Ol Man Long Ol Kantri We Bifo Oli Soviet Yunion Oli Laekem Ol Buk We Oli Tokbaot Baebol
Man blong Wekap! long Rasia i raetem store ya
LONG stat blong 1991, i gat Rasia mo 14 narafala ripablik we oli mekemap Soviet Yunion. Afta long taem ya, ol ripablik ya oli kasem independen. Be, Rasia i gat moa man i stap long hem bitim ol 14 narafala kantri tugeta, mo graon blong hem, i tri taem antap long graon blong ol narafala kantri ya. Long Septemba 1994, i gat 117,276 Wetnes blong Jeova long ples we bifo oli kolem Soviet Yunion. Oli stap serem ol trutok blong Baebol wetem ol man raonabaot long olgeta.
Naoia, evri manis, oli prentem bigfala namba blong ol Wajtaoa mo Wekap! long lanwis Rasia, blong seremaot long ples ya we bifo oli kolem Soviet Yunion. Antap long hemia, oli stap seremaot plante traket mo buk long ples ya. I isi blong luk se ol man oli laekem tumas ol buk ya we oli tokbaot Baebol, from ol leta we ofis blong ol Wetnes blong Jeova kolosap long Sen Pitasbeg, Rasia, i kasem.
Laekem Ol Magasin Long Kala
Wan man long medel blong Saebiria i raetem se: “Laki nomo mi luk Wajtaoa long han blong wan woman we i wok wetem mi. Mi askem hem blong soem magasin ya long mi. Fastaem, mi luk kwiktaem nomo long ol naes pija we oli gat kala. Afta, mi stat blong ridim, mo mi gohed . . . Bifo we mi luksave, mi ridim fulwan magasin ya. Ol kwestin long magasin ya oli pulum intres blong mi, mo oli askem ol kwestin ya long fasin we i smat mo i olsem we oli stap storeyan nomo.”
Wan narafala man long Saebiria i eksplenem se: “Mi gat jans blong kasem wan magasin blong yufala. Hemia i beswan save we mi bin ridim samtaem long saed blong bilif. Mi no talem samting ya blong tok swit long yufala nomo.”
Wan dresa long Sen Pitasbeg, we hem i namba tu taon long Rasia, i raetem se: “Tangkyu tumas long ol nambawan haf long Wekap! blong Janewari 8, 1995, long saed blong fasin ya we man i taed tumas from i wok bitim mak. Ol save ya oli no tekemaot ol trabol blong mi, be oli sapotem mi long fasin we mi bin wantem mo mi bin lukaotem.”
Wan studen long haeskul, we i gat 17 yia blong hem, i raetem se: “Mi talem tangkyu tumas long evriwan we oli prentem ol nambawan magasin ya. Taem mi wetem ol fren blong mi, mifala i rere blong kamaot long wan sinema, mifala i luk sam magasin oli stap long wan jea. Mifala i karem. . . . Taem mi stat ridim Wajtaoa, mi no save bilivim ol samting we mi stap ridim. ?I rili tru se fyuja bambae i olsem? Naoia mi stap ridim ol Gospel mo mi stap traem blong kasem save long olgeta. Ol magasin blong yufala oli eksplenemgud ol samting we Baebol i tokbaot.”
Wan man we i gat 26 yia blong hem, i talem se: “Mi mi talem tangkyu tumas long yufala from haf ya long Wekap! blong Epril 8, 1994, ‘?Fasin Blong Kilim Yu Wan i Ded, i Rili Rod Blong Stretem Ol Trabol Blong Yu?’ From we tingting blong mi i foldaon mo mi stap mekem fasin ya blong pleplei wetem seks blong mi, plante taem mi tingbaot blong kilim mi wan i ded. Be Tok blong God mo ol prea we mi mekem i go long Jeova, oli blokem mi blong mi no tekemaot laef blong mi. Magasin ya i mekem bilif blong mi i kam strong moa se God i sore long yumi, mo tu bilif ya se God bambae i halpem mi blong stretem ol trabol blong mi. Hem i save luk se mi tanem tingting blong mi from ol rong blong mi. Hem i wantem se mi stap laef. Mi talem tangkyu long hem from we hem i givhan long mi tru long magasin ya.”
Long saed blong sem haf ya long Wekap!, wan gel we i gat 15 yia blong hem i eksplenem se: “Magasin ya i jenisim laef blong mi bigwan. Taem mi mi gat eit yia nomo, mi stat blong harem se i no gat wan we i nidim mi. Papa mama blong mi tufala i no gat taem blong toktok wetem mi. Mo mi wan nomo, mi traem blong winim ol trabol blong mi. Mi stap mi wan, mi no wantem toktok wetem narafala. Mi stap rao oltaem wetem ol famle blong mi. Biaen mi tingting blong kilim mi wan i ded. !Mi mi glad tumas blong mitim ol Wetnes blong Jeova!”
Wan woman long Rasia, long saed i go long Yurop, i talem se: “Wan taem, mi harem tu yangfala man we oli stap wet long bas, oli stap storeyan long saed blong Baebol. Mi mi intres long tok blong tufala, ale mi go kolosap long tufala. Tufala yangfala man ya oli givim wan Wajtaoa long mi. Mi glad mo mi intres tumas long magasin ya. Mi wantem save moa long saed blong Baebol. Mi wantem harem tingting blong yufala tru long ol magasin blong yufala. Mo mi wantem kasem save mo stadi long Baebol oltaem.”
Oli Laekem Ol Narafala Buk Tu
Wan yangfala woman long Kaukasus i raetem se: “Wan woman i kam insaed long ofis blong mifala, mo hem i stat blong tokbaot wan asembli. Mi luk olsem wanem hem i hapi, mo mi luk glad fasin we hem i soemaot, ale mi mi intres. Long nekis dei, hem i givim wan buk long mi, Yu Save Laef Foreva Long Paradaes Long Wol. Mi ridim kwiktaem nomo. Hem i nambawan. Mi harem se mi no moa wokbaot krangke long tudak, be mi faenem wan doa we i lidim mi long laet. Longtaem finis, mi bin lukaot ol ansa long ol kwestin blong mi, be naoia mi faenem ansa blong evri kwestin long wan buk nomo. Hemia i givim glad long mi we i had blong eksplenem.”
Wan man long medel blong Esia i raetem se: “Mi mi stap go long Gud Nyus Jyos. Long jyos ya, mifala i sot tumas long ol buk long saed blong speret. Mifala i plis long yufala blong sanem kwik ol buk mo buklet, blong mifala i save stadi long olgeta mo seremaot long ol narafala.”
Wan man long Amenia, kolosap long Blak Si, i raetem se: “Mi mi ridim buklet ya ?God i Rili Kea Long Yumi? Hem i olsem fres win we i mekem mi mi haremgud tumas. Naoia mi jes faenem sam buk blong halpem mi blong stadi long Baebol. Mi askem yufala long kaen fasin blong sanem sam buk we mi save yusum blong stadi long Baebol.”
Wan woman long Saebiria i talem se: “Wan Wetnes blong Jeova i kam long haos blong mifala mo i livim wan buk, Man We i Hae Moa Long Olgeta Man. Stat long taem we mi finis long skul, mi no moa bilif long God. Be save we mi ridim long buk ya i pulum mi blong tingting dip mo blong stat blong stadi long Baebol.”
Wan mama we i gat tu pikinini, i talem tangkyu blong hem from sem buk ya long saed blong laef blong Jisas Kraes. Hem i eksplenem se: “I isi long ol pikinini blong kasem save long hem, mo oli intres long hem. Buk ya i pulum olgeta blong wantem stadi moa long Baebol mo ridim ol buk we oli tokbaot Baebol. Yufala i raetem mo wokem buk ya long nambawan fasin.”
Las yia, 34,608 man long ples we bifo oli kolem Soviet Yunion, oli tekem baptaes. Samting ya i soemaot fasin tangkyu blong olgeta from ol samting we oli stap lanem. !I gud sipos ol buk we oli tokbaot Baebol we ol Wetnes blong Jeova oli prentem, oli kavremap olgeta kantri long haf ya blong wol, blong plante taosen moa man oli save obei long trutok blong Baebol we i stap insaed long ol buk ya!