Ol Yangfala Oli Askem . . .

?Olsem Wanem Taem Papa Mama Oli Laekem Brata No Sista Blong Mi Moa?

“Sista blong mi i smol moa long mi long tu yia, mo papa mama blong mi oli soem moa intres long hem i bitim mi. . . . Hemia i no stret nating.”—Rebeka.a

SIPOS papa mama blong yu oli soem moa intres long brata no sista blong yu, maet yu harem olsem se yu yu no moa haf blong famle. Mo sipos wan smol brata no sista blong yu i gat gudhan long wan samting, no sipos hem i stap fesem wan problem, no maet i laekem mo i intres long sam samting we papa mama blong yu oli laekem tu, !ating bambae yu faenem i had jes blong pulum smol intres nomo blong tufala i kam long yu! Moa yu tingbaot samting ya, moa ol filing blong yu oli trabol mo yu kros.b

Be, Baebol i givim advaes ya se: “Yufala i save harem nogud, be yufala i no mas sin. Taem yufala i stap long bed blong yufala, i gud yufala i tingtinggud long ol samting ya, nao yufala i stap kwaet.” (Ol Sam 4:4, NW) Taem yu harem nogud mo yu kros, i isi blong talem no mekem wan samting we maet biaen yu sore from. Tingbaot olsem wanem we Ken i kam kros from we brata blong hem Ebel, i gat wan gudfala nem long fes blong God. God i givim woning long Ken se: “Fasin nogud ya blong yu i olsem wan wael anamol we i stap kolosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem.” (Jenesis 4:3-16) !Ken i no bos long ol filing blong hem, mo samting we i kamaot biaen i nogud olgeta!

I tru se, bambae yu no kam wan man blong kilim man i ded olsem Ken. Be, nating se i olsem, ol narakaen tingting mo filing oli save stat kamaot long yu taem papa mama blong yu oli mekem i moa gud long brata no sista blong yu. !Maet i gat sam denja i stap olsem wael anamol we i stap kolosap long doa blong yu! ?Wanem sam long ol denja ya? ?Mo olsem wanem yu save bos long ol filing olsem?

!Holem Tang Blong Yu!

Taem Beth i gat 13 yia, hem i tingting se papa mama blong hem oli stap mekem i no stret long hem, from we oli laekem moa smol brata blong hem i bitim hem. Hem i tingtingbak, i se: “Mi mo mama i stap tok strong long mitufala oltaem, be samting ya i no mekem wan gudfala samting i kamaot. Mi mi no stap lesin long samting we hem i talem, mo hem tu i no stap lesin long samting we mi stap talem, taswe mitufala i neva winim wan gudfala samting from.” Ating yu tu yu luksave se fasin blong singaot strong i mekem trabol i kam moa nogud nomo. Efesas 4:31 i talem se: “Yufala i mas lego olgeta fasin blong kros. Yufala i mas no holem kros, mo yufala i mas no kros kwik. Yufala i mas no sakem tok blong yufala i go antap, mo yufala i mas no tok nogud long yufala. Mo yufala i mas finis long fasin ya we yufala i stap badfren long yufala.”

Yu no nid blong singaot strong blong talemaot tingting blong yu. Wan toktok we i kwaet i save wokgud moa. Proveb 25:15 i talem se: “Wetem longfala tingting man i save winim wan komanda blong ami, mo wan tang we i kwaet i save brekem wan bun.” Taswe, sipos i luk olsem we papa mama blong yu oli laekem moa brata no sista blong yu, yu no mas singaot strong mo jajem tufala. Wet long wan taem we i stret, nao toktok wetem tufala long fasin we i kwaet mo i soem respek.—Skelem wetem Proveb 15:23.

Sipos tingting blong yu i stap nomo long ol mastik blong papa mama blong yu mo long tingting ya se oli stap mekem i “no stret” long yu, ale, bambae yu mekem se oli go longwe long yu mo oli save kam olsem enemi blong yu. I moagud blong tingbaot olsem wanem fasin blong olgeta i gat paoa long yu. (Yu save talem se, ‘Mi mi harem nogud tumas taem yutufala i mekem olsem we mi mi no stap.’) I sua se, samting ya bambae i givhan moa blong pulum tufala blong tinghevi long filing blong yu. Mo tu, yu mas “rere blong lesin.” (Jemes 1:19) Maet i gat sam impoten risen we i mekem se papa mama blong yu oli soem moa intres long brata no sista blong yu. Ating hem i stap kasem sam trabol we yu yu no save long hem.

Be, ?olsem wanem sipos yu yu gat fasin blong lego ol strong tok taem yu kros, we yu no tingtinggud fastaem? Proveb 25:28 i talem se wan “man we i no save holemtaet filing blong hem,” hem i sem mak long wan taon we i “no gat stonwol i goraon long hem.” Man ya bambae i kasem trabol from ol prapa filing blong hem nomo. !Defren olgeta, taem yumi naf blong bos long ol filing blong yumi samting ya i soemaot se yumi wan strong man! (Proveb 16:32) Taswe, bitim we yu lego olgeta filing blong yu, ?from wanem yu no wet go kasem we yu no moa kros, maet long nekis dei nomo? Ating bambae yu faenem tu se i gud blong gowe blong smoltaem long samting ya we i mekem yu yu trabol, maet yu wokbaot i go samples, no mekem smol eksasaes. (Proveb 17:14) Taem yu bos long maot blong yu, yu save blokem yu wan blong talem wan tok we i mekem narafala i soa no we i krangke nomo.—Proveb 10:19; 13:3; 17:27.

Fasin Blong No Obei We i Stap Haed

Wan narafala trap we yumi mas lukaot long hem, hemia fasin blong no obei. Marie, we i gat sikistin yia, i luksave se neva papa mama blong hem oli panisim smol brata blong hem taem hem i spolem Baebol stadi blong famle. Hem i harem nogud tumas from fasin ya, taswe hem i mekem wan “straek.” Hem i no moa wantem joen long famle stadi. ?Yu yu traem finis blong yusum rod ya blong no toktok nating, blong soem se yu harem nogud? ?Yu yu folem fasin ya we yu no wantem wokgud wetem ol narafala taem yu harem se wan samting i no stret wetem tingting blong yu?

Sipos yes, yu mas luksave se ol fasin ya we oli haedem filing blong yu, oli go agensem oda blong Baebol se yu mas ona mo obei long papa mama blong yu. (Efesas 6:1, 2) Antap long hemia, fasin blong no obei bambae i spolem fasin fren we yu gat wetem papa mama blong yu. I moagud blong tokbaot ol problem blong yu wetem papa mama blong yu. Proveb 24:26 i soemaot se wan man “we i stap ansa long fasin we i klia,” bambae i pulum ol narafala blong respektem hem. Taem Marie i tokbaot bisnes ya wetem mama blong hem, tufala i kasem save long tingting blong tufala, mo ol samting oli kamgud moa.

Denja Blong Stap Yu Wan

Wan narafala nogud fasin blong folem taem papa mama i mekem i moagud long brata no sista blong yu, hemia blong no moa joen tumas wetem famle, be blong kampani wetem sam man we oli no folem Kristin bilif. Hemia samting we i hapen long Cassandra: “Mi no moa joen wetem famle blong mi mo mi stat gat ol fren blong wol we mi mitim olgeta long skul. Mi gat sam boefren tu, mo papa mama blong mi oli no save nating. Biaen, mi harem nogud tumas from we tingting blong mi i stikim mi long samting ya we mi save se i rong blong mekem. Mi wantem ronwe long trabol ya, be mi no save olsem wanem blong talemaot samting ya long papa mama blong mi.”

Hem i wan denja blong stap yu wan nomo, we yu no moa joen wetem famle blong yu mo ol narafala man blong bilif—antap moa, taem yu harem nogud mo tingting blong yu i no kliagud. Proveb 18:1 i givim woning ya se: “Hemia we i stap hem wan oltaem bambae i tingbaot hem wan nomo; bambae hem i agens long ol waes ya we i save wok.” Sipos i hadwok long yu blong talemaot bisnes ya long papa mama blong yu naoia, go luk wan Kristin fren, olsem hemia we Proveb 17:17 i tokbaot se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” Plante taem, yumi save faenem “wan trufala fren” olsemia long medel blong ol olfala man mo woman blong kongregesen.c

Cassandra i faenem “wan trufala fren” long taem ya we hem i gat nid: “Taem seket elda [brata we i goraon] i visitim kongregesen blong mifala, papa mama blong mi oli pulum mi blong wok wetem hem. Hem mo waef blong hem, tufala i no flas nating, mo tufala i soemaot trufala intres long mi. Mi save toktokgud wetem tufala. Mi no harem olsem se bambae tufala i jajem mi. Tufala i luksave se, nating sipos yu gruap olsem wan Kristin, samting ya i no minim se yu stretgud olgeta.” !Tufala i leftemap tingting blong Cassandra mo givim ol gudfala advaes olsem hem i nidim!—Proveb 13:20.

Denja Blong Wantem Samting Blong Narafala

Proveb 27:4 i givim woning ya se: “Bigfala kros i save mekem raf fasin i kamaot, mo fasin blong faerap long kros i olsem bigfala wora we i ron. Be, ?hu i save stanap fored long fasin jelas?” Fasin blong wantem samting blong narafala mo fasin blong jelas long smol brata no sista, i pulum sam yangfala blong mekem fasin we i raf. Wan woman i talemaot se: “Taem mi mi smol, hea blong mi i no naes, i smol nomo, mo i braon. Be sista blong mi i gat naesfala hea we i longfala mo i tik, kala blong hem i kolosap olsem gol. Oltaem nomo, papa blong mi i stap mekem plante toktok blong leftemap sista blong mi from hea blong hem. Hem i singaot sista blong mi se ‘Ripansel.d’ Wan naet, taem sista blong mi i stap slip, mi tekem sisis blong mama blong mi, mi wokbaot sloslou i go kolosap long bed blong hem mo mi katemaot olgeta hea we mi save katem.”−Siblings Without Rivalry, we Adele Faber mo Elaine Mazlish i raetem.

Taswe, yumi no sapraes we Baebol i tokbaot fasin ya blong wantem samting blong narafala man, se hem i wan rabis ‘wok blong bodi’ nomo. (Galesia 5:19-21; Rom 1:28-32) Be, fasin ya blong ‘wantem samting blong narafala man’ hem i stap insaed long yumi evriwan. (Jemes 4:5) Taswe, sipos yu stat plan blong mekem trabol long smol brata no sista blong yu, maet blong mekem hem i sem, no sam narafala samting bakegen blong daonem hem, !ating fasin ya blong wantem samting blong narafala man i stap “olsem wan wael anamol kolosap long doa,” mo i stap traem blong winim yu!

?Yu mas mekem wanem sipos yu faenem se yu stat blong gat ol filing ya we oli denja? Fastaem, prea long God blong kasem tabu speret blong hem. Galesia 5:16 i talem se: ‘Sipos tabu speret i stap lidim yufala, bambae yufala i no stap mekem ol samting ya we tingting blong yufala nomo i wantem.’ (Skelem wetem Taetas 3:3-5.) I gud tu blong tingbaot ol trufala filing we yu gat long smol brata no sista blong yu. ?Yu save talem tru se yu no gat lav long hem nating—nomata se yu kros? Baebol i talem long yumi se, ‘lav i no save jelas.’ (1 Korin 13:4) Taswe, yu mas traehad blong no holem ol tingting we oli nogud, mo we oli pulum yu blong wantem samting blong narafala. Traem glad wetem brata mo sista blong yu sipos yu luk se papa mama blong yu oli gat spesel intres long hem.—Skelem wetem Rom 12:15.

Storeyan wetem papa mama blong yu i save halpem yu long saed ya tu. Sipos tufala i luksave se yu nidim we tufala i intres moa long yu, samting ya bambae i halpem yu bigwan blong winim ol filing blong yu blong wantem samting we smol brata no sista blong yu i gat. Be, ?olsem wanem sipos ol samting oli no kamgud long haos blong yu, mo papa mama blong yu oli gohed blong mekem i gud moa long brata sista blong yu? Yu no mas kros, singaot strong, mo mekem stronghed agensem papa mama blong yu. Traem holem fasin we yu givhan mo obei oltaem. Sipos i nidim, lukaot help blong olgeta we oli bigman finis insaed long Kristin kongregesen. Antap moa, kam kolosap long Jeova God. Rimemba tok blong man blong raetem Ol Sam se: “Papa mo mama blong mi, maet tufala i save lego mi, be yu, Hae God, bambae yu stap lukaotgud long mi oltaem.”—Ol Sam 27:10.

[Futnot]

[Tok blong pija long pej 19]

Sipos yu talemaot filing blong yu we yu harem olsem se oli no intres long yu, maet samting ya i save stretem problem ya