?Pleplei We i No Save Mekem Trabol Long Yu No i Save Spolem Tingting?

Long wan konset blong rok myusek, wan man we i mekem konset ya i putum wan woman insaed long wan bokis mo i stat blong katem bokis ya wetem wan akis. Gyaman blad i sut i kam antap long maot blong man ya, we hem i spet aot i go long olgeta man we oli stap lukluk konset ya.

Long 1984 wan boe we i gat 19-yia i sutum hem wan i ded. Papa mama blong hem oli talem se hem i kilim hem wan from ol toktok blong wan rok myusek we oli kolem “Ansa Long Fasin Blong Kilim Yu Wan i Ded.”

Wan magasin blong ol yangfala i tokbaot ol krangke fasin long saed blong seks we ol memba blong wan grup blong plei myusek oli stap mekem long rum we oli stap jenis long hem mo tu long studio taem oli stap rikodem myusek. I gat wan nogud pija long wan albam blong rok myusek we i soem wan man mo woman we oli neked.

FASIN blong faet, fasin we man i kilim hem wan, mo nogud fasin long saed blong seks—hemia sam nomo long olgeta rabis tok we oli stap long ol kaset blong rok myusek, long ol video, mo long ol konset. Taem ol man oli rao from ol nogud program ya mo ating oli putum long kot, ol man blong singsing mo ol kampani we i stap mekem ol kaset ya oli traem blong mekem eskyus blong kavremap ol nogud poen long ol myusek ya. Eksampel, oli talem se naoia wan nogud pija long saed blong seks i stap sapotem toktok long saed blong “kruked tingting long Sosaeti blong ol man Amerika mo olsem wanem hem i stap spolem yumi.” I sem mak, long sam myusek, ol tok haed we oli stap yusum blong talem samting blong man (hemia olsem ol masket no ol naef) naoia oli stap talem se oli minim ol prapa masket mo naef nomo.

Ol man blong singsing mo ol kampani we oli stap rikodem ol myusek maet oli no save kasem panis long kot, ?be oli rili stap trikim ol man? ?Oli stap trikim yu? ?Yu yu save haedem se fasin blong faet, seks, mo wok blong ol rabis speret oli no impoten haf insaed long rok myusek we oli stap salem tede?

Hevi Metal Mo Rap Myusek

Long ol yia we oli pas, oli bin mekem plante defren kaen rok myusek. Tufala stael, hevi metal mo rap myusek, naoia ol man oli agensem tufala from oli sapraes long fasin blong olgeta we i no stret nating.

Kolosap evri hevi metal myusek oli strong, oli gat bigfala noes wetem plante bit blong hem. Time magasin i soemaot se, “Ol man blong plei long metal myusek oli mekem myusek blong olgeta i laenap wetem narakaen tingting blong olgeta we oli lesin long myusek ya, bighaf blong olgeta oli yangfala waet boe. Oli mekem olsem taem oli soemaot olgeta olsem ol man we oli stap olgeta nomo we oli bin tanem baksaed blong olgeta long kruked fasin blong ol narafala man.” Plante long ol hevi metal oli mekem blong mekem man i sapraes. Sam tok blong hem i tabu blong prentem. Wan nyuspepa blong ol dokta blong Teksas i talem se plante long ol tok blong hevi metal oli leftemap “ol krangke tingting long saed blong seks, fasin blong faet, fasin blong agensem narafala man mo fasin blong mekem majik.”

Fasin blong faet we hevi metal i stampa blong hem i wan narafala samting we ol man oli stap wari long hem. Eksampel, taem oli mas stopem wan so from we man we i stap singsing i sik, ol man oli faet mo tu oli bonem ples blong pleplei. Long wan narafala konset trifala yangfala oli ded from oli no moa save pulum win taem plante taosen man oli muf kwiktaem i go long platfom, man we oli fas long hem i foldaon mo biaen oli wokbaot antap long hem.

Long rap myusek, ol man oli stap kolem tu se hip-hop, wan man blong singsing (sipos no, plante man blong singsing) i talem ol toktok bakegen mo bakegen biaen long wan saon we i gat ol bit, plante taem oli mekem saon ya wetem wan kompyuta mo oli kolem ‘sampling’. Plante blakman nao oli stap mekem ol rap myusek be oli salem long ol blakman mo oli waetman tu. Wanwan long ol mesej blong rap oli gud, oli agensem ol fasin olsem fasin blong mekem nogud long pikinini mo nogud fasin blong yusum ol drag. Be, kolosap olgeta rap myusek oli tokbaot fasin blong agensem gavman, fasin blong faet, agensem ol woman, mo fasin blong no laekem ol man blong narafala kantri. Plante haf oli gat ol tok swea mo oli tokbaot ol nogud fasin long saed blong seks.

Fasin blong faet i bin stap olsem wan problem long sam konset blong rap myusek. Long wan konset, 300 memba blong wan gang oli faet agensem olgeta man we oli stap, mo ol man we oli stap oli yusum ol aean jea blong faet bak kasem taem we ol polis man oli kam mo oli stopem konset ya. Fotefaef man oli kasem kil.

Las yia, Serivs Asosiesen blong Nyu Yok i wantem blokem olgeta fim we Time Warner, Inc., i stap givimaot, kasem taem we kampani ya i no moa salem kaset ya blong rap myusek we oli kolem, “Cop Killer”. Bos blong grup blong serivs, Peter Kehoe, i talem se: “Kaset ya i leftemap fasin blong agensem narafala mo oli givim ona long fasin blong kilim ol polis. Olsem wan samting we i kamaot from singsing ya, bambae oli kilim ol polis.” Biaen, oli no moa salem.

?Trabol i Save Kamaot From?

Taem ol man blong singsing oli singsing long saed blong fasin nogud no oli soemaot fasin ya long platfom, ?fasin ya i save gat paoa olsem wanem long olgeta we oli lesin mo olgeta we oli stap lukluk? Tingbaot ol toktok mo ol ekspiryens ya.

Dokta Carl Taylor, namba tu tija long saed blong fasin blong jajem ol man blong brekem loa long Mijigan Yunivesiti, i talem se ol man blong rok myusek oli stap “leftemap wan stael blong laef. . . . Ol memba blong grup blong myusek ya oli mekem samting we i gat paoa long ol pikinini, i bitim mak.”

Wan boe we i no ded taem hem i traem blong kilim hem wan i talem se myusek ya i mekem se hem mo fren blong hem (we hem i kilim hem wan i ded) i gat tingting se “blong winim trabol long laef i minim se yu mas ded.”

Long 1988 tri yangfala oli kilim wan fren from oli stap mekem plei nomo from samting ya. Wan long olgeta i talem se hevi metal myusek i mekem se oli wantem faenemaot long saed blong ded.

Biaen long wan konset blong rap, ol yangfala oli faet mo oli gohed blong brekem windo. Wan haeman blong Pitasbeg, Pensylvania, i talem se: “Mi bilif se rap myusek i leftemap fasin blong faet.”

Wan stadi blong ol yangfala mo ol grup we oli stap wosip long Setan i soemaot se plante long olgeta we oli joen long fasin blong wosip long Setan oli bitim mak long fasin blong yusum drag mo fasin blong lesin long hevi metal myusek, we i leftemap fasin blong yusum drag mo nogud fasin blong seks. Samting we i kamaot se, i isi nomo blong ol grup we oli stap wosip long Setan oli pulum ol yangfala man.

Yes, taem samting ya i pusum ol yangfala blong yusum drag, fasin blong brekem loa, no fasin blong kilim olgeta bakegen, i gat wan samting bakegen biaen long fasin ya bitim myusek nomo. Bigfala samting biaen long hem se famle laef mo sosaeti blong man oli stap seraot. Be myusek i save stap olsem wan samting we i mekem trabol ya i kamaot, hem i leftemap tingting blong ol yangfala blong mekem ol samting we maet oli no gat tingting blong mekem. ?Ol man we oli harem nogud finis from trabol blong laef oli nidim myusek we i stap pulum olgeta blong spolem laef blong olgeta mo ol narafala?

Samting we yumi wantem save se nogud myusek i save spolem tingting blong man we oli lesin. Tingbaot, ol mesej we oli kamaot long myusek ya oli gat moa paoa from oli kamaot long ol nambawan man blong plei myusek, ol man we ol narafala oli leftemap olgeta, we kolosap ol man we oli laekem myusek blong olgeta oli wosip long olgeta.

?Olsem Wanem Long Yu?

?Yu stap lesin long wanem kaen myusek? Ating yu stap lukaotgud finis long ol myusek we yu stap jusum, mo hemia i gud tumas. Be, sipos yu yu stap long medel blong olgeta we oli lesin long myusek we oli nogud no oli gat fasin we i no stret, ?samting ya i bin gat paoa long yu? Sipos fasin blong yu i no bin jenis yet, ?yu save talem stret se tingting blong yu i no bin kam nogud? Antap moa, fasin blong lukluk oltaem ol rabis samting i save spolem tingting blong yu, i save mekem yu yu harem se rabis samting ya i oraet nomo.

Tingbaot eksampel blong wan yangfala we i traem blong joenem laef blong hem olsem wan Kristin wetem hevi metal mo rap myusek. Samting ya i no pulum hem blong mekem ol fasin olsem fasin blong kilim man, fasin we man i kilim hem wan, no fasin blong wosip long Setan. Be makemgud olsem wanem samting ya i mekem trabol long tingting blong hem. Hem i talem se: “Myusek ya i olsem anamol stret. Hem i mekem mi mi gat fasin we i kwaet be long semtaem mi save mekem fasin nogud mo ol raf fasin bitim mak. . . . Mi mi stap long wan wol blong mi wan we mi tingbaot fasin blong agensem narafala man. I no gat wan dei i pas we mi no tingbaot fasin blong kilim mi wan i ded.” Hem i mekem disisen blong jenisim fasin blong hem blong lesin. Taem hem i jenisim, tingting blong hem i kamgud.

Ol man we oli leftemap ol rabis myusek bambae oli toktok blong traem kavremap ol rabis fasin insaed long rok myusek. ?Be wanem tingting blong yu? ?Yu save satem ae mo blokem sora blong yu long fasin ya blong bitim mak long ol rabis fasin ya insaed long myusek ya? ?Bambae yu go long ol konset olsem olgeta we yumi tokbaot fastaem we yu no fraet long laef blong yu? ?Olsem wanem long ol fasin we oli kamaot from ol myusek ya, olsem ol fasin blong sem we ol man blong hem oli mekem mo ol man we oli stap lesin?

Sipos yu lukaotgud long bodi blong yu, bambae yu ronwe long ol kakae we oli save mekem nogud long bodi blong yu nating sipos yu harem gud long olgeta. Rabis myusek, nating se rok no ol narafala stael, i save spolem gudfala tingting blong yu. ?Yu yu wantem joen long ol pleplei we oli save spolem tingting blong yu? No gat. Ale, ?yu save mekem wanem blong gat wan gudfala tingting, stret tingting long bisnes ya? Plis luklukgud long ol poen we oli stap long nekis haf.

[Bokis/Foto blong pija long pej 6]

?Wanem Ya Fasin Blong Wosip Long Setan?

Wosip long Setan, we sam long ol singsing blong hevi metal myusek oli leftemap, i no blong pleplei nomo. Texas Medicine/The Journal i eksplenem se wosip olsem i stat long ol fasin we “oli no save mekem trabol long ol man olsem kastom blong jyos blong dring blad blong olgeta taem oli gat wan kil mo anamol we oli kilim blong mekem sakrifaes.” Ol man blong wosip long Setan oli talemaot “se oli ona long Devel Setan. Oli yusum sam kastom blong jyos blong pulum paoa blong Setan i go. . . . Bilif ya long fasin fri blong mekem disisen mo blong mekem wok i minim yu save mekem wanem samting we yu wantem be yu no nidim God, yu no save sem, mo voes blong hat mo tingting i no save jajem yu from.” Samting we i kamaot se, sam man oli joen long fasin blong brekem loa we oli no gat sem nating.

[Tok blong pija long pej 5]

Yu no save putum doti i go insaed long bel blong yu. ?From wanem yu putum long tingting blong yu?

[Tok blong pija long pej 7]

?Yu yu haremgud blong joen long wan taem olsem?