?From Wanem Ol Man Oli No Moa Soemaot Ol Gudfala Fasin?—?Baebol i Talem Wanem?

Tede, smol man nomo oli stap soemaot ol gudfala fasin long narafala. Ol sikman oli singaot strong long ol dokta; ol man we oli go kakae long restoron oli tritim nogud ol man we oli stap karem kakae i kam; ol pasenja long plen oli no obei mo oli stap tok nogud long olgeta we oli wok long plen; ol pikinini long skul oli mekem plante nogud samting olsem jikim, tritim nogud, mo atakem ol tija; mo sam man blong politik oli mekem plante kruked fasin, mo long semtaem sam narafala man blong politik oli traem soemaot se oli gat ol gudfala fasin.

Baebol nomo i save talem stret se gudfala fasin i minim wanem. Mo tu, hem i eksplenem from wanem tede plante man oli no moa mekem i gud long narafala.

?From wanem ol man oli no moa mekem i gud long narafala?

Raon long wol yumi luk klia we ol man oli no moa stap soemaot ol gudfala fasin, mo oli mekem plante rabis fasin.

• Wan ripot i soem se ol man Amerika oli harem olsem se long ol 22 yia we i pas, ol man long Yunaeted Stet oli no moa stap soemaot gudfala fasin long ol narafala olsem bifo.

• Long wan narafala ripot we oli mekem long 28 kantri long bitim 32,000 man, 65 pesen blong olgeta oli talem se fasin ya we man i no moa mekem i gud long narafala i stap kam mowas.

Baebol i bin talemaot ol fasin ya we yumi stap luk tede.

• “Long taem ya we bambae i klosap long Lasdei, laef long wol ya bambae i kam strong tumas. Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkiu, . . . oli no man blong gat sore long man, mo oli man blong mekem i strong tumas oltaem long ol narafala man.”—2 Timoti 3:1-3, Baebol Long Bislama.

Blong save moa olsem wanem profet tok ya i stap kamtru, ridim atikol ya “?Baebol i Talemaot Finis Tingting Mo Fasin Blong Ol Man Tede?”

Baebol i givhan blong save olsem wanem blong soemaot gudfala fasin

Nating se long wol ya ol man oli no moa stap soemaot gudfala fasin, be plante milian man oli faenem se Baebol i save givhan long yumi blong soemaot ol gudfala fasin. Ol gudfala advaes blong hem, “man i save dipen long olgeta oltaem, naoia mo blong olwe.” (Ol Sam 111:8) Hemia sam eksampol:

• Samting we Baebol i talem: “Olgeta samting we yufala i wantem blong ol man oli mekem long yufala, yufala tu i mas mekem long olgeta.”—Matiu 7:12.

  Mining: Yumi mas tritim ol narafala long kaen fasin mo wetem respek, sem mak olsem we yumi wantem se narafala i mekem long yumi.

• Samting we Baebol i talem: “From we yufala i tekemaot fasin blong giaman, yufala evriwan i mas tok tru long yufala.”—Efesas 4:25.

  Mining: Yumi mas tok tru long olgeta samting we yumi talem mo mekem.

Blong save moa, plis ridim:

• Wajtaoa ya “Gudfala Advaes—?Weples Yu Save Faenem?”

• Atikol ya “Respektem Tingting Blong Narafala—?Olsem Wanem Baebol i Save Givhan?”