“Ol Beswan Magasin We Man i Save Ridim”

I NO longtaem i pas, olgeta we oli raetem Wekap! oli kasem wan leta long wan gel we i gat 18 yia, nem blong hem Lisel. Hem i stap long haeskul long Yunaeted Stet. Hem i raetem se:

“Mi mi stap mekem wan kos long histri. Tija i talem se mifala i mas mekem dip stadi long wan samting, nao mifala i mas raetem wan stori long hem. Ale, mi mi wantem raetem stori long saed blong ol Witnes blong Jeova, olsem wanem oli stanap strong tru long ol fasin agens blong ol Nasi long Jemani long taem blong Hitler. Plis mi askem long yufala blong sanem ol refrens we yufala i bin yusum long wan stori long Wekap! blong Julae 8, 1998, nem blong hem, ‘Ol Witnes blong Jeova—Oli No Fraet Long Raf Fasin Blong Ol Nasi.’ Yufala i stadi dip fastaem, nao yufala i raetem stori ya long fasin we i klia mo stret. Sipos mi save raet wetem jes haf blong ol filing mo trutok we i stap long Wekap! ya, bambae mi mi givim wan nambawan witnes long komiti we i mas jajem wok blong mi.

“Tangkiu we yufala i gohed oltaem blong wokem ol beswan magasin we man i save ridim. Long evriwan long olgeta, mi kasem ‘wan lesen blong raetem stori’ we i gud moa i bitim eni samting we mi stap lanem long skul. Samting ya i mekem se mi stap traehad moa long evri stori we mi raetem. Mi wantem we yufala i save se mi tinghae tumas long hadwok blong yufala.”

[Foto Credit Line blong pija long pej 14]

Center photo: Państwowe Muzeum Oświęcim-Brzezinka, courtesy of the USHMM Photo Archives