?From Wanem Oli Smok?

“Nating se mi stap smok, be mi mi agri se fasin ya i krangke nomo. Evriwan we i save tingting, i save gud se man we i smok hem i spolem bodi blong hem. Fasin ya i doti, i rabis mo i mekem man i spenem plante mane. . . . Plante taem, man we i smok i harem nogud from ol doti plet blong putum sigaret, ol mak blong nikotin, ol mak blong sigaret we i bonem klos mo hem i mas givim fulap mane blong klinim ol klos we oli smel nogud from tabak.”—Diane Francis, magasin Maclean’s, Kanada.

“Man we i no smok, i laef longtaem moa i bitim man we i smok. Olsem nao, man we i gat 25 yia blong hem mo i smok 2 paket sigaret evri dei, i mekem laef blong hem i sot long bitim 8 yia. Namba blong olgeta we oli save ded long kansa from we oli smok, i bitim 3 taem namba blong olgeta we oli no smok.”—The Columbia University College of Physicians and Surgeons Complete Home Medical Guide.

“Evri yia ol sigaret oli kilim i ded plante man Amerika, i bitim namba blong olgeta we oli ded long trifala faet ya: Faswan Bigfala Faet Blong Wol, Wo blong Koria mo blong Vietnam. I min se namba ya i kolosap sem mak long namba blong ol man Amerika we oli ded long Namba Tu Bigfala Faet Blong Wol. Evri yia sigaret i kilim i ded faef taem moa man Amerika, i bitim namba blong olgeta we oli ded long akseden long trak. Namba blong ol man we oli ded long kansa blong waetleva, i sem mak long namba blong olgeta we oli ded long trak. Bisnes blong sigaret i kilim plante man i ded. Sigaret i olsem tul blong faet nomo.” (Robert F. Kennedy, long Faswan Konfrens blong Wol Long Tabak mo Helt, Septemba 11, 1967)—The Cigarette Underworld, blong Dokta Alan Blum.

“Evri yia tabak i kilim i ded samwe long tu mo haf milyan man raonabaot long wol. Sipos ol man oli wantem, i isi nomo blong oli blokem samting ya mo oli sevem olgeta. Be ol man ya oli no wantem. . . . Tabak i spolem bodi, i sas mo i holemtaet man.”—Dokta Judith Mackay, daerekta blong Kaonsel blong Hong Kong long Tabak mo Helt. Tok ya i kamaot long wan magasin (World Health).

“I tru se bisnes blong tabak i givim mane long mi bifo. Be long semtaem, bisnes ya i kilim i ded plante milyan man mo bambae plante milyan man oli mas ded sipos oli no luksave ol trabol we oli save kasem from sigaret. . . . Mi wantem halpem ol man blong oli luksave se ol sigaret oli posen stret.”—Patrick Reynolds, smol bubu blong man we i statem R. J. Reynolds Tabak Kampani.

?Be from wanem nao plante milyan man, woman, mo yangfala oli smok tabak? Oli mekem olsem from we narafala i pulum olgeta mo oli wantem se man i luk gud long olgeta. Be plante oli smok from we taem oli stat smok, be biaen oli no moa save lego. Wan dokta i talem se: “Plante taem ol man oli stap smok from i gat wan strong drag i stap long tabak, nem blong hem nikotin. Nao ol man oli no save lego fasin ya.”

?Olsem wanem nao man i save lego sigaret? Wan samting we i strong moa i bitim paoa blong nikotin, i mas pulum olgeta. Man we i traehad blong folem ol Kristin loa, i mekem lav blong hem i gru blong bambae hem i laekem moa God mo ol man raonabaot long hem. Samting ya i save givhan long hem blong winim nogud fasin ya.—Matyu 22:37-40; 1 Korin 13:5, 7, 8.

Buk ya we yumi tokbaot finis i talem se: “Man we i wantem lego smok, i mas rimemba se nikotin i wan drag we i holemtaet hem. Sipos hem i stop blong no moa smok, hem i mas save se bambae hem i harem nogud long bodi blong hem from we hem i wantem smok tumas. Samting ya i mas kamaot olsem. Nating se hem i harem nogud smol olsem, be samting ya i no save spolem bodi blong hem. Nating se wan man i smok tabak tumas no no gat, be evriwan oli save lego smok.”—The Columbia University College of Physicians and Surgeons Complete Home Medical Guide.

Ating yu yu no moa wantem smok, mo yu yu nidim help blong gat strong tingting fastaem. Sipos i olsem, yu save luk ol Wetnes blong Jeova we oli stap long Haos-Kingdom blong olgeta kolosap long haos blong yu, no yu save raetem leta i go long ol man we oli wokem magasin ya.