Ripot Long Wok Blong Kingdom

Oli Givim Witnes Long Swiden Taem Oli Ded From Bilif Blong Olgeta

GRIK tok blong talem “witnes” hemia martyr, mo Inglis tok ya “martyr” i kamaot long hem, we i minim “wan man we ded blong hem i givim witnes.” Plante Kristin blong faswan handred yia oli givim witnes long saed blong Jeova taem oli ded from bilif blong olgeta.

Long sem fasin, plante taosen Witnes we oli bin laef long ol yia 19 handred, oli ded long han blong ol man blong Hitler from we oli no wantem joen long politik mo ol narafala bisnes we i blong leftemap wan kantri. Ol Kristin ya, long taem blong yumi, oli ded from bilif blong olgeta, mo oli givim bigfala witnes tu. Samting ya i hapen i no longtaem long Swiden.

Taem oli selebretem 50 yia blong en blong Seken Wolwo, gavman blong Swiden i mekem wan kampen program blong tijim ol man long kantri ya long saed blong Holokos.a Oli kolem kampen ya se, Histri We i Laef. Ale, oli singaotem ol Witnes blong Jeova blong joen long kampen ya mo blong talemaot stori blong laef blong olgeta.

Ol Witnes oli agri long samting ya mo oli mekem wan eksposisen, blong soem ol pija, video mo ol toktok we ol man long pablik oli save lukluk mo harem. Nem blong eksposisen ya se, Ol Man Blong Holokos We Yumi Fogetem. Eksposisen ya i stat long Haos Asembli blong ol Witnes blong Jeova long taon blong Strängnäs. !Ol Witnes we oli laef tru long taem blong Holokos ya oli talemaot stori blong olgeta long bitim 8,400 man we oli kam long faswan dei blong eksposisen ya! Bifo long en blong 1999, oli soem eksposisen ya long bitim 100 musium mo pablik laebri long olgeta ples blong Swiden, mo samwe 150,000 man oli bin go lukluk. Long olgeta ya, i bin gat sam haeman blong gavman, we oli talem ol gudfala toktok from ol samting we oli bin luk.

I neva gat wan taem long Swiden we save long saed blong wok blong ol Witnes blong Jeova i kasem olgeta man blong pablik olsem hemia, mo mekem se ol man oli talem ol gudfala toktok from. Plante man we oli bin kam visit oli askem se: “?From wanem yufala i neva talem stori blong yufala long saed blong Holokos?”

!Afta we oli mekem eksposisen ya long eria blong wan kongregesen, ripot blong kongregesen ya i soemaot se ol Baebol stadi i go antap long 30 pesen! Wan Witnes i singaot wan woman we i wok wetem hem blong i kam lukluk eksposisen ya. Woman ya i glad blong kam mo hem i karem wan fren blong hem i kam wetem hem. Biaen, woman ya i talem se i had long hem blong kasem save olsem wanem ol man oli save gat strong bilif olsem, mekem se oli jusum ded i bitim we oli saenem pepa blong talem se oli lego bilif blong olgeta. Woman ya i storian moa wetem Witnes ya, nao hem i stat blong stadi Baebol.

Sem mak olsem ol man long ol faswan handred yia, ol Kristin ya blong ol yia 19 handred we oli ded from bilif blong olgeta, oli givim bigfala witnes se Jeova nomo i trufala God, mo i stret nomo blong yumi gat bilif we i no hafhaf mo stap tru long hem.—Revelesen 4:11.

[Futnot]

[Foto Credit Line blong pija long pej 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives