tok: “Ol man bambae oli luk plante samting we i mekem oli fraet.”—Luk 21:11.
Baebol i talem se “plante samting we i mekem [ol man] oli fraet,” bambae oli hapen long taem blong yumi. Ol jenis long weta oli mekem ol bigfala disasta oli kamaot long evri ples long wol. Tede, samfala oli wari tumas long saed blong envaeronmen, gogo i kam olsem wan sik long tingting blong olgeta.
Profet Tok: “Long ol las dei, laef bambae i strong tumas mo bambae i had blong winim ol trabol. Bambae ol man oli tingbaot olgeta nomo, oli laekem mane tumas, . . . oli no holemstrong long ol narafala, . . . oli no save agri long wan tingting, . . . oli putum ol fren blong olgeta long han blong ol enemi, oli stronghed.”—2 Timoti 3:1-4.
Baebol i talemaot ol fasin mo aksen blong man, we oli stamba blong ol bigfala trabol long saed blong weta. Ol gavman mo ol bigfala bisnes oli tingbaot mane, i bitim laef blong ol man long fiuja. Nating se oli joen blong traem blokem problem ya we wol i stap kam hot tumas, be oli no save agri long samting we oli mas mekem.
Profet tok ya i soemaot se yumi no mas ekspektem se ol man bambae oli jenisim fasin blong olgeta mo protektem wol. Baebol i talem se ol man we oli stap tingbaot olgeta nomo, bambae oli “gohed blong mekem i mowas olgeta.”—2 Timoti 3:13.
?From wanem yumi sua se God bambae i tekem aksen?
Baebol i soemaot se Jehovaa God we i Krieta blong yumi, i laekem tumas wol ya mo ol man blong hem. Tingbaot tri vas nomo we oli soemaot se God bambae i tekem aksen.
1. God “i no mekem [wol ya] blong i stap nating nomo, be i wokem blong man i stap long hem.”—Aesea 45:18.
God bambae i mekem stamba tingting blong hem long saed blong wol ya i kamtru. (Aesea 55:11) Bambae hem i no letem ol man oli spolem wol ya gogo i no moa gat ol laef samting long hem.
2. “Ol man we oli gat tingting daon bambae oli tekem wol ya i blong olgeta, mo bambae oli glad tumas from oli gat pis we i bigwan tumas. Ol stret man bambae oli tekem wol ya i blong olgeta, mo bambae oli stap long hem blong olwe.”—Ol Sam 37:11, 29.
God i promes se ol man bambae oli laef olwe long pis long wol ya.
3. “Ol man nogud, bambae oli katemaot olgeta long wol ya.”—Ol Proveb 2:22.
God i promes se bambae hem i spolem ol rabis man, hemia olgeta tu we oli stap spolem wol.
Samting we God bambae i mekem long fiuja
?Olsem wanem God bambae i mekem promes blong hem i kamtru long wol? Bambae hem i yusum Kingdom blong hem, wan gavman we i save rulum fulwol. (Matiu 6:10) Kingdom ya i stap long heven, mo gavman ya i no nid blong mekem plan wetem ol gavman blong wol, long saed blong samting we bambae hem i mekem long wol mo envaeronmen. Kingdom ya bambae i tekem ples blong ol gavman blong man.—Daniel 2:44.
Samting we Kingdom blong God bambae i mekem, i gudfala nius long ol man mo long envaeronmen. (Ol Sam 96:10-13) Tingbaot sam samting we Jehova God bambae i mekem tru long Kingdom blong hem.
Fiksimap envaeronmen
Samting we Baebol i talem: “Draeples mo graon we i drae we i drae bambae tufala i harem gud, mo draeples bambae i glad mo i gat plante flaoa long hem olsem flaoa ya safron.”—Aesea 35:1.
?Bambae i mekem wanem long fiuja blong yumi? Jehova bambae i fiksimap planet ya, nating se ol man oli spolem gud plante haf blong hem.
Kontrolem weta
Samting we Baebol i talem: “[Jehova] i kwaetem strong win ya, nao ol wef blong solwota oli godaon, oli kam kwaet.”—Ol Sam 107:29.
?Bambae i mekem wanem long fiuja blong yumi? Jehova i gat paoa blong kontrolem weta. Bambae ol narakaen weta i no moa spolem ol man.
Tijim ol man blong oli lukaot gud long wol
Samting we Baebol i talem: “Bambae mi mekem se yu gat hed mo mi tijim yu long rod we yu mas folem.”—Ol Sam 32:8.
?Bambae i mekem wanem long fiuja blong yumi? Jehova i givim wok long ol man blong oli lukaot gud long wol. (Jenesis 1:28; 2:15) Bambae hem i tijim yumi long beswan rod blong mekem wok ya, mo olsem wanem blong no spolem ol samting raonabaot long yumi.
a Jehova i prapa nem blong God. (Ol Sam 83:18) Luk haf ya “?Hu Ya Jehova?”