’Ol Nyufala Tingting Oli Mekem Plante Kwestin i Stanap

“?OL NYUFALA tingting long saed blong seks,” “fasin blong seks i bosta,” “nyufala tingting long saed blong ol gudfala fasin.” Ol man oli bin yusum ol tok ya blong eksplenem olsem wanem tingting blong ol man i stap jenis long saed blong seks, antap moa, raonabaot long yia 1965 mo biaen. Plante man oli bin yusum tok ya “fasin fri long saed blong lav,” we hem i minim se ol man mo woman oli stap tugeta be oli no wantem mared, no oli slip wanples bifo we oli mared.

Wan man blong raetem ol buk, Ernest Hemingway, i talemaot tingting blong hem i se: “Gudfala fasin i minim fasin we yu haremgud blong mekem, mo nogud fasin i minim fasin we yu harem nogud long hem, afta we yu mekem.” Ol tok ya oli soemaot tingting blong plante man long ol yia afta 1965. Oli bilivim promes ya se oli save kam fri long saed blong seks mo haremgud tumas from. Olgeta we oli folem tingting ya, oli no harem nogud blong slip olbaot wetem plante defren man mo woman. Ale, oli traem ol defren rod blong kasem samting we olgeta wanwan oli wantem long saed blong seks. Oli bitim mak long ol fasin ya, blong mekem se oli save “haremgud” long saed blong seks. Meresin blong blokem woman i no gat bel, we i kamaot long ol yia ya tu, i mekem se oli go moa long ol rabis fasin long saed blong seks.

Be, AIDS mo ol narafala sik blong seks oli olsem frut blong ol rabis fasin ya. From samting ya, ol nyufala tingting ya long saed blong seks we ol man ya blong mekem rabis fasin oli folem, oli stat seksek. Sam yia bifo, i gat wan store long nyuspepa ya Time, we nem blong hem se, “Seks Long Ol Yia Afta 1980—Ol Nyufala Tingting Oli Finis.” Tok ya i kamaot from ol sik long saed blong seks we oli stap kasem fulap man Amerika long taem ya. !Kam kasem naoia, namba blong ol man long fulwol we oli gat AIDS, i kolosap 30 milyan! !Yumi sapraes tumas long bigfala namba ya!

Fraet blong kasem wan sik blong seks i mekem wan narafala jenis i kamaot long tingting blong plante man, long saed blong fasin blong slip olbaot. Long 1992, US, wan buk we i tokbaot ol samting we man i save mekem blong spel mo haremgud, i storeyan long wan stadi we gavman i mekem, i se: “Samwe 6.8 milyan woman we oli no mared, oli jenisim fasin blong olgeta long saed blong seks from we oli fraet long AIDS mo ol narafala sik blong seks.” Store ya i givim wan klia mesej: “Seks i no wan pleplei. Yu mas rere blong kasem frut blong hem.”

?Olsem wanem ol yia ya we oli fulap long ol trabol olsem, oli bin jenisim tingting blong ol man long saed blong seks? ?Oli lanem sam lesen from ol man ya we oli sakemaot ol gudfala fasin mo folem fasin fri long saed blong lav? ?Oli lanem samting from ol nogud sik long saed blong seks we oli kam antap afta 1980? ?Fasin ya blong tijim ol pikinini long saed blong seks long skul, i givhan long ol yangfala blong folem gudfala fasin long saed blong seks? ?Wanem nao beswan rod blong winim traem ya blong ol nyufala tingting long saed blong seks we plante man oli folem tede?