Hae Kot Blong Filipin i Sapotem Fasin Fri Blong Wosip

Man blong Wekap! long Filipin i raetem store ya

LONG Jun 7, 1993, taem plante milyan pikinini blong Filipin oli gobak long skul, ol Wetnes blong Jeova we oli stap long medel blong olgeta oli glad bigwan. ?From wanem? From we long Maj 1, 1993, jes bifo we ol skul oli klosem doa blong olgeta blong finisim yia blong skul, Hae Kot blong Filipin i jenisim wan disisen we Hae Kot i bin mekem long 1959, ale i agri long raet blong ol pikinini blong ol Wetnes blong Jeova blong no salut long flag, talem tok blong ona long kantri, mo singsing nasnal antem.

?Wanem i mekem se i gat jenis long samting ya? ?Mo ol man Filipin we oli laekem fasin fri, oli kasem wanem samting we i olsem frut blong disisen ya?

From Wanem Ol Wetnes Blong Jeova Oli No Salut Long Flag

Ol Wetnes blong Jeova oli bilif se fasin blong salut long flag, singsing nasnal antem, mo talem tok blong ona long kantri, oli olsem fasin blong wosip. Voes blong hat mo tingting blong olgeta we oli trenem blong laenap wetem Baebol, i no letem olgeta blong joen long ol fasin blong wosip olsem. (Matyu 4:10; Ol Wok 5:29) Nating se oli stap laef long wanem kantri, hemia disisen we oli stanap long hem blong folem Jisas Kraes, we i bin talem se ol man blong hem “oli no man blong wol ya, olsem we hem i no man blong wol.”—Jon 17:16.

Long semtaem, ol Wetnes blong Jeova oli soem respek long gavman we oli stap laef aninit long hem, mo oli bilif se hemia wan plan we God i letem i stap. Taswe, oli mas obei long ol loa blong kantri, pem takis, mo givim ona long ol haeman blong gavman. Oli neva joen long eni fasin blong agensem gavman.a

Risen Blong Disisen Blong Hae Kot

?Hae Kot we i stap naoia i givim wanem risen blong jenisim disisen blong Gerona agensem Sekretari blong Edukesen long 1959? Disisen blong 1993 we Jaj Griño-Aquino i raetem i talem se: “Tingting ya se yumi mas fosem man mo mekem hem i fraet blong kasem panis, olsem yumi sakemaot hem long wok no long skul sipos hem i no salut long flag, singsing nasnal antem, mo talem tok blong ona long kantri, long taem blong pulum flag, i agensem voes blong tingting blong ol man Filipin tede we, stat taem oli smol pikinini nomo, oli gruap wetem tingting we i stap long ‘Bill of Rights’ se man i fri blong toktok mo mekem wosip no mekem wok blong wan skul.”

Kot i luksave se, nating se ol Wetnes blong Jeova “oli no salut long flag, oli no mekem ‘sam samting long fored blong ol man’ no sam nogud fasin, we oli save mekem ol manples blong olgeta we oli bilif long fasin blong soemaot lav long kantri blong olgeta taem oli salut long flag, oli harem nogud.” Kot i gohed blong talem se: “Oli stanap kwaet nomo long taem blong pulum flag, blong soemaot respek blong olgeta long raet we ol narafala oli gat blong joen long fasin ya we oli tinghevi long hem . . . From we oli no mekem sam fasin we i save spolem ol narafala, i no gat risen blong sakemaot olgeta.”

Kot we i stap naoia i stap lukluk tu long tok we oli talem long disisen blong Gerona se sipos oli letem ol Wetnes blong Jeova blong no salut long flag, “fasin blong salut long flag bambae i kam wan samting blong bifo no maet smol man nomo bambae oli mekem. Mo i gat taem i stap kam we bambae yumi gat ol manples we oli no tijimgud olgeta, oli no putum long hat blong olgeta, mo oli no makemgud long olgeta, se oli mas ona long flag mo laekem kantri blong olgeta, mo oli mas tinghae long ol man blong faet bifo mo ol man we oli mekem plante samting blong givhan long kantri blong olgeta, mo fasin blong stanap long saed blong kantri blong olgeta—sore tumas sipos nogud samting ya i kamaot, from we wan smol haf nomo blong ol pikinini long skul we oli strong blong mekem samting we oli wantem, oli askem strong nao ol haeman oli letem olgeta.”

Disisen blong Kot long 1993 i ansa long samting ya taem hem i talem se: “Samting ya we kot long Gerona i bin talem long strong fasin se bambae i hapen . . . i no kamaot. Mifala i no agri se sipos mifala i letem ol Wetnes blong Jeova blong oli no salut long flag, singsing nasnal antem mo talem tok blong ona long kantri, grup blong jyos ya we i ‘smol haf nomo blong ol pikinini blong skul,’ bambae i mekem se yumi konfyus long kantri blong yumi, mo mekem wan nesen we ‘oli no tijimgud olgeta, oli no putum long hat blong olgeta, mo oli no makemgud long olgeta, se oli mas ona long flag mo stanap long saed blong kantri blong olgeta, laekem kantri blong olgeta, mo tinghae long ol man blong faet bifo mo ol man we oli mekem plante samting blong givhan long kantri blong olgeta.’ ”

Laswan samting, Kot we i stap naoia i lukluk bakegen long toktok blong Masta Jaj Robert Jackson blong Hae Kot blong Amerika we i jajem bisnes blong Barnette long 1943, we i bin talem se: “Blong bilif se fasin blong laekem kantri bambae i no kam antap sipos man i jusum nomo mo i wantem blong joen long ol seremoni blong leftemap kantri bitim we yumi mekem wan plan blong fosem hem, i olsem we yumi talem se ol fasin we yumi stap folem long kantri ya oli no laenap wetem tingting blong ol man we oli fri blong jusum wanem oli wantem. . . . Fasin fri blong mekem i defren i no long ol samting we oli no impoten tumas. Hemia i olsem sado nomo blong fasin fri. Trufala fasin we i pruvum fasin fri hem i raet blong mekem i defren long ol samting we oli tajem hat blong ol man we oli stap naoia.”

Afta we oli talem ol poen ya long saed blong loa, Kot blong Filipin i agri fulwan long disisen ya se: “Olgeta oda blong sakemaot ol man we oli no salut long flag, we grup we oli agensem apil ya i mekem agensem ol man we oli no agri wetem oda ya, naoia i FINIS MO MIFALA I BREKEM DISISEN YA. Oda we Kot ya i bin mekem blong blokem [ol bigman blong skul] naoia i gohed blong olwe.”

Wan narafala jaj we i wok long kes ya, Jaj Isagani Cruz i talem se hem i agri long disisen ya long wan tok se: “Long lukluk blong mi wetem tingting daon, Gerona i bin stanap long tingting we i rong. I klia se Kot we i tekem disisen long taem ya, i wok wetem wan strong tingting se Stet i gat raet blong talem wanem ya i bisnes blong wan jyos mo wanem ya i no bisnes blong wan jyos, mo blong talem long ol wanwan man wanem oli save wosip long hem mo wanem oli no save wosip long hem . . . Taem Stet i talem long ol man ya we oli askem fasin fri blong wosip se oli mas salut long flag, hem i bin talem, olsem haf blong wok blong hem long posisen we i stap long hem, se oli no stap brekem loa blong Baebol taem oli salut long flag. Long tingting blong mi, Stet i no gat raet blong pusum nus blong hem insaed long bilif blong olgeta, bilif ya we i talem narafala samting long olgeta. Stet i no save talem mining blong Baebol long olgeta. Hem i no gat gudhan long wok ya.”

Mining Blong Samting Ya Long Olgeta We Oli Laekem Fasin Fri

Olgeta man we oli laekem fasin fri oli glad long disisen ya we i sapotem raet we man i gat blong jusum skul blong hem mo blong folem voes blong hat mo tingting blong hem, be long semtaem oli obei long ol haeman blong gavman kasem mak we oli save obei long olgeta. (Rom 13:1, 2) Taem Stet i protektem raet blong ol wanwan man, hem i no openem rod long wan fasin we gavman i no gat paoa nating long kantri, be, i mekem wok we aposol Pol i talem long Rom 13:5, 6, se: “From samting ya, yufala i mas obei long gavman . . . we tingting blong yufala i no save jajem yufala. Mo from tok ya bakegen, yufala i mas pem takis. From we ol man blong gavman, taem oli stap mekem ol wok blong olgeta, oli stap wok blong God ya.”

Ol Wetnes blong Jeova long Filipin oli respektem disisen blong ol jaj blong Hae Kot mo oli luksave se bigfala ona from samting ya i mas go fastaem long Man we i Wokem yumi, Jeova God.

[Futnot]