Winim Problem Ya Long Fulwol—?I Gat Rod Blong Mekem Olsem?
OL MAN blong bigsave oli agri se Tibi (tuberculosis) i wan problem we i kasem olgeta ples blong wol, mo i nidim wan rod blong winim problem ya long fulwol wantaem. I no gat wan kantri we i save blokem sik ya Tibi hem wan nomo, from we evri wik i gat plante milyan man we oli wokbaot i go olbaot long wol.
Plante man oli tingting se, blong olgeta kantri blong wol oli wok tugeta long problem ya, ol rij kantri oli mas halpem ol pua kantri, we olgeta nao oli kasem moa Tibi. Olsem Dokta Arata Kochi i talem, “ol rij kantri oli waes sipos oli halpem ol pua kantri blong traem winim Tibi, bifo we sik ya i kam bigwan long kantri blong olgeta tu.”
Be ol rij kantri, oli bisi tumas long ol samting we oli ting se i moa impoten mo oli gat ol prapa problem blong olgeta tu, taswe oli no spid blong givhan long ol pua kantri. Sam pua kantri tu oli no lukaotgud blong folem ol rod blong mekem helt blong man i gud, oli westem mane nomo blong pem ol tul blong faet. Long medel blong yia 1996, long olgeta sikman we oli gat Tibi long wol, 10 pesen nomo oli kasem meresin ya we oli kolem DOTS, namba ya i smol tumas sipos yumi wantem blokem sik ya blong i no kam nogud moa.
WHO i talem se: “Blong plante yia finis, yumi gat save mo meresin we i no sas blong winim sik ya Tibi. Wanem we wol i nidim naoia, hemia se olgeta man we oli gat paoa, waes mo fasin sore, oli mas wok strong long ful wol mo meksua se yumi yusumgud olgeta meresin ya.”
Wan Samting i Stap Kam We Bambae i Winim Sik Ya
?Yumi save trastem ol man we oli gat bigfala paoa mo haenem blong oli stretem problem ya? Tabu speret i pusum wan man blong raetem tok ya long Ol Sam long Baebol se: “Yufala i no mas trastem ol lida blong wol ya. Ol man ya oli no save sevem yufala.” Taswe, ?hu nomo we yumi save trastem? Vas ya i gohed blong talem se: “Hae God ya we i God blong Jekob, hem i mekem skae mo graon mo solwora, wetem olgeta samting we i stap long ol ples ya, mo man we i putum tingting blong hem i stap long hem, mo i stap lukluk long hem blong i givhan long hem, man ya bambae i harem gud.”—Ol Sam 146:3, 5, 6.
Jeova God we i Mekem Plan blong wol mo i Wokem wol ya, i gat paoa mo waes we i nidim blong finisim ol sik. ?Hem i gat sore? Jeova i pulum wan profet blong talemaot promes blong hem se: “Bambae mi mi soemaot sore long ol [man blong mi], long sem fasin we wan man i soem sore long pikinini boe blong hem we i stap mekem wok blong hem.”—Malakae 3:17.
Laswan japta blong Baebol i tokbaot wan vison we aposol Jon i luk. Hem i luk “ol tri blong laef, we oli stap karem frut blong olgeta twelef taem long wan yia, wan taem long wan manis.” Ol tri ya mo frut we oli givim, oli pija blong samting we God bambae i yusum blong mekem se olgeta man we oli obei long hem, oli laef olwe long wol.—Revelesen 22:2.
Jon i gohed, i raetem se: “Lif blong ol tri ya oli blong tekemaot sik blong ol man blong ol kantri long wol.” Ol lif ya oli minim olgeta blesing we God bambae i mekem i kamtru, blong olgeta man oli save kamgud bakegen long saed blong speret mo bodi tu. Taswe, yumi save sua se long nyufala wol we stret fasin nomo bambae i stap long hem, aninit long rul blong God, Tibi bambae i lus mo i finis blong olwe.—Revelesen 21:3, 4.
[Tok blong pija long pej 8]
God i promes blong karemaot ol sik blong olwe