Miusik We i Mekem God i Glad

Ol man oli bin tokbaot miusik olsem “wan samting we i stat longtaem bifo mo i beswan samting we man i gat gudhan blong mekem.” Olsem lanwis, miusik i wan nambawan presen we i mekem se man i defren olgeta long ol anamol. Miusik i pulum filing blong ol man. Hem i save mekem man i glad mo i save stap longtaem long tingting blong man we i harem. Antap long ol samting ya, miusik i save mekem God i glad.

BAEBOL i soem se ol man Isrel oli ol man we oli intres tumas long miusik. Unger’s Bible Dictionary i talem se, miusik i “wan impoten samting we ol man long taem blong Baebol bifo oli gat gudhan blong mekem.” Evri dei, long laef blong olgeta, oli singsing mo oli plei long tul blong miusik long wosip blong olgeta. Be miusik we i gat voes blong man, hemia nao oli yusum moa.

King Deved i jusumaot sam man long laen blong ol Livaet blong “lidim ol kwaea” long haos prea, bifo we oli dediketem tempel we pikinini blong hem, Solomon, i bildim. (1 Kronikel 6:31, 32) Taem bokis blong kontrak, we i saen blong soem se Jeova i stap, i kam kasem Jerusalem, Deved i jusumaot sam long ol Livaet blong ‘oli prea long God mo talem tangkiu long hem, mo presem hem.’ Oli singsing blong presem God, nao oli stap plei long “gita,. . . bras simbol. . . [mo oli stap] blu long trampet.” “Oli jusumaot olgeta [ya] blong oli stap singsing blong presem Hae God from fasin ya blong hem we oltaem hem i stap lavem ol man gogo i no save finis.”—1 Kronikel 16:4-6, 41; 25:1.

Plante taem, tok ya, “fasin ya blong Hae God we oltaem hem i stap lavem ol man gogo i no save finis,” i kamaot long Ol Sam, wan buk blong Baebol we i joen wetem miusik bitim ol narafala buk long Baebol. Eksampel, tok ya i stap long en blong olgeta wanwan 26 vas blong Ol Sam namba 136. Wan man blong stadi long Baebol i talem se: “Tok ya i sot nomo, mekem se i isi blong ol man oli talem. Evriwan we oli harem tok ya, oli save rimemba.”

Ol tok we oli stap long stat blong Ol Sam oli soemaot se oli yusum plante defren tul blong plei miusik. Ol Sam 150 i tokbaot pupu, hap, tamborin, paep, mo ol simbol, wetem ol narafala tul blong plei miusik we i gat string long hem olsem gita. Be nating se i gat ol tul ya, nambawan samting long miusik hemia voes blong man. Vas 6 i talem se: “Yumi olgeta samting we yumi gat laef, yumi evriwan i mas presem hem. !Oltaem yumi mas presem Hae God!”

From we miusik i soemaot filing blong yumi, sam man long Baebol we oli harem nogud, oli wokem ol singsing blong sore no oli ol krae. Be long ol singsing olsem, oli man Isrel oli no yusum plante stael blong miusik. Ensaeklopedia ya blong Baebol, Insight on the Scripturesa i talem se: “Long ol singsing blong sore, oli singim nomo ol singsing we i folem sem tiun mo oli no talem ol tok we oli strong.”

Jisas mo ol trufala aposol blong hem, oli singsing blong presem Jeova long naet bifo we Jisas i ded. I sua se oli singim wan singsing we ol tok blong hem oli stret wetem ol Halel Sam. (Ol Sam 113-118) !Samting ya i mas mekem ol disaepol blong Jisas oli kam strong blong fesem taem ya we oli lusum Masta blong olgeta! Antap long hemia, faef taem, oli singim tok ya se, “oltaem bambae hem i lavem yumi gogo i no save finis.” I sua se samting ya i mas mekem tingting blong olgeta i kam strong moa blong stap olsem ol trufala man blong Jeova, we hem i Haefala Rula blong heven mo wol.—Ol Sam 118:1-4, 29.

Ol faswan Kristin long Efesas mo Kolosi oli singsing long “Ol Sam, mo ol him, mo ol sing blong presem God.” Mo tu, oli singim “ol singsing long saed blong spirit,” long hat blong olgeta. (Efesas 5:19; Kolosi 3:16, NW) I stret nomo we oli yusum maot blong olgeta blong singsing mo talem ol tok blong presem God. Jisas i talem se, “taem man i tok, hem i stap talemaot ol samting we [“hat,” NW] blong hem i fulap long hem.”—Matiu 12:34.

Miusik We God i No Glad Long Hem

Ol miusik we Baebol i tokbaot, i no evriwan we oli mekem God i glad. Tingbaot wanem we i hapen long Hil Sinae, taem Moses i go blong God i givim Loa mo ol ten Komanmen long hem. ?Taem Moses i kamdaon long hil ya, hem i harem wanem? “I no noes blong man we i win long faet, mo i no noes blong man we i lus tu,” be hem i harem we ol man “oli stap singsing from we oli harem gud.” Miusik ya i joen wetem fasin blong wosip long aedol. Samting ya i mekem se God i harem nogud tumas, nao hem i kilim i ded samwe long 3,000 man blong mekem miusik.—Eksodas 32:18, 25-28.

Ol man oli save wokem ol singsing, plei miusik, mo harem gud long ol defren miusik. Nating se i olsem, i no evri miusik we God i glad long hem. ?From wanem? Kristin aposol Pol i eksplenem se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.” (Rom 3:23) Plante miusik we ol man oli wokem oli leftemap ol hiten wosip long saed blong seks, tijing ya se sol i no save ded samtaem, mo wosip long Meri olsem “mama blong God.” Be ol bilif mo ol fasin ya oli no givim ona nating long God blong trutok, oli agensem wanem we i stap long tabu Tok blong hem, Baebol.—Dutronome 18:10-12; Esikel 18:4; Luk 1:35, 38.

Jusum Miusik Long Waes Fasin

I no isi blong jusum gud ol miusik we yumi gat tede. Ol man oli mekem ol pija long bokis blong ol kompak disk blong pulum ol narafala blong wantem pem enikaen stael blong miusik. Be sipos wan man blong God i wantem mekem Hem i glad, bambae man ya i mas lukaot gud mo gat waes fasin blong skelemgud ol miusik, blong hem i no jusum miusik we i leftemap ol giaman bilif blong skul, i tokbaot ol rabis fasin blong seks mo ol rabis spirit.

Albert, we bifo hem i wok olsem wan Kristin misinari long Afrika, i talem se hem i gat smol jans blong pleplei long piano long ples ya. Be hem i lesin bakegen mo bakegen long ol kaset we hem i tekem wetem hem. Naoia, Albert i gobak finis long kantri blong hem, mo hem i stap wok olsem wan elda blong visitim ol Kristin kongregesen. Hem i skelemgud taem we hem i spenem blong lesin long miusik. Hem i talem se: “Mi mi laekem tumas blong lesin long ol miusik blong Beethoven. Long ol yia we oli pas, mi bin tekem ol defren miusik blong hem we oli rikodem, olsem simfoni, konseto, sonata, mo kwatet.” Taem Albert i lesin long ol miusik ya, samting ya i mekem hem i harem gud tumas. I tru, wanwan man i gat prapa miusik we hem i wantem lesin long hem. Be yumi ol Kristin, yumi mas tingbaot advaes blong Pol se: “Long olgeta samting we yufala i kakae, mo we yufala i dring, mo long olgeta fasin blong yufala, oltaem yufala i mas leftemap nem blong God.”—1 Korin 10:31.

Miusik Mo Givim Laef Blong Mekem Wan Wok

Faswan samting we Suzie i laekem, hemia miusik. Hem i eksplenem se: “Mi stat blong plei long piano taem mi gat 6 yia nomo, mo taem mi gat 10 yia, mi plei violin, mo mi plei long hap taem mi gat 12 yia.“ Sam taem biaen, Suzie i go long skul ya Royal College of Music long London, Inglan, blong lanem olsem wanem blong plei miusik wetem hap. Long skul ya, wan woman Spen we i gat gudhan blong plei long hap, i tijim hem blong fo yia. Mo biaen, Suzie i go skul wan yia bakegen long Paris Conservatoire, hemia long Franis. Ale, hem i kasem wan stefeket long saed blong miusik mo tu ol stefeket blong plei long hap mo blong tijim narafala blong plei piano.

Suzie i joen wetem wan kongregesen blong ol Witnes blong Jeova long London. Long ples ya, hem i faenem se ol Witnes oli gat trufala intres mo lav. Sloslou, lav we hem i gat long Jeova i kam bigwan mo strong tingting we hem i gat long wok blong Jeova i pusum hem blong lukaot rod blong mekem wok blong hem. Nao biaen, hem i givim laef blong hem i go long God mo i tekem baptaes. Suzie i talem se: “Taem mi plei miusik, hemia wan wok we mi givim fulwan laef blong mi blong mekem, taswe mi lan finis blong givim laef blong mi blong mekem wan wok.” Taem hem i joen long Kristin wok blong talemaot gud nius blong Kingdom blong God, blong i obei long tok blong Jisas, hem i no moa spenem plante aoa blong plei miusik.—Matiu 24:14; Mak 13:10.

?Naoia wanem filing blong hem taem hem i spenem smol taem nomo blong plei miusik? Hem i talem stret se: “Samtaem mi harem nogud lelebet from we mi no moa gat tumas taem blong plei miusik, be nating se i olsem, mi gat taem yet blong plei miusik blong mi mo mi haremgud yet long miusik. Miusik i wan presen we Jeova i givim. Taswe, mi haremgud moa long miusik naoia from we mi putum wok blong hem fastaem long laef blong mi.”—Matiu 6:33.

Miusik We i Presem God

Albert mo Suzie wetem klosap 6 milian narafala Witnes blong Jeova, oltaem oli presem Jeova God wetem miusik. Long ol Haos Kingdom long 234 kantri, oli statem mo finisim ol Kristin miting blong olgeta wetem ol singsing blong presem Jeova. Ol singsing ya oli gat ol defdefren not, we i mekem wan naesfala miusik we oli karem ol toktok we i stap long Baebol blong presem Jeova God.

Olgeta evriwan we oli kam, oli singsing wetem bigfala voes, oli talem se, Jeova i wan God we i stap kea gud long ol man (Sing 44). Oli singim wan singsing blong presem Jeova (Sing 190). Ol singsing blong olgeta i tokbaot fasin glad mo ol wok blong ol Kristin brata sista, laef blong ol Kristin, mo ol Kristin fasin. Samting we i mekem oli haremgud moa, hemia ol defdefren stael blong plei miusik blong ol Witnes long ol kantri olsem Esia, Ostrelia, Yurop, mo Not mo Saot Amerika.b

“!Olgeta man long wol! !Yumi sing long Hae God! !Yumi wokem wan niufala singsing! !Yumi sing blong presem hem! !Yumi sing long Hae God! !Yumi leftemap nem blong hem! Evri dei bambae yumi talemaot gud nius ya we hem i sevem yumi. Bambae yumi talemaot paoa blong hem long ol man blong ol narafala kantri. Bambae yumi talemaot ol bigbigfala wok blong hem long fes blong olgeta man.“ Hemia ol fastok blong wan longfala singsing blong presem king, we man blong raetem Ol Sam i raetemdaon long taem blong hem. (Ol Sam 96:1-3) Hemia nao wanem we ol Witnes blong Jeova oli stap mekem long ples blong yu, mo oli singaot yu blong kam joenem olgeta blong singsing blong presem God. Bambae oli welkamem gud yu long Haos Kingdom blong olgeta. Long ples ya, yu save lanem olsem wanem blong presem Jeova wetem miusik we i mekem hem i glad.

[Ol futnot]

[Tok blong pija long pej 28]

Mekem singsing long Jeova