Ol Saentis Oli Muvum Han Blong Klok Ya We i Makem En Blong Wol i Go Moa ?Baebol i Talem Wanem?

Long 24 Jenuware 2023, ol saentis oli muvum han blong Klok Ya We i Makem En Blong Wola i go klosap moa long 12 klok medel naet, we i minim en blong wol.

• “‘Klok Ya We i Makem En Blong Wol,’ i blong soemaot denja blong wan bigfala trabol we i save spolem olgeta man long wol. Long Tusde, oli muvum han blong klok ya i go klosap moa long 12 klok medel naet, from ol samting olsem wo long Yukren, denja blong wan wo we bambae oli yusum ol rabis niuklia bom, mo weta i jenis bigwan long fulwol.”—AFP International Text Wire.

• “Long Tusde, ol saentis oli talemaot se oli muvum han blong ‘Klok Ya We i Makem En Blong Wol’ i go long 90 seken bifo long 12 klok medel naet. Klok ya i neva stap klosap olsem long taem ya we ol man oli save spolem wol ya mo ol man tu.”—ABC News.

• “Wan grup blong saentis we oli kam long ol defren ples long wol oli givim woning se yumi stap long denja i bitim olgeta taem bifo, se ol man oli save spolem olgeta bakegen wetem fulwol.”—The Guardian.

?Olsem wanem? ?Ol man mo wol blong yumi bambae oli lus i no longtaem? ?Yumi mas fraet from ol samting we bambae oli hapen long fiuja? ?Baebol i talem wanem?

?Fiuja bambae i olsem wanem?

Baebol i talem se “wol i stap blong olwe” mo man bambae i “stap long hem blong olwe.” (Prija 1:4; Ol Sam 37:29) Taswe ol man bambae oli no spolem wol blong yumi fulwan, o mekem se i no moa save gat wan laef samting long hem.

Be i tru se Baebol i tokbaot en blong wol. Long wan vas, i talem se ‘wol ya i stap lus.’—1 Jon 2:17.

• Blong faenemaot wanem we Baebol i minim taem i tokbaot en blong wol, ridim atikol ya “?En Blong Wol i Stap Kam? ?Wanem Ya Apokalips?”

• Blong save wanem we Baebol i talem long saed blong taem blong ol samting long fiuja, ridim atikol ya “En Blong Wol ?Bambae i Kam Wetaem?”

Holem wan gudfala tingting

Baebol i save givhan long yumi blong holem wan gudfala tingting, nating se wol i fulap long trabol. ?Olsem wanem i givhan?

• Baebol i givim gudfala advaes we i save givhan long yumi evri dei. (2 Timoti 3:16, 17) Wan eksampol, hemia atikol ya “?Olsem Wanem Blong Kontrolem Wari?” Ridim atikol ya blong luk olsem wanem Baebol i save halpem yu blong holem wan gudfala tingting, nating se yu fesem plante trabol evri dei long laef blong yu.

• Baebol i givim wan hop blong fiuja we yumi save trastem. (Rom 15:4) Hem i eksplenem ol samting we yumi save ekspektem naoia mo long fiuja. Hemia i givhan long yumi blong gat strong tingting, nomata wanem i stap hapen long wol.

Blong save moa long saed blong Baebol, mifala i invaetem yu blong traem fri Baebol stadi kos blong mifala.