Paoa Blong Miusik
“Mam we i wari mo i trabol tumas, miusik nomo i gat paoa blong kwaetem tingting blong hem wantaem.”
HEMIA tok we William Congreve i raetem 300 yia bifo finis long sing buk blong hem Hymn to Harmony. Long ol faswan handred yia, ol olfala hanraet blong Grik oli talem se “trening long saed blong miusik i wan tul we i gat paoa bitim enikaen tul, from we ol not mo saon blong miusik oli save go dip insaed long laef blong man.”
Sam papa mama oli luk trutok blong samting ya long ol yangfala blong olgeta. Ol yangfala ya oli no moa glad mo oli no save joengud wetem famle afta we oli bin stap lesin long miusik ya we oli kolem hevi metal. Samting ya tu i kamaot long ol yia 1930 mo 1940 long Jemani, taem ol Nasi oli maj wetem miusik we i wekemap filing blong man blong rerem olgeta blong lesin long ol tok blong Hitler we oli gat paoa.
Taswe i tru nomo se, miusik i save gat paoa long tingting mo hat, mo i save lidim tufala blong folem samting we i gud no samting we i nogud. Eksampel, fasin blong letem ol pikinini oli lesin long sam kaen miusik i save givhan long olgeta blong oli gru long tingting mo filing blong olgeta. Samtaem ol man we oli no save toktok gud, oli save singim wan ful laen blong wan sing we i had wok blong oli talem taem oli toktok nomo.
Anthony Storr i soemaot long buk blong hem Music and the Mind se, i wan samting blong sapraes blong luk paoa we miusik i gat long ol man we oli gat sik long ol nev mo we oli no save muvum bodi blong olgeta. Storr i tokbaot eksampel blong wan sik woman se: “Hem i no save muvum bodi blong hem from sik ya [Parkinson]. Hem i stap kwaet nomo we i no muvmuf nating go kasem we hem i tingbaot ol tiun blong miusik we hem i bin harem taem hem i yangfala yet. Samting ya nao i mekem se wantaem nomo, hem i save muvmuf bakegen.”
Wan Samting Blong Lukaot Gud Long Hem
I luk olsem se miusik i gat paoa blong givhan long man blong harem gud. Be, i gat denja i stap se ol man we oli gat kruked fasin mo we oli griri, oli save yusum paoa blong miusik olsem wan tul blong kilim man i ded. Sam stadi oli soemaot se fasin we man i no moa laekem blong joen mo kampani wetem narafala i joen wetem sam kaen miusik.
Buk ya Psychology of Women Quarterly i sapotem ol tok ya long ripot blong hem se: “I gat pruf blong sapotem toktok ya se, fasin blong lukluk ol video blong rok miusik i save gat paoa long wan man olsem taem we hem i lukluk ol video blong rabis fasin long saed blong seks. Hemia from we sam man we oli bin lukluk ol video blong rok miusik we i raf, oli no moa gat sore nating mo oli agensem strong waef blong olgeta, i bitim ol man we oli bin lukluk ol video blong rok miusik we i no gat raf fasin long hem.”
I no ol man nomo we miusik i gat paoa long olgeta. Miusik i save gat paoa long ol woman tu. Semfala ripot ya i talem se: “Man mo woman tugeta, oli save stat blong laekem ol nogud mesej we ol singsing ya oli stap talemaot blong daonem ol woman olsem se oli nating.”
Niuspepa ya Sex Roles i agri wetem ol tok ya, hem i se: “Wan stadi we oli mekem i no longtaem . . . i faenem se tufala problem ya we wan yangfala i gruap insaed long wan famle we i no gat glad, mo i lukluk tumas video blong miusik, tufala i joen bigwan wetem ol rabis fasin blong seks we oli stap kamaot long laef blong plante yangfala woman.” Ol pija blong raf fasin mo ol klia rabis toktok long saed blong seks insaed long sam rap miusik, oli mekem se wan jaj blong wan taon long Yunaeted Stet i talemaot stret olsem wan rul se miusik blong wan kaen grup blong rap i “rabis tumas blong ol man long wan komuniti oli harem.”
?Jaj ya i strong tumas long saed ya? !No gat! Niuspepa ya Adolescence i talem se: “Ol yangfala mo papa mama blong olgeta oli talemaot klia se i gat moa trabol long laef blong ol yangfala we oli stap lesin long miusik blong hevi metal mo rap.” Ol trabol olsem oli kamaot from ol “fasin blong kros bigwan mo blong spolem ol samting” mo blong no kasem ol gudfala mak long skul.
Yes, i gat inaf pruf blong soemaot se sam kaen miusik oli joen wetem ol fasin long saed blong seks, fasin we man i kilim hem wan i ded, mo fasin blong no joengud wetem narafala. ?Be samting ya i minim se evri miusik i joen wetem ol nogud fasin? Ridim ol haf we oli kam biaen blong luk wanem we oli talem long saed ya.
[Tok blong makem poen long pej 4]
Miusik i save gat paoa long tingting mo hat, mo i save lidim tufala blong folem samting we i gud no samting we i nogud