?Myusek i Rili Save Mekem Trabol Long Yu?
TINGBAOT samting ya: Wan man we i savegud yu long ples blong wok i askem yu blong go kakae long haos blong hem. Yu akseptem. Taem yu stap long haos blong hem long naet ya, yu luk sam samting blong sapraes long saed blong man ya we i invaetem yu. Hem i gat wan fasin blong spolem narafala man, hem i soemaot tingting blong man we i wantem kilim hem wan, i tok swea, mo i leftemap wosip long Devel Setan. Nao, ?bambae yu gat tingting blong spenem wan narafala naet long kampani blong hem? Yu save ansa se “!No gat!”
Mo tu, ?olsem wanem sipos man ya i rikodem ol krangke bilif mo tingting blong hem long naet ya mo i givim kaset ya long yu? ?Bambae yu lesin long kaset ya bakegen mo bakegen? No gat.
Be, hemia nao samting we plante milyan man tede oli stap folem. Samting we i kamaot se, plante man we oli stap lesin long myusek ya oli folem tingting mo fasin we myusek ya i leftemap.
?Yumi stap tokbaot wanem kaen myusek? Kolosap evri stael blong myusek i gat sam rabis samting insaed. Nating se wan man i jusum wan myusek we oli plei gud, myusek blong bifo, no sam narafala myusek, evriwan oli mas gat fasin blong lukaotgud mo blong jusumgud.
Be, i gat sam kaen myusek we oli talemaot klia ol rabis haf blong hem. Samting ya i givim wan spesel traem. U.S.News & World Report i soemaot stampa tok blong hevi metal myusek olsem “fasin blong yangfala blong brekem loa, wetem plante raf fasin blong seks mo ol tingting blong wan man blong kilim hem wan i ded.” Dokta David Elkind i tokbaot sam grup blong rok myusek we oli “bitim mak long tok swea mo fasin blong olgeta i mekem se ol man oli tingting nogud long olgeta rok myusek.” Long sam ples oli putum sam woning long sam albam from ol tok swea mo rabis fasin we oli stap insaed.
?Ol man oli stap blokem nomo ol myusek we wanwan long olgeta oli no laekem, no i gat wan samting we i rili nogud long hem? I gud yumi skelemgud sam rok myusek we naoia oli stap kasem plante ples from ol albam, myusek blong video long televisin, mo ol konset. Lukluk gud olsem wanem samting ya i stap spolem ol man. Ale yu wan yu skelem se pleplei ya i no save mekem trabol long yu no i save spolem tingting blong yu. ?Hemia samting we yu no famle blong yu yufala i mas joen oltaem long hem no blong luklukgud long hem?