!Wan Video Kaset We i Givim Save Mo i Tajem Hat!
Long Eprel 1951, ol soldia oli holem plante taosen Witnes blong Jeova long Soviet Yunion, oli putum olgeta i go long ol tren we i tekem olgeta i go long Saebiria—sam long ol Witnes ya oli go wetem ful famle blong olgeta. ?From wanem strongfala gavman blong Soviet Yunion i wantem tumas blong aotem ol Witnes ya? ?Olsem wanem ol brata blong yumi oli laef, mo olsem wanem namba blong olgeta i kam bigwan, nating se ol man oli mekem i strong tumas long olgeta blong plante yia? Yu save faenem ansa blong ol kwestin ya long video kaset ya Faithful Under Trials—Jehovah’s Witnesses in the Soviet Union. !I gud yu wajem video kaset ya mo letem toktok blong hem i tijim yu blong holem strong long Jeova nomata wanem samting i hapen long laef blong yu!
?Yu yu save ansa long ol kwestin ya? (1) ?Wetaem gavman blong Rasia i luksave mo i rejistarem ol Witnes blong Jeova olsem wan skul long kantri ya? (2) ?Bifo mo afta long Wol Wo Tu, olsem wanem i gat plante moa famle we oli kam Witnes blong Jeova long Soviet Yunion? (3) ?Olsem wanem bilif blong ol Witnes i agensem ol tingting we man ya Lenin i leftemap? (4) ?Wanem ya samting we oli kolem Operesen Not, mo from wanem Stalin i mekem samting ya? (5) ?Oli wantem sanem ol Witnes i go wea, mo sipos oli no wantem go long ples ya oli mas mekem wanem? (6) ?Taem ol brata mo sista blong yumi oli stap long tren blong go long Saebiria, oli mekem wanem we i leftemap tingting blong olgeta mo we i mekem ol soldia oli sapraes? (7) ?Wanem hadtaem we ol Witnes oli fesem taem oli stap long Saebiria? (8) ?Wanem samting long saed blong spirit we Jeova i givim mo we ol man blong hem oli tinghae long hem, mo from wanem oli tinghae long samting ya? (9) ?From wanem ol brata blong yumi oli rere blong lusum laef blong olgeta blong kasem ol buk, mo olsem wanem oli naf blong kasem ol buk ya nating se ol man blong gavman oli wok had blong blokem olgeta? (10) ?Olsem wanem Khrushchev i gohed blong agensem ol man blong God? (11) ?Olsem wanem ol man blong gavman oli traem spolem bilif blong ol pikinini blong ol Witnes? (12) ?Ol brata blong yumi oli kasem save klia se wanem risen blong ol trabol ya? (2002 Yearbook, pej 203-204) (13) ?Wanem i kamaot taem ol enemi blong yumi oli agensem yumi, we i defren olgeta long samting we oli wantem? (2002 Yearbook, pej 220-221) (14) ?Wanem sam samting we oli kamtru long ol Witnes long Soviet Yunion, we neva oli ting se bambae oli save luk? (15) ?Wanem samting nao i halpem ol brata blong yumi blong winim ol traem we oli fesem, mo olsem wanem laswan pija we i stap long video kaset ya i soemaot se tok blong Jeremaea 1:19 i tru tumas? (16) Talem stori blong wan brata no sista we i rili tajem hat blong yu from we hem i holemstrong long bilif taem hem i fesem traem.