Bigfala Faet Long Medel Is—?Baebol i Talem Wanem?

Ol man raon long wol oli wari taem oli luk bigfala faet we i stap gohed bitwin Yunaeted Stet, Isrel, mo Iran. ?Faet ya bambae i kam bigwan moa we i kasem plante moa kantri? ?Ol gavman oli naf blong stopem faet ya mo mekem se fulwol i gat pis?

Olgeta we oli save gud ol profet tok blong Baebol, oli save gat tingting ya se maet bigfala faet ya long Medel Is i stat blong faet ya Amagedon we buk blong Revelesen i tokbaot.

?Baebol i talem wanem?

?Ol gavman oli naf blong finisim bigfala faet ya long Medel Is?

Baebol i talem se: “Yufala i no mas trastem ol prins no wan pikinini blong man. Olgeta oli no save mekem wan samting blong sevem man.”—Ol Sam 146:3.

Yumi no save sipos ol gavman oli naf blong mekem se i gat pis long Medel Is o nogat. Be Baebol i talem klia se i no gat wan lida blong politik, o gavman blong man, o wan grup blong man, we i save finisim faet mo mekem se i gat pis olwe. God nomo i naf blong “finisim ol wo long olgeta ples long wol.”—Ol Sam 46:9.

• Blong save moa, ridim Wajtaoa ya we taetel blong hem se “Rod Blong Stopem Ol Faet”

?Bigfala faet ya long Medel Is, i stap mekem wan profet tok blong Baebol i kamtru?

Baebol i talem se: “Bambae yufala i harem se i gat ol faet mo yufala i harem nius blong ol faet. . . . Bambae ol nesen oli faet agensem ol narafala nesen, mo ol kingdom oli faet agensem ol narafala kingdom.”—Matiu 24:6, 7.

Bigfala faet ya long Medel Is, i wan narafala pruf we i soemaot se yumi stap laef long “lashaf blong sistem blong wol ya” we Baebol i singaotem tu se “ol las dei.” (Matiu 24:3; 2 Timoti 3:1) Ol faet we yumi stap luk tede oli soemaot se i no longtaem God bambae i tekem aksen blong finisim ol faet mo ol narafala problem we i stap mekem ol man oli safa.

• Blong save moa, ridim atikol ya “?Wanem Saen Blong “Ol Las Dei,” o “En Blong Wol”?”

?Amagedon bambae i stat long Medel Is?

Baebol i talem se: “Oli hivimap olgeta oli kam wanples long ples ya we long lanwis Hibru, oli singaot se Amagedon.”—Revelesen 16:16.

Bigfala faet ya Amagedon i no wan faet bitwin ol gavman blong man we bambae i stat long Medel Is. Be hem i wan faet bitwin ol gavman blong man mo God we bambae i hapen long fulwol.

• Blong save moa, ridim atikol ya “?Wanem Ya Faet Blong Amagedon?”

?Wanem i save givhan long yumi blong no wari tumas from ol samting we oli stap hapen?

Baebol i talem se: “Yufala i no mas wari tumas from eni samting, be yufala i mas askem olgeta samting we yufala i wantem long God. Yufala i mas prea long hem, yufala i mas krae i go long hem, mo yufala i mas talem tangkiu long hem.”—Filipae 4:6.

Jehovaa God i wantem se yumi prea long hem. From we God i kea long yumi, bambae hem i lesin long ol prea blong yumi mo i givhan long yumi blong dil wetem ol wari blong yumi. (1 Pita 5:7) Wan rod we Jehova i yusum blong halpem yumi, hemia taem hem i givhan long yumi blong kasemsave from wanem i gat ol faet, olsem wanem bambae hem i finisim ol faet ya, mo ol samting we i stap mekem yumi harem nogud mo safa.—Revelesen 21:3, 4.

• Blong save sam moa samting we God i mekem blong givhan long yumi, ridim atikol ya “?Baebol i Save Kamfotem Mi?.”