Long Fulwol Fasin Blong Brekem Loa i Kam Antap Bigwan—?Baebol i Talem Wanem?

Ol rebel oli mekem bigfala trabol long Haiti. I gat bigfala trabol tu long Saot Afrika, Meksiko, mo ol narafala kantri long Latin Amerika. Be ol man we oli laef long ol ples we i no gat ol bigfala trabol olsem, olgeta tu oli stap wari mo oli harem se oli no sef, from we oli stap harem nius blong ol trabol olsem ol man oli stil, oli stap spolem ol ples, mo bonem ol samting.

?Baebol i talem wanem long saed blong fasin blong brekem loa we i stap hapen long fulwol?

Baebol i tokbaot fasin blong brekem loa

Baebol i tokbaot fasin blong brekem loa olsem wan saen blong soemaot se yumi stap laef long “lashaf blong sistem blong wol ya.” (Matiu 24:3) Taem Jisas Kraes i stap tokbaot ol saen ya blong las dei, hem i talem se:

• “From we fasin blong brekem loa i stap kam antap, lav blong plante moa man bambae i kam kolkol.”—Matiu 24:12.

Baebol i talem tu se “long ol las dei” ol man bambae “oli no save bos long tingting, oli wael olgeta, mo oli no laekem ol gudfala fasin.” (2 Timoti 3:1-5) Yes, fasin ya we man i tingbaot hem wan nomo, i mekem se fasin blong brekem loa i kam antap bigwan olsem we yumi stap luk tede.

Be i gat wan gudfala risen blong yumi gat hop. Baebol i promes se i no longtaem fasin blong brekem loa bambae i finis.

• “I no longtaem, ol man nogud bambae oli lus. Bambae yu lukluk i go long ples we oli stap long hem, be bambae oli no moa stap. Be ol man we oli gat tingting daon bambae oli tekem wol ya i blong olgeta, mo bambae oli glad tumas from oli gat pis we i bigwan tumas.”—Ol Sam 37:10, 11.

Traem save moa samting we Baebol i talem long saed blong hop ya, mo from wanem yumi save sua se ol samting we yumi luk tede oli stap mekem ol profet tok blong Baebol oli kamtru. Traem luk ol atikol ya.

“Trufala Hop Blong Wan Gudfala Fiuja”

“?Wanem Saen Blong “Ol Las Dei,” o “En Blong Wol”?”

“?Baebol i Talemaot Finis Tingting Mo Fasin Blong Ol Man Tede?”