?Olsem Wanem Yu Save Givhan Long Papa No Mama We Hem Wan Nomo i Lukaot Long Ol Pikinini Blong Hem?
YUMI mas tingbaot ol papa no mama we olgeta wanwan oli lukaot long ol pikinini blong olgeta. Ol man we oli wok blong givhan long ol narafala we oli kasem trabol, oli tinghae long fasin blong sapotem ol famle we oli gat papa no mama nomo.
Tufala we i stadi long fasin joen blong ol man, Letha mo John Scanzoni, oli talem se: “Ol fren we oli gat fasin blong sapotem papa no mama ya we hem wan nomo i lukaot long ol pikinini blong hem, ol famle blong hem we oli soem se oli kea, ol tija we oli laekem mo soemaot intres long ol pikinini, ol wok we velej mo jyos i mekem blong givhan long ol famle olsem, oli save givhan bigwan long filing blong hem mo ol pikinini blong hem tu, long stret taem long laef blong olgeta we oli nidim tumas fasin blong leftemap tingting blong olgeta.” Oraet, ?olsem wanem yu yu save givhan?
Sapotem Olgeta
Fastaem, traem kasem save long tingting blong papa no mama ya we hem wan nomo i stap lukaot long ol pikinini blong hem. Traem putum yu wan long ples blong hem. Man blong Wekap! i askem sam kwestin long Margaret, we hem i gat tu pikinini, wan i gat 7 yia mo narawan i gat 14 yia. Margaret mo man blong hem tufala i divos faef yia bifo, mo kam kasem naoia, hem i stap stanap strong tru long ol trabol we hem i kasem. Bambae yu luk se ol toktok blong hem oli mekem plante samting i kam klia.
Man blong Wekap!: “?Wanem ol trabol we yu stap fesem taem yu wan nomo yu lukaot long ol pikinini blong yu?”
Margaret: “Bifo, mi bin faenem i had blong bilivim se laef blong mi i jenis, we mi stap mi wan nomo wetem ol pikinini blong mi. Mi mi no wantem samting ya. Mi harem mi kros taem ol narafala oli singaot mi se ‘wan mama we hem wan nomo i lukaot long ol pikinini blong hem,’ from we plante man oli ting se ol famle olsem oli harem nogud oltaem, oli no luk naes, mo ol pikinini blong olgeta oli no gat gudnem. Be mi mi no tingting olsem, taswe fastaem mi no wantem lesin long ol advaes. Be naoia, mi luksave se laef blong wan mama we i no gat hasban i gat sam gudfala saed blong hem tu.”
Blong sapotem papa no mama ya we hem wan nomo i lukaot long ol pikinini blong hem, yu mas save ol samting we hem i wari from. Gohed blong soem kaen fasin long hem.
Man blong Wekap!: “Man we yu mared wetem hem bifo i no stap givim mane long yu. ?Olsem wanem yu stap kasem naf mane?”
Margaret: “Mi mas rere blong lego plante samting we mi wantem. Bifo, mi laekem blong pem ol nyufala klos blong putum, taem mi joen wanples wetem ol narafala. Naoia, samtaem mifala i pem sam nyufala samting, be mifala i no save spenem plante mane olsem bifo. Be mi wantem we ol pikinini blong mi oli luk naes, taswe mi mas mekem gudfala plan blong spenem mane long waes fasin. Mi stat blong putum smol mane i stap evri wik. Mi givim long wan fren we mi trastem hem blong hem i holem i stap. Mi save se sipos mi nomo mi holem, maet bambae mi yusum.”
?Yu yu traem frengud wetem ol papa no mama ya we olgeta wanwan oli lukaot long ol pikinini blong olgeta, blong oli save trastem yu blong givhan long olgeta blong yusumgud mane blong olgeta?
Man blong Wekap!: “?Olsem wanem yu winim fasin blong harem nogud blong stap yu wan?”
Margaret: “Long dei, mi stap bisi oltaem. Mi harem nogud moa long naet, taem ol pikinini oli slip finis. Mi toktok long wan famle no fren long telefon. Samtaem mi toktok mo mi krae tu. Mi tokbaot ol samting we i bin kamaot long dei ya. Taem i gat wan we i rere blong lesin, samting ya nomo i givhan bigwan.”
Maet yu nao yu save telefon i go long hemia we i stap hem wan. Fasin blong yu blong rere blong lesin long hem i save mekem hem i haremgud tumas.
Man blong Wekap!: “?Wanem trabol we yu fesem olsem wan mama we i no gat hasban, we i hadwok moa long yu?”
Margaret: “I hadwok blong trenem ol pikinini blong folem ol gudfala fasin. From we ol fasin blong naoia oli stap kam moa nogud mo ol man oli no moa joengud, plante man oli ting se i no stret we mi wantem tijim ol pikinini blong mi blong folem ol gudfala fasin.”
Sipos yu soem wan gudfala eksampel blong holemtaet ol fasin we God i glad long olgeta, samting ya bambae i pulum ol narafala blong mekem sem mak.
Man blong Wekap!: “I tekem plante taem blong trenem tu smol pikinini. ?Olsem wanem yu faenem taem blong mekem samting we yu yu wantem?”
Margaret: “Mi traem blong putum sam taem i stap blong mi wan. Eksampel, taem wan fren i stap tijim ol pikinini long myusek, mi gat wan haoa we mi save yusum blong mi wan. Ale, mi sidaon mo mi no lukluk televisin. Mi stap kwaet nomo, mo mi tingbaot ol samting we mi bin mekem long dei ya. Oltaem mi tingting strong long ol fasin we oli stret mo ol fasin we oli no stret. Taswe mi laekem blong tingtingbak long ol samting we mi bin mekem, blong luk sipos i gat wan rod blong mekem ol samting ya long fasin we i moa gud.”
Sipos sam samtaem yu lukaot long ol pikinini blong wan mama we i no gat hasban, bambae hem i gat jans blong stap kwaet blong smoltaem mo tingting dip.
Halpem Hem Long Fasin We i Rili Givhan
Man blong Wekap!: “?Wanem ol samting we ol narafala oli bin mekem long yu we yu luk se i rili givhan?”
Margaret: “Mi laekem taem wan narafala famle i singaot mi blong kam long haos blong olgeta. Taem yu luksave se ol narafala oli stap tingbaot yu, samting ya i givhan bigwan. Samtaem yu save ting se yu wan nomo yu gat trabol. !Mo tu, taem wan narafala i presem mi from gudfala fasin blong trenem ol pikinini blong mi, samting ya i rili leftemap tingting blong mi! Mo tu, i gat ol narafala samting we mi mas mekem wetem han blong mi, olsem flasem haos, klinim garen, pem ol samting long stoa . . . !Yes mi save gohed nomo!”
Taem papa no mama nomo i stap wetem famle, i tekem moa taem blong mekem ol wok mo i luk olsem we evri samting i hadwok moa. Taswe yu no mas ting nating long taem we yu spenem wetem olgeta. Hem i olsem wan presen we yu givim long olgeta. Long tingting blong olgeta, hemia wan presen we i sas tumas.
[Tok Blong Pija Long Pej 9]
Blong rili givhan long papa no mama we hem wan nomo i stap lukaot long ol pikinini blong hem, yu mas spenem taem wetem hem