OL YANGFALA OLI ASKEM
?Mi Mas Save Wanem Long Saed Blong Ol Video Gem?
Ol kwestin long saed blong video gem
Long Yunaeted Stet, hemia ples we plante kampani we oli wokem ol video gem, oli stap winim plante bilian mane . . .
?Bighaf blong ol man we oli stap plei long ol video gem, oli gat hamas yia?
18
30
?Hamas man o woman oli stap plei ol video gem?
55 pesen blong ol man; 45 pesen blong ol woman
15 pesen blong ol man; 85 pesen blong ol woman
?Weswan long tufala grup ya i spenem moa taem blong plei ol video gem?
Ol woman we oli gat 18 yia i go antap
Ol man we oli gat 17 yia i kamdaon
Ansa (i folem wan statistik blong 2013):
B. 30.
A. Bitim 45 pesen, o klosap haf blong olgeta we oli stap plei, hemia ol woman.
A. 31 pesen blong olgeta we oli stap plei ol video gem, hemia ol woman we oli gat 18 yia i go antap, mo 19 pesen blong ol boe we oli gat 17 yia i kamdaon.
Ol statistik ya oli givim wan klia pija se hu nao i stap plei ol video gem. Be oli no tokbaot gud saed o nogud saed blong ol video gem, taem yu plei long olgeta.
Gud saed
?Weswan long toktok blong yangfala ya long saed blong ol video gem we yu yu agri long hem?
“Hem i wan rod blong harem gud mo joen gud wetem ol famle mo fren blong yu.”—Irene.
“Hem i wan naes wei blong rilaks.”—Annette.
“Oli givhan blong mekem tingting blong yu i wok kwik.”—Christopher.
“Oli halpem yu blong yu gat gudhan blong stretem wan problem.”—Amy.
“Oli mekem se yu yusum bren blong yu blong tingting, mekem plan, mo kasem wan mak.”—Anthony.
“Sam gem oli halpem yu blong wok gud wetem ol fren.”—Thomas.
“Sam gem oli mekem yu eksasaes mo givhan blong yu stap fit.”—Jael.
?Yu yu agri wetem sam long ol toktok ya o maet long evriwan? Ol video gem oli save givhan long tingting mo bodi blong yu. I no rong blong plei ol video gem nating se yu plei jes blong pasem taem nomo, o olsem we Annette i talem se “hem i wan naes wei blong rilaks.”
● Baebol i talem se “i gat taem blong evri samting we man i mekem long wol,” mo hemia i inkludum tu fasin ya blong spel mo pleplei.—Prija 3:1-4.
Nogud Saed
?Ol video gem oli stap kakae taem blong yu?
“Taem mi stat blong plei, i had blong mi stop. Oltaem mi stap talem long mi wan se: ‘!Wan moa level nomo!’ Be afta mi no moa luksave se ol aoa oli pas mo mi spenem plante taem long fored blong skrin.”—Annette.
“Ol video gem oli save kakae taem blong yu. Maet yu sidaon plante aoa, mo yu harem olsem se yu mekem wan gudfala samting from we yu winim faef level blong gem. Be blong talem stret, yu no mekem wan gudfala samting nating.”—Serena.
Stamba poen: Sipos yu lusum mane, maet bambae yu naf blong kasembak. Be hemia i defren taem yu lusum taem. Blong talem stret, taem i sas moa i bitim mane. !So yu no letem ol video gem oli kakae taem blong yu!
● Baebol i talem se: “Yufala i mas gohed blong wokbaot long fasin we i waes . . . mo yufala i mas yusum gud taem blong yufala.”—Kolosi 4:5.
?Ol video gem oli gat paoa long tingting blong yu?
“Ol man oli no fraet nating blong plei ol video gem we oli raf, we long ril laef i save ‘mekem’ se man i go long kalabus from o i save ded from.”—Seth.
“Long plante gem, yu mas winim ol enemi blong yu, blong yu save kasem mak blong yu. Mo plante taem, yu mas kilim olgeta long wan fasin we i nogud.”—Annette.
“Samtaem, maet bambae yu sek se yu talem long ol fren blong yu we yufala i stap plei se: ‘!Yu ded!’ o ‘!Bae mi kilim ded yu!’ ”—Nathan.
Stamba poen: Blokem enikaen gem we oli leftemap ol fasin we God i no laekem, olsem vaelens, ol doti fasin blong seks, mo wok blong ol rabis spirit.—Galesia 5:19-21; Efesas 5:10; 1 Jon 2:15, 16.
● Baebol i talem se Jehova “i no laekem nating eni man we i laekem faet”—i no jes man we i mekem vaelens. (Ol Sam 11:5) Ol video gem we yu jusum oli no soemaot se bambae yu yu kam wanem kaen man long fiuja, be oli stap soemaot se naoia yu yu wanem kaen man.
Blong tingbaot: Buk ya Getting to Calm i talem se: “Ol video gem we oli raf oli gat moa paoa i bitim samting we i kamaot long televisen, from we ol pikinini oli no jes wajem ol strong man blong faet, be olgeta nao oli ol strong man we oli stap faet. Ol video gem oli tijim yu olsem wan tija we i stap tij long klasrum, from samting ya oli tijim yu blong kam wan man blong faet.”—Skelem wetem Aesea 2:4.
Kambak long ril laef
Plante yangfala oli lanem blong yusum gud taem we oli spenem blong plei ol video gem. Traem luk tu eksampol.
“Bifo, mi stap plei ol video gem kasem let long naet, mo mi stap tingting se: ‘Mi nidim faef aoa nomo blong slip. Bae mi plei wan moa level nomo.’ Be naoia, mi lanem blong putum ol video gem long stret ples blong olgeta. Mi luk olgeta olsem wan gudfala samting we mi save mekem wanwan taem nomo blong spel mo pleplei. Be olsem evri narafala samting, mi mas skelem gud nomo.”—Joseph.
“!Taem mi spenem smoltaem nomo blong plei video gem, mi naf blong mekem plante samting! Mi kam gud moa long wok blong prij, mi halpem ol narafala long kongregesen, mo tu mi lanem blong plei piano. !I gat plante narafala samting blong mekem sipos yu no plei gem!”—David.
● Baebol i talem se wan man mo woman we i bigman long tingting “i mas kontrolem ol fasin blong hem.” (1 Timoti 3:2, 11) Oli laekem blong mekem ol samting blong spel mo pleplei be oli save tu wetaem blong stop, mo oli naf blong bos long tingting blong olgeta.—Efesas 5:10.
Stamba poen: Ol video gem oli save mekem yu harem gud nomo sipos yu jusum stret taem blong plei long olgeta. Yu no mas letem ol gem oli kontrolem taem blong yu o oli mekem yu no moa putum tingting blong yu long ol samting we oli moa impoten long laef. Blong talem stret, i gud moa sipos yu traehad blong kasem sam mak we oli save mekem yu win long ril laef, i bitim we yu tingbaot moa blong traem winim wan level long wan gem.