?Yu Yu Save?

?Miusik i impoten olsem wanem long Isrel bifo?

MIUSIK i wan impoten samting long kalja blong Isrel bifo. Plante taem Baebol i tokbaot ol man we oli plei long ol instramen mo oli singsing. Blong talem stret, bighaf blong Baebol hemia ol singsing nomo, olsem buk blong Ol Sam, Sing Blong Solomon, mo Ol Krae. Taswe, buk ya Music in Biblical Life i talem se, Baebol “i soemaot klia se ol man Isrel oli yusum miusik long plante defren samting long laef.”

Miusik long evri haf blong laef blong olgeta. Ol man Isrel oli plei miusik mo singsing, blong soemaot filing blong olgeta. (Aes. 30:29) Ol woman oli plei tamborin, oli singsing, mo oli danis long taem we oli putumap ol king o kwin, long taem blong ol lafet, mo taem ol man oli win long faet. (Jaj. 11:34; 1 Saml. 18:​6, 7; 1 King 1:​39, 40) Ol man Isrel oli singsing sore tu blong soemaot filing blong olgeta long taem blong ded. (2 Kron. 35:25) Buk ya McClintock and Strong’s Cyclopedia i talem se, “i klia se ol man Isrel oli laekem miusik tumas.”

Miusik long haos blong king. Ol king long Isrel oli laekem tumas miusik. King Sol i singaot Deved i kam long haos blong hem, blong i wok olsem wan man blong plei miusik. (1 Saml. 16:​18, 23) Biaen, taem Deved i kam king, hem i wokem sam miusik, i raetem sam naesfala singsing, mo i mekem plan blong ol man oli plei miusik long tempol blong Jehova. (2 Kron. 7:6; Amos 6:5) King Solomon tu i gat plante man mo woman we oli stap singsing long pales blong hem.—Pri. 2:8.

Miusik long wosip. Impoten samting we ol man Isrel oli yusum blong wosipim Jehova, hemia miusik. I gat 4,000 man we oli stap plei miusik insaed long tempol long Jerusalem. (1 Kron. 23:5) Oli plei long ol simbol, ol instramen we i gat string, hap, mo trampet. (2 Kron. 5:12) Be i no ol man ya nomo we oli gat gudhan blong plei miusik we oli yusum miusik blong wosipim Jehova. Taem ol man Isrel oli stap travel i go long Jerusalem blong mekem ol lafet, oli stap sing long singsing ya we taetel blong hem, Wan Singsing Blong Go Antap. (Sam 120-134) Mo folem raeting blong ol man Jiu, ol man Isrel oli singsing long Ol Halel Sama long taem blong kakae blong Pasova.

Miusik i impoten yet long ol man blong God. (Jem. 5:13) Singsing i wan haf blong wosip blong yumi. (Efes. 5:19) Taem yumi joen wetem ol brata mo sista blong singsing, hemia i mekem yumi kam ol gudfala fren. (Kol. 3:16) Mo i givim paoa long yumi tu, taem yumi fesem ol hadtaem. (Wok 16:25) Miusik i wan gudfala rod blong soemaot bilif mo lav we yumi gat long Jehova.