Holem Stret Tingting Long Saed Blong Miusik
TEDE ol kampani blong miusik oli ol bisnes we oli winim plante bilyan vatu. Ol man blong miusik we plante man i save gud olgeta, mo ol masta we oli stap pem olgeta, oli stap kasem bigfala mane. Nating se i olsem, laef blong ol nambawan man ya blong plei miusik i no hapi, plante long olgeta oli ded bifo we oli kam olfala, mo oli karemaot laef blong olgeta wan. Mo i gat plante pruf finis we oli soemaot se sam miusik oli daonem ol gudfala fasin, filing, mo tingting long saed blong spirit, mo oli save pulum man blong gat fasin we i raf mo blong no joengud wetem ol narafala.
Be, i gud blong skelem tingting blong yumi long saed blong miusik. I tru se, i gat plante samting we oli no stret mo we oli rabis long saed blong sam miusik, be i gat sam miusik we oli save mekem laef blong wan man i kam moa gud mo i save karem glad mo mekem man i harem gud. Miusik i save leftemap yumi long saed blong filing mo long saed blong spirit. Tingbaot sam long ol eksampel ya.
Olgeta 150 sam long Baebol oli wan long ol beswan wok we man i bin raetem. Insaed long ol sam ya i gat ol naesfala toktok, ol tabu singsing, mo ol prea. Tede, plante man oli save ridim ol sam ya long plante handred defren lanwis. Be, ol man Hibru blong bifo oli no jes ridim ol sam ya; oli singsing long olgeta. Oli mekem samting ya wetem naesfala miusik we oli plei folem. Hemia wan nambawan rod blong mekem waes blong God, Jeova, we i stap long ol tok blong singsing ya, i kasem filing blong ol man we oli lesin, tru long voes blong ol man ya we oli tren gud blong sing. Ol singsing ya oli no isi tumas mo oli no kamaot olbaot nomo. I luk olsem se nambawan fasin mo stael blong miusik blong ol man Hibru i moa hae bitim hemia blong ol nesen we oli stap raonabaot long olgeta long taem ya.
Biaen, ol Kristin blong faswan handred yia oli singsing long ol sam mo ol tabu sing blong presem God, mo blong karemaot ol filing blong wari. Taswe miusik i wan rod we oli yusum blong mekem i gud long laef blong olgeta. Mo taem oli singsing long ol sing blong Baebol, oli putum save blong God i go dip insaed long hat blong olgeta. Hemia save we oli nidim blong lidim laef blong olgeta.—Matiu 26:30; Ol Wok 16:25.
Ol man Grik blong bifo, oli bilif se miusik i save bildimap fasin blong man mo woman mo mekem se oli kam moa gud. Long wol blong yumi naoia, edukesen i tijim ol man bigwan long saed blong sayens, ekonomik, mo stadi long saed blong tingting nomo, nao, man i no moa lanem ol fasin we oli blong bildimap filing.
Stap Skelgud
Fasin blong lesin long wan naesfala miusik i save mekem i gud long yumi mo hem i save givim glad. Be, wan man i save kasem moa glad, taem hem i plei long wan tul blong miusik no i singsing wetem wan grup blong fren. Fasin blong save gud olsem wanem blong plei miusik i wan rod blong kasem bigfala glad.
Tru tumas, olsem evri gudfala samting long laef, miusik tu hem i wan samting we i nidim se yumi no bitim mak long hem, yumi skelem gud, mo yumi jusum gud hem. Hemia i no long saed blong miusik we yumi jusum nomo, be hem i long saed blong taem we yumi spenem blong lesin no plei long miusik tu.
Sipos i gat wan kaen miusik we i mekem filing blong yu i kam nogud, i stap pusum yu blong mekem nogud samting, mo i pulum yu blong no moa fren gud wetem ol narafala, naoia yu mas jusum wan narafala stael blong miusik. Yu mas blokem sora blong yu blong blokem ol nogud filing mo blong blokem hat mo tingting blong yu long ol nogud samting.
Hemia i tru tumas long saed blong ol tok blong miusik. Ol tok ya, oli save stat blong jenisim yu folem tingting blong ol man ya we oli no gat sem tingting olsem yu long saed blong laef mo ol fasin. Maet ol man ya oli leftemap ol fasin we God i no laekem, mo ol rabis fasin long laef. Samtaem, taetel blong singsing nomo i save pusum man blong gat ol nogud filing.
Tok blong God, Baebol, i givim woning long olgeta we oli wantem mekem God i glad se, “[oli] mas givim olgeta laef blong [olgeta] i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem. Hemia nao prapa wosip we i stret nomo blong [oli] mekem long hem.” (Rom 12:1) I klia se, ol filing blong yumi oli wan haf blong ‘sakrefaes ya we i laef.’ Taswe, sipos yumi faenem se paoa blong miusik i stat blong kavremap ol gudfala tingting blong yumi blong yumi no moa skelem gud ol samting, mo i stap lidim yumi long ol rabis fasin, naoia nao hem i taem blong jenisim fasin blong yumi blong lesin long miusik. Rimemba se: Miusik i save gat paoa long hat mo tingting blong yu, hem i save givhan long yu no i save spolem yu.
[Bokis/Foto blong pija long pej 10]
Mekem Fasin Blong Lanem Samting i Kam Gud Moa
“Ol stadi oli soemaot se wan bebi we oltaem i harem wan miusik we i gat gudfala saon, samting ya i save mekem se fasin blong hem blong lanem samting i kam gud moa. Be long plante famle, ol pikinini oli neva harem wan gudfala miusik.”—Audio, Maj 1999.