Myusek Blong Tede Stap Longwe Long Ol Trap Blong Hem
SAM man oli tokbaot ol gudfala samting mo ol nogud samting we i save kamaot from fasin blong jekemap ol rok myusek bifo we oli salem. Sam narafala man oli talem se rok myusek i gat paoa blong spolem ol yangfala. Be sipos yu yu wan Kristin, faswan samting yu save tingbaot bifo we yu tekem wan kaset blong lesin: ?Olsem wanem myusek i save spolem fasin fren blong yu wetem God?
Tok blong God Baebol, i stap lidim laef blong ol Kristin man. Insaed i gat ol rul long evri samting long saed blong laef, long saed blong pleplei tu. Ol rul blong Baebol oli stap lukaot gud long olgeta we oli obei long hem blong oli no mekem samting we i nogud mo no kasem samting we i save mekem olgeta oli harem i soa. Antap moa, God i save glad long yumi sipos yumi obei long Tok blong hem. Taswe, ol rul long Tok blong God oli mas lidim wan Kristin blong jusumgud ol myusek blong hem. (Ol Sam 43:3; 119:105; 2 Timote 3:16, 17) ?Nao, wanem ol vas ya blong Baebol we oli save givhan long yumi blong jusumgud ol myusek blong yumi?
Nidim Stret Tingting
Eklesiastis 7:16 i givim woning se: “I nogud yu kam stret tumas, we yu bitim mak long stret fasin. Mo i nogud yu kam waes tumas, we yu bitim mak long waes. ?Weswe yu yu spolem yu wan olsem ya?” Bifo we yu talem se wan myusek i nogud, askem yu wan sipos kaset ya maet yu wan nomo yu no haremgud long hem. Tingbaot, maet yu no laekem wan myusek, be samting ya i no mekem myusek ya i kam wan nogud myusek.
Be Eklesiastis 7:17, 18 i tokbaot narafala woning long bisnes ya blong gat stret tingting se: “Yu no mas kam rabis bitim mak, mo yu no mas kam krangke. ?From wanem bambae yu ded taem yu no kasem prapa taem blong yu yet? I moa gud we yu holemtaet samting ya, be yu no mas tekemaot han blong yu long narawan; from man we i fraet gud long God bambae i wokbaot i go wetem olgeta evriwan.”
Nao, ?olsem wanem sipos wan Kristin i lesin long ol myusek we oli leftemap fasin blong faet, fasin blong no laekem ol man blong narafala kantri, fasin blong seks, fasin blong wosip long Setan, mo fasin we man i kilim hem wan i ded? Efesas 5:3, 4 i talem klia se: “From we yufala i tabu, yufala i man blong God, i no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman, mo fasin blong man we i wantem evri samting, bambae yufala i no tokbaot. Mo i no stret blong yufala i yusum ol rabis tok, mo ol krangke tok, mo ol tok plei we i nogud. I stret blong yufala i stap talem tangkyu long God.” Yes, ol man we oli wantem frengud wetem Jeova oli no save mekem ol doti bisnes i kam olsem pleplei blong olgeta. Bambae oli no save ting se from oli no mekem ol rabis samting ya, hem i gud nomo blong lesin long myusek ya.
I no ol toktok nomo blong wan singsing we i mekem singsing ya i gud no i nogud folem samting we i stap long Baebol. ?Hem i leftemap wanem kaen tingting? Plis ridim Galesia 5:19 kasem 23 long Baebol blong yu. ?Wanem ol tok we oli soemaot gud tingting blong myusek we yu stap lesin long hem? Sipos myusek ya i soemaot “fasin blong ol man we oli stap mekem ol rabis samting we tingting blong olgeta i wantem,” ale tingting blong Jeova i kliagud long samting ya.
Sipos wan Kristin i traem blong joenem laef blong hem we hem i stap yusum blong mekem tabu wok blong God wetem ol rabis myusek, bambae hem i luksave se hem i no save joenem ol samting ya nating. Samting ya i olsem we hem i stap dring wan glas jus we i gat posen insaed. Jus nomo i no save blokem posen ya blong i no kilim yu i ded. Ol tok ya long 2 Korin 6:14-17 i mekem i klia se: “Bambae yufala i no go joen wetem ol hiten man blong mekem wok, we yufala i karem haf, olgeta oli karem haf. Fasin ya i no save stanap. ?Olsem wanem stret fasin mo rabis fasin, tufala i save mekem fren? ?Olsem wanem delaet mo tudak, tufala i stap wanples? ?Olsem wanem Kraes mo Setan, tufala i save agri? ?Olsem wanem man we i bilif mo man we i no bilif, tufala i save joen long wan tingting? . . . Hae God i talem se, ‘From samting ya, yufala i mas gowe long olgeta, yufala i mas stap yufala nomo, olgeta oli mas stap olgeta nomo. Yufala i no save go joen long ol samting ya we oli no klin.’ ”
Ale, hemia nao sam vas long Baebol we oli go stret long olgeta we oli wantem frengud wetem God. Sipos yu tinghae long ol rul blong Baebol, skelemgud mo luklukgud ol myusek we yu stap lesin long hem. Tekem taem blong skelem ol video mo ol myusek we yu yu gat. Sakem olgeta ya we oli daonem ol rul blong Baebol. Sipos yu no sua long olgeta, sakem olgeta nomo. I sem mak long ol konset mo ol buk we yumi stap ridim—sakemaot eni samting we i no laenap gud wetem stret fasin.
Tingting Blong Mekem Eskyus
Sipos myusek we i bitim mak no i no laenap wetem ol rul blong Baebol i pulum yu, maet i hadwok long yu blong skelem myusek wetem stret tingting. Samfala oli mekem ol eskyus blong traehad blong soemaot from wanem oli no folem ol gudfala rul. Sipos yu save se yu stap mekem samting ya, yu stop mo yu tingting. ?Tingting blong yu i stret, no i rili soemaot wan filing we yu gat long myusek ya? Skelemgud ol tok ya we sam man oli bin talem mo makemgud se, taem yumi skelemgud, ol tok olsem oli ol eskyus nomo.
I moa gud long mi blong lesin long grup ya from ol memba blong hem oli agensem fasin blong yusum drag. ?Be grup ya i strong blong agensem ol narafala fasin nogud, olsem fasin blong slip olbaot, fasin blong faet, mo fasin blong no gat respek long gavman? Galesia 5:9 i talem se, “Smol is nomo, be i naf blong mekem olgeta bred i solap.”—Ridim Jemes 2:10.
Laef long wol ya i no stret nating. ?Yumi rili save putum fol long ol grup ya from tok blong olgeta we i agensem laef blong wol? Baebol i strong blong tok agens long ol fasin nogud blong wol ya be hem i soemaot se Kingdom blong Mesaea nomo i save winim ol samting ya.—Daniel 2:44; Matyu 6:9, 10.
Nambawan hop blong ol Kristin i defren long krangke tingting blong plante man blong plei myusek we oli talem se fasin blong brekem loa i wan rod blong winim trabol long wol ya. Yes, fasin kros blong wol ya i nogud olgeta mo i olsem fasin blong wael anamol nomo, i stap soemaot waes blong wol ya nomo.—Rom 12:9; Jemes 3:15-18.
Ol man we oli plei long myusek ya oli gat gudhan blong plei, oli bin trengud blong plei myusek. Be waes fasin we ol man blong plei myusek oli soemaot i narafala samting long fasin blong skelem ol tingting insaed long ol myusek wetem ol rul blong Baebol. King Solomon i gat gudhan blong mekem plante samting, wetem fasin blong plei myusek tu. Be taem hem i tanem baksaed long trufala wosip, Baebol i talem se, “Jeova i kros long Solomon, from hat blong hem i lego Jeova.” Mo tu, Nimrod i gat gudhan blong bildim haos mo blong ronem ol wael anamol, be God i no glad long hem mo long ol man blong hem. ?From wanem? From we Nimrod i “wan strong man blong ronem anamol blong kilim olgeta, we hem i agensem Jeova.”—1 King 11:9; Jenesis 10:8, 9, NW.
Sam long ol singsing blong grup ya oli gud nomo, hemia wetem sam singsing we oli no singsing strong tumas. Denja long ples ya se wan tun we i gud i save mekem wan man i pem wan albam mo i lesin long hem fulwan, we maet plante long olgeta oli save spolem tingting. Olsem wan kap wora i no save wasemaot wan hif long sofmad, wan singsing we i gud nomo i no save jenisim tingting blong wan albam no wan grup blong man blong plei myusek we oli nogud.
Ol man we oli plei long myusek ya oli no rili wosip long Setan no mekem rabis fasin blong seks long laef blong olgeta. Oli stap plei nomo long platfom. Wan samting se myusek we oli yusum blong mekem ol man we oli lesin long olgeta oli haremgud, i gat smol samting we i nogud long hem, sipos no i fulap wetem ol nogud samting. Kolosi 3:8 i talem long ol Kristin, blong no lesin long ol samting olsem fasin blong kros mo ol doti tok, be blong “putumaot ol fasin ya.” Pol i talem long ol man Efesas blong “oli no go joen long ol man we oli stap mekem ol rabis fasin ya [we oli no save obei long God] we oli blong tudak nomo, mo oli no gat frut blong olgeta. Oli mas tekem ol man ya oli kam long delaet.’ ?Wan man we i stap folem ol wok blong tudak i save stretem wan man we i stap mekem ol fasin ya?—Efesas 5:6, 11.
Mi no lesin long ol samting we oli stap talem. Mi lesin long myusek nomo. Be samting we oli stap talem oli save stap long tingting mo oli save mekem ol trabol biaen. Nating we yumi ting se ol tok ya oli no moa stap long tingting blong yumi, yumi no save fogetem nating. Taswe, i denja tumas blong lesin long ol mesej we oli agensem advaes we i stap long Filipae 4:8, se yumi mas putum tingting blong yumi i stap strong long ol fasin we oli klingud, mo ol fasin we oli mekem yumi i haremgud mo ol fasin we ol man oli stap ona long olgeta.
Mo tu, tingbaot se “man we i stap folem ol fasin blong wol, olsem we i stap fren wetem olgeta, wantaem nomo hem i mekem bad fren long God.” Hemia from we wol ya blong olgeta man i stap longwe long God mo ol tingting blong wol ya oli kamaot long nambawan Enemi blong Jeova, Devel Setan. Nao tingbaot samting ya. ?Bambae wan man i glad sipos waef blong hem i putumap foto blong man we i fren wetem hem bifo nating sipos woman ya i talem se hem i no gat spesel filing long man ya be pija ya i blong flasem haos nomo? No gat, hem i wantem se bambae pija ya i aot long haos mo i aot long tingting blong woman blong hem. ?Olsem wanem sipos yumi tekem myusek we i leftemap plan blong Enemi blong Jeova i kam long haos no long hat blong yumi? ?Olsem wanem long tingting blong Jeova sipos yumi talem se, “Mi mi intres long myusek blong hem nomo; mi no lesin long ol samting we oli stap talem”?—Jemes 4:4; 1 Korin 10:21, 22.
Mekem Disisen
Sipos yu bin lesin long ol myusek we oli leftemap ol rabis fasin, ?from wanem yu mekem samting ya? Maet yu no agri wetem ol nogud tingting ya, be maet yu haremgud long myusek blong hem—oli kilim dram plante taem, i pulum filing—we yu harem se i had blong agensem mo yu no wantem lego.
Be oltaem i no isi blong mekem ol samting we oli stret. Yumi kasem traem taem ol rul blong God oli soem se yumi mas lego samting we i pulum filing blong yumi. ?Bambae yumi gyaman se rod blong yumi i stret mo yumi gohed blong “stanap long tu defren tingting,” no bambae yumi mekem disisen blong agensem ol samting we Jeova i no laekem?—1 King 18:21.
Nating se yumi mas lego wan bigfala samting, bambae yumi glad moa sipos yumi mekem disisen we Jeova i glad long hem. Samting ya i minim se yumi no mas tajem ol samting we oli no klin. Sipos yumi mekem olsem, Jeova i promes se bambae hem i tekem yumi. Yes, bambae yumi stap long medel blong ol man we hem i glad long olgeta.—2 Korin 6:17.
Jeova i wantem mekem i gud long yumi. Hem i givim ol loa blong hem blong mekem laef blong yumi i kam moa gud. Lesin long tok blong hem olsem i stap long Aesea 48:17, 18. “Mi, Jeova, mi mi God blong yu, God ya we i stap tijim yu blong givhangud long yu. Mi mi stap mekem yu wokbaot long rod ya we yu yu mas wokbaot long hem. !Mi mi wantem tumas we yu lesingud long ol oda blong mi! Sipos yu mekem olsem, bambae pis blong yu i kam olsem wan bigfala reva, mo stret fasin blong yu bambae i kam olsem ol wef blong solwora.”
[Bokis/Foto blong pija long pej 10]
Responsabiliti Blong Ol Papa Mama
Sipos yu yu wan papa no wan mama, Baebol i talem se yu gat responsabiliti blong tijim ol pikinini blong yu blong luksave ol gudfala myusek mo ol rabis myusek. Samting ya i minim se yu mas savegud ol myusek we oli stap lesin long hem. I minim se yu mas putumap sam rul long saed blong wanem myusek bambae yu letem i kam long haos mo wanem myusek bambae yu blokem.
Toktok gud wetem ol pikinini blong yu. Stap longwe long ol rao we oli save spolem fasin blong luksave ol trufala samting long saed blong bisnes ya. Ol tok olsem, “Mi no kasem save from wanem yu stap lesin long doti samting ya,” bambae i pusum ol yangfala blong gohed moa blong jusum ol samting we olgeta nomo oli wantem. Maet fasin blong daonem wanwan stael blong laef blong wan man blong plei myusek i no save mekem olgeta oli luksave, antap moa sipos myusek ya i no tokbaot samting ya. Wan yangfala man i talem se: “!Mi ting se sipos wan man i talem se olgeta rap myusek oli nogud hem i no gat save!”
Taswe yu mas save long ol samting ya. Faenemaot wanem tingting blong God long ol bisnes ya. Ol Wetnes blong Jeova oli glad blong givhan long yu wetem ol buk we i stanap long Baebol we i eksplenemgud bisnes ya. Save gud ol trufala samting long saed ya. Mekem i klia long ol pikinini se impoten samting hemia ol rul blong Baebol mo i no se yu stap fosem ol prapa tingting blong yu long olgeta.—Efesas 6:4.
[Tok blong pija long pej 9]
Sipos wan Kristin i lesin long ol rabis myusek, ?hem i save givim advaes long ol narafala blong no mekem samting ya?
[Tok blong pija long pej 11]
Bambae yu glad moa sipos yu sakemaot ol samting we Jeova i no laekem