?From Wanem Ol Witnes Blong Jehova Oli No Joen Long Ol Seremoni Blong Leftemap Kantri?

Ol Witnes blong Jehova oli respektem ol gavman mo ol samting we i representem kantri, mo oli akseptem se maet plante man oli jusum blong mekem promes blong stap tru long kantri, salut long flag, o singim singsing blong kantri.

Be ol Witnes blong Jehova oli jus blong no joen long ol seremoni olsem, from we oli bilif se ol tijing blong Baebol oli agensem olgeta. Mifala i glad taem ol narafala oli respektem bilif blong mifala, olsem we mifala i respektem jus blong olgeta.

Long atikol ya

• ?Wanem ol tijing blong Baebol we oli joen wetem samting ya?

• ?Olsem wanem sipos i gat wan loa se yumi mas joen long ol seremoni ya?

• Taem ol Witnes blong Jehova oli no joen, ?oli stap traem blong soemaot se oli sapotem wan pati blong politik o wan narafala grup?

?Wanem ol tijing blong Baebol we oli joen wetem samting ya?

Mifala i mekem jus ya from tufala tijing ya blong Baebol:

• Yumi mas wosipim God nomo. Baebol i talem se: “Yu mas mekem wosip long Jehova nomo we i God blong yu, mo yu mas mekem tabu wok blong hem nomo.” (Luk 4:8) Ol tok blong stap tru long kantri mo ol singsing blong kantri, oli olsem promes se bambae man i sapotem mo lavem kantri blong hem i bitim ol narafala samting. Taswe ol Witnes blong Jehova oli harem se i no stret blong joen long ol seremoni olsem.

  Mo tu, ol Witnes blong Jehova oli harem se sipos oli salut long flag, hemia i olsem we oli wosipim flag o wan aedol, mo Baebol i agensem samting ya. (1 Korin 10:14) Sam man blong raetem histri oli talem stret se flag blong ol kantri i olsem wan saen blong wosip. Carlton J. H. Hayesa i talem se: “Fasin blong leftemap wan kantri antap long ol narawan, i olsem wan wosip we flag i saen blong hem.” Daniel P. Mannix i tokbaot ol fas Kristin long buk blong hem, i se: “Long taem bifo, ol Kristin long Rom oli no wantem . . . mekem wan sakrefaes i go long spirit blong empera [blong Rom]. Long sem fasin, ol Kristin tede oli no salut long flag.”b

  I tru se ol Witnes blong Jehova oli no salut long flag, be oli no spolem, bonem, o mekem wan narafala samting tu, blong soemaot se oli no gat respek long flag. Mo oli no mekem olsem long eni samting we i representem kantri.

• Long tingting blong God, olgeta man oli sem mak. (Ol Wok 10:34, 35) Baebol i talem se God “i mekem wan man nomo, nao olgeta man long wol oli kamaot long man ya.” (Ol Wok 17:26) Taswe, ol Witnes blong Jehova oli bilif se i rong blong leftemap wan laen o nesen antap long ol narawan. Mifala i respektem olgeta man, nomata se oli kamaot long wanem kantri.—1 Pita 2:17.

?Olsem wanem sipos i gat wan loa se yumi mas joen long ol seremoni ya?

Ol Witnes blong Jehova oli no agensem gavman. Mifala i bilif se ol gavman oli haf blong “plan we God i” letem i stap tede. (Rom 13:1-7) Mifala i bilif tu se ol Kristin oli mas obei long ol haeman.—Luk 20:25.

?Be olsem wanem sipos loa i talem se yumi mas mekem wan samting we God i agensem? Samtaem i posibol blong askem long gavman blong i mekem sam jenis long ol loa.c Sipos i no posibol, ol Witnes blong Jehova oli soemaot wetem respek se oli jus blong ‘obei long God we i rula blong olgeta, i bitim we oli obei long ol man.’—Ol Wok 5:29.

Taem ol Witnes blong Jehova oli no joen, ?oli stap traem blong soemaot se oli sapotem wan pati blong politik o wan narafala grup?

Nogat. Ol Witnes blong Jehova i no tekem saed long ol rao blong ol politik pati mo ol grup blong man. Taem mifala i no wantem mekem promes blong stap tru long kantri, salut long flag, o singim singsing blong kantri, hemia i no from we mifala i sapotem wan pati blong politik. Be mifala i bilif long samting we Baebol i talem long saed blong ol seremoni ya, mo mifala i folem.