!Oli Holem Promes Blong Olgeta!

ANTONIO i stap long laswan yia blong haeskul. Hem i wantem tekem jans blong givim witnes long ol yangfala long klas blong hem. Taswe, hem i askem long histri tija blong hem blong soem video kaset ya Jehovah’s Witnesses Stand Firm Against Nazi Assault long klas. Tija i no rili wantem, be hem i agri blong soem video long olgeta long nekis dei.

Antonio i talem se: “Fastaem, tija i stap lukluk video ya wetem wan fasin we i flas nomo. Be taem hem i luksave se hemia ol bigman blong histri we oli stap talemaot stori blong ol Witnes blong Jeova long ol rabis kalabus blong ol Nasi, nao hem i jes lesingud. Biaen, hem i talem tangkiu long mi from video ya.”

Long nekis lesen, tija i traem blong eksplenem wok blong ol Bibelforscher, hemia nem we oli putum long ol Witnes blong Jeova long Jemani long taem bifo. Be hem i luksave se i moa gud Antonio i eksplenem. Ale, Antonio i eksplenem laef blong ol Witnes mo sam tijing blong olgeta. Long en blong tok blong hem, hem i se: “Sipos ol man oli no lesin long mifala, oli satem doa long fes blong mifala, mo oli no ridim ol buk blong mifala, i klia se oli no save kasem wan gudfala samting from nambawan mesej we mifala i stap talemaot.”

Olgeta fren blong Antonio long klas oli agri wetem tingting ya. Nao tija i talemaot wan plan long klas. Long faswan jans we olgeta oli gat, bambae oli lesin long ol Witnes mo oli karem sam buk blong olgeta. Klas i gohed blong tokbaot video ya blong longtaem lelebet. Tingbaot olsem wanem Antonio i glad long ol dei we oli kam biaen. Hem i luk sam fren blong hem oli kam long skul wetem sam buk we Watch Tower Society i wokem. Wanwan blong olgeta oli talem wetem smael se: “!Yu luk, mi holem promes blong mi!”