Ol Witnes Blong Jehova Mo Holocaust ?Baebol i Talem Wanem?

Plante man long olgeta ples blong wol oli makem dei ya 27 Jenuware 2023, blong tingbaot taem ya we ol Nasi oli kilim plante man i ded (Holocaust). Maet ol rabis samting we oli hapen long taem ya bitim 75 yia bifo, oli save mekem yu yu tingbaot from wanem God i no blokem.

• Blong faenemaot wanem we Baebol i talem, ridim atikol ya “?From Wanem Samtaem Sam Man Oli Kilim i Ded Plante Taosen Man Wantaem? ?From Wanem God i No Stopem Trabol Ya?”

Plante man Jiu oli safa mo oli ded long rabis taem ya. Ol Nasi oli folem wan plan we oli mekem blong kilim i ded ol grup blong ol man Jiu, wan afta narawan. Oli mekem i sem mak long samfala long ol narafala grup tu, olsem ol Witnes blong Jehova. Oli ronem mo kilim ol Witnes mo kilim plante long olgeta i ded from bilif blong olgeta we i stanap long Baebol.

• Blong save moa, ridim atikol ya “?Wanem i Hapen Long Ol Witnes Blong Jehova Taem Ol Nasi Oli Kilim Ded Plante Man?”

“Wan fiuja mo wan hop”

Plante man oli fraet se samting olsem Holocaust i save hapen bakegen. I gud tumas we Baebol i promes se long fiuja bambae i no moa gat ol rabis samting olsem.

• “‘Mi mi save gud ol tingting we mi stap tingbaot blong mekem long yufala, hemia tingting blong givim pis, be i no trabol, blong givim wan fiuja mo wan hop long yufala,’ hemia nao tok blong Jehova.”—Jeremaea 29:11.a

Hop ya bambae i kamtru taem Jehova God i tekem aksen blong finisim ol rabis samting we i stap hapen mo trabol we ol samting ya i mekem long ol man. I no longtaem bambae hem i:

• Tekemaot ol rabis man we oli stap spolem ol narafala.—Ol Proveb 2:22.

• Hilim ol man we oli bin safa.—Revelesen 21:4.

• Mekem olgeta we oli ded oli laef bakegen long wol.—Jon 5:28, 29.

Yu save trastem gudfala hop blong Baebol we i mekem yumi haremgud. Blong save from wanem yu save trastem, mifala i invaetem yu blong traem fri Baebol stadi kos blong mifala.