?Wehem Ol Man We Oli Strong Long Bilif?

MAN BLONG Wekap! LONG SPEN I RAETEM STORE YA

“Wan samting we i rili spolem ol skul, hemia fasin we man i no moa kea long wan samting.”

EDMUND BURKE, WAN HAEMAN BLONG BRITEN LONG OL YIA 1700.

LONG not blong Spen, long wan flat ples we win i blu long hem oltaem, i gat wan smol taon we nem blong hem, Kaleruga. Long taon ya, we i fulap long ol haos blong bifo, i gat wan bigfala haos blong ol sista blong Katolik i stap, we oli wokem folem stael blong ol man Rom. Oli bildim bigfala haos ya kolosap 700 yia bifo, blong givim ona long Domingo de Guzmán. Man ya we i bin statem grup blong ol sista blong Katolik we oli kolem Dominikan, hem i bon long taon ya. Long seven handred yia nao, ol sista blong Katolik, we oli jusum laef ya we i kwaet mo we i seraot long ol narafala man, oli stap long haos ya.

Ruf blong haos ya i stap lik, mo ol wol blong hem oli stat brobrok. Be, woman we i bos blong haos ya, i wari moa long wan narafala samting we sloslou i stap brobrok​—hemia ol skul. Hem i talem se: “Taem mi mi kam long haos ya 30 yia bifo, i gat 40 sista oli stap long ples ya. Naoia, i gat 16 nomo. I no gat ol yangfala. I luk olsem we fasin ya blong mekem wok blong jyos, i fasin blong bifo nomo.”

Samting we i stap kamaot long Kaleruga i stap kamaot long plante ples blong Yurop. Hem i no wan tingting we plante man oli kasem wantaem nomo blong agensem ol skul, no gat. Be sloslou, long wan fasin we i kwaet, ol man oli lego jyos blong olgeta. Ol turis nomo oli stap kam long bigfala jyos haos blong Yurop, i bitim ol man blong “bilif.” Jyos​—nomata se hem i Protestan no Katolik​—bifo hem i strong long laef blong ol man, be naoia, hem i stap lus from we ol man oli no moa kea long skul. Oli intres moa long ol prapa bisnes blong olgeta i bitim we oli wari long ol bisnes blong jyos​—wan fasin we ol man blong jyos oli talem se hem i blong wol ya nomo. I luk olsem se ol man oli no moa tinghevi long ol skul olsem bifo. ?Olsem wanem? ?Trabol long saed blong skul we i stap kamaot long Yurop, hem i stat blong kam wan bigfala trabol we bambae i kasem olgeta ples blong wol?

?Wanem i Stap Hapen Long Namba Blong Ol Man We Oli Stap Go Long Jyos?

Bigfala problem ya i no wan nyufala samting long not Yurop. I gat 5 pesen nomo blong olgeta Luteran blong Skandinavia we oli go long jyos oltaem. Long Briten, smol namba blong 3 pesen nomo blong ol Anglikan, oli go long jyos long Sande. Naoia, i luk olsem se ol Katolik long saot blong Yurop oli stap folem eksampel blong olgeta blong not Yurop.

Long Franis, wan kantri we Katolik skul i strong, i gat 1 nomo long evri 10 man blong kantri ya we i go long jyos evri wik. Long ol 25 yia we oli pas, namba blong ol man Spen, hemia 83 pesen, we oli talem se oli “joen fulwan long wok blong Katolik jyos,” i godaon kasem 31 pesen. Long 1992, hed bisop blong Spen, Ramon Torrella, i talem long wan miting blong ol man blong raetem nyuspepa, se “Spen i no rili wan Katolik kantri. Ol man oli go long ol selebresen blong Tabu Wik mo long Lames blong Krismas nomo​—be oli no save go [long Lames] evri wik.” Taem John Paul 2 i go long Madrid long 1993, hem i givim woning ya se “Spen i nidim blong gobak bakegen long Kristin stampa blong hem.”

Fasin ya blong no tinghevi long wok blong skul i kasem ol lida blong jyos olsem we i kasem ol man blong jyos. Namba blong ol man we oli joen long wok blong pris long Franis, i godaon kasem 140 man long 1988 (hemia i kolosap stret haf nomo blong yia 1970). Long Spen, i gat samwe 8,000 we oli lego wok blong pris blong oli mared. Sam narafala pris we oli gohed blong prij long ol man long jyos, oli no moa bilif fulwan long mesej we oli stap talemaot. I gat 24 pesen nomo blong ol lida blong skul ya Luteran long Swiden, we oli talem se taem oli tokbaot heven mo hel, “tingting blong olgeta i sua long samting we oli talem.” Be i gat 25 pesen blong ol pris long Franis we oli no sua sipos Jisas i rili laef bakegen long ded, no no gat.

Pleplei Mo Ol Samting We Man Nomo i Wantem, i Stap Fastaem Long Wosip

?Wanem i stap tekem ples blong ol skul? Long plante famle, pleplei nao i winim wosip. Long Sande, ol famle oli wokbaot i go long sanbij no long bus, i bitim we oli go long jyos. Wan yangfala boe blong Spen, nem blong hem Juan, i talem se: “Mi les blong go long Lames.” Yes, plante moa man oli go long ol stad blong luk futbol no ol grup blong singsing, i bitim we oli go long jyos.

I no jes bigfala namba blong ol man we oli no moa go long jyos, we i pruvum se ol skul oli stap lusum paoa blong olgeta. Plante man Yurop oli laekem moa blong jusum ol bilif mo tingting blong jyos we olgeta nomo oli agri long hem. Tede, ol stampa tijing blong jyos, maet oli defren olgeta long bilif blong ol wanwan man we oli stap insaed long jyos ya. Bighaf blong ol man Yurop​—nating se oli Katolik no Protestan​—oli no moa bilif long laef afta ded, mo bitim 50 pesen blong ol Katolik long Franis, Itali, mo Spen, oli no moa bilif long ol merikel tu.

Ol lida blong skul oli no moa gat paoa blong blokem tingting ya we plante man oli gat blong no moa agri long jyos. Yumi luksave klia samting ya long bigfala toktok we pop i mekem long saed blong meresin we i blokem woman blong gat bel. Long 1990, Pop John Paul 2 i talem long ol Katolik man we oli wok long stoa, blong oli no moa salem ol meresin olsem. Hem i talem se ol meresin ya oli “go agensem ol loa we God i putumap mo oli spolem respek we wan man i gat long hem wan bakegen.” Long sem fasin, buk ya Catechism of the Catholic Church i strong blong talem se “lav we i stap bitwin long man mo woman i stanap long tufala samting ya: fasin blong tufala i stap tru long tufala mo, fasin blong gat pikinini.”

Nating se i gat ol strongfala rul ya, plante hasban mo waef blong skul Katolik oli jusum prapa rod blong olgeta nomo. Naoia bighaf blong ol famle long ol Katolik kantri long saot Yurop oli no gat bitim tu pikinini. Long Spen, ol kondom​—we twante yia bifo ol man oli stap salem long fasin haed nomo​—naoia oli soem long televisin oltaem. I gat 3 pesen nomo blong ol Katolik Franis woman, we oli talem se oli folem rul blong Katolik jyos blong no tekem meresin blong blokem olgeta blong gat bel.

I klia se, ol man Yurop oli stap tanem baksaed blong olgeta long ol jyos mo tijing blong jyos. Hed bisop blong Anglikan jyos long Kanterberi, George Carey, i tokbaot samting we i stap kamaot long jyos blong hem se: “Mifala i stap lusum tumas blad we maet bambae mifala i ded from, hemia wan samting we i impoten tumas blong mifala i tinghevi long hem.”

Stat long taem we plante samting i jenis long Refomesena kam kasem naoia, i no gat wan taem we ol bigfala skul blong Yurop oli stap seksek bigwan olsem naoia. ?From wanem plante man Yurop oli no moa intres long skul? ?Wanem fyuja i stap blong ol skul?

[Futnot]