?From Wanem Mi Mas Blokem Ponografi?

?Yu yu naf blong blokem ponografi?

Sipos yu stap yusum intenet, tingbaot se maet i no longtaem o long fiuja bambae yu fas long sam kaen ponografi. Hayley we i gat 17 yia, i talem se: “Yu no moa nid blong go lukaotem. Hem nao i kam lukaotem yu.”

Ponografi i save kam wan traem tu long olgeta we oli gat strong tingting blong blokem. Greg we i gat 18 yia, i talem se: “Long tingting blong mi, mi stap talem se mi mas lukaot gud oltaem, be i no hapen olsem. Yu neva mas talem se bae i neva hapen long yu.”

Tede, i isi blong gat akses long ponografi i bitim bifo. Mo naoia wetem seksting, plante yangfala oli stap mekem mo sanem prapa ponografi blong olgeta.

Stamba poen: Yu stap fesem wan traem we i moa had i bitim hemia blong ol perens mo ol bubu blong yu, taem oli gat sem yia olsem yu. Be kwestin i stap se: ?Yu yu naf blong blokem ponografi?—Ol Sam 97:10.

Ansa hem i yes, sipos yu jusum blong blokem. Be fastaem yu mas bilif fulwan se ponografi i nogud. Naoia i gud yumi luk ol giaman tingting mo trutok long saed blong topik ya.

Ol giaman tingting mo trutok

Giaman tingting: Ponografi i no save spolem yu.

Trutok: Ponografi i save spolem tingting blong yu olsem we sigaret i save spolem ol lang blong yu. Hem i save posenem yu. Hem i save spolem samting ya we God i wokem, we i gat paoa blong joenem tu man blong tufala i save stap tugeta blong olwe. (Jenesis 2:24) Ponografi i save mekem tu se sloslo yu no moa wantem save long ol samting we i stret mo samting we i no stret. Eksampol, sam man blong stadi oli talem se man we i stap lukluk ponografi oltaem, plante taem hem i no wantem save taem man i mekem nogud long wan woman.

Baebol i tokbaot sam man se “oli no moa gat sem nating, nao oli stap gohed olbaot, oli stap mekem ol nogud fasin.” (Efesas 4:19) Tingting blong olgeta i no moa stikim olgeta, mo oli no harem nogud taem oli mekem wan samting we i no stret.

Giaman tingting: Ponografi i save tijim yu long seks.

Trutok: Ponografi i tijim yu blong tingbaot yu wan nomo. I mekem yu ting nating long ol narafala se oli olsem ol tul nomo, mo se oli stap jes blong mekem yu nomo yu harem gud. Yumi no sapraes we wan stadi i soemaot se ol man we oli gat fasin ya blong lukluk ponografi, oli no harem gud fulwan long seks afta we oli mared.

Baebol i talem long ol Kristin se oli mas sakemaot “enikaen doti fasin blong seks, ol doti samting, ol rabis fasin blong seks we i bitim mak, wantem tumas ol samting we oli nogud, mo griri fasin.” Hemia olgeta fasin we ponografi i pulum man blong mekem.—Kolosi 3:5.

Giaman tingting: Olgeta we oli blokem ponografi oli sem nomo blong tokbaot seks.

Trutok: Ol man we oli blokem ponografi, oli tinghae long seks. Oli luk seks olsem wan presen we God i krietem, blong mekem wan man mo woman we i mared tufala i joen gud mo stap tru long tufala. Olgeta we oli gat tingting olsem, bambae oli harem gud fulwan long seks afta we oli mared.

Baebol i tok tru long saed blong seks. Eksampol, hem i talem long ol hasban se: “I gud yu harem gud long waef blong yu we yu mared wetem taem yu yangfala . . . I gud lav blong hem i holemtaet yu oltaem.”—Ol Proveb 5:18, 19.

?Olsem wanem blong blokem ponografi?

?Olsem wanem sipos yu harem se i had blong blokem fasin ya blong lukluk ponografi? Pepa ya blong fulumap “How to Reject Pornography” i save halpem yu.

Yu save sua se yu naf blong blokem fasin ya blong lukluk ponografi. Mo tu, sipos yu stat naioa blong no moa lukluk ponografi, yu stap lanem blong stopem fasin ya. Yu gat evri samting we yu nidim, we i save halpem yu blong mekem olsem.

Tingbaot Calvin we i stat blong lukluk ponografi taem i gat samwe 13 yia. Hem i talem se: “Mi save se i no stret, be mi no save sakemaot tingting ya blong wantem lukluk ponografi. Mo afta we mi lukluk, mi harem se i no stret nating. Be biaen, papa blong mi i faenemaot. !Blong talem stret, long taem ya mi harem se mi kamfri! Mo mi naf blong kasem help we mi nidim.”

Calvin i lanem blong blokem ponografi. Hem i talem se: “Mi mekem wan bigfala mastik taem mi lukluk ponografi, from we naoia ol pija ya oli stil kambak long tingting blong mi. Mo samtaem, mi wantem tumas blong pijarem samting we mi save lukluk sipos mi lukluk ponografi bakegen. Be biaen, mi tingbaot se taem mi mekem samting we Jehova i wantem, mi mi glad, tingting blong mi i klin, mo mi save gat wan gudfala fiuja.”