!Nating Se Mi Gat Fasin Blong Sem, Bambae Mi Jusum Sem Rod Bakegen!

Mi mi bon long 1934, long taon ya Pescara, long is kos blong Itali klosap long Adriatik Si. Mi mi lasbon blong fo gel. Papa i jusum ol nem blong mifala folem ol leta long alfabet, taswe nem blong mi i stat wetem “D.”

Oltaem Papa i laekem blong lanem ol samting long saed blong God. Long Julae 1943, hem i mitim wan man, nem blong hem, Liberato Ricci. Man ya i stap stadi wetem ol Witnes blong Jehova, mo hem i tokbaot Baebol long Papa mo i givim wan Wajtaoa long hem. I no longtaem, Papa i tokbaot ol samting we hem i lanem wetem ol narafala. Mama tu i laekem trutok. Nating se hem i no save rid mo raet, be hem tu i tokbaot hop we hem i jes kasemsave long hem. Hem i yusum ol vas blong Baebol we hem i lanem baehat.

Smol haos blong mifala i bisi we i bisi. Mifala i mekem ol miting long haos ya, mo nating se i gat tu rum blong slip nomo, be ol eria elda mo sam paenia oli kam slip.

Fasbon mo sekenbon sista blong mi, tufala i no intres long Baebol, mo taem tufala i mared tufala i aot long haos. Be mi mo narafala sista blong mi, Cesira, mitufala i laekem blong lesin long Papa taem hem i ridim Baebol. Mo tu, mitufala i laekem ol tok we ol brata oli givim long smol grup blong mifala.

Plante taem mi folem Papa mo sam narafala i go long wok blong prij. Be from we mi stap sem, i tekem plante manis blong mi mi naf blong talem wan samting long ol man. Nating se i olsem, lav we mi gat long Jehova i stap kam strong moa, nao long Julae 1950, mi mi baptaes. Wan brata i mekem tok blong baptaes long haos blong mifala, mo biaen mifala i godaon long solwota blong mi baptaes. Wan yia biaen, wan kapol i kam long ples blong mifala olsem spesel paenia, mo mi prij oltaem wetem tufala, nao i kam isi moa blong mi toktok wetem ol man. !Sloslo mi laekem tumas blong mekem spesel wok ya blong Jehova!

Desisen We i Jenisim Laef Blong Mi

Faswan eria elda we i kam luk mifala, hemia Piero Gatti.a Hem i enkarejem mi blong mekem wok blong paenia, mo tu, blong muv i go long wan ples we i nidim moa man blong talemaot Kingdom. Hemia wan samting we mi neva tingbaot bifo. Long ples blong mifala, ol gel oli stap wetem papa mo mama blong olgeta go kasem we oli mared. Ale, long Maj 1952, mi stat blong mekem wok blong paenia taem mi stap yet wetem Papa mo Mama. Long taem ya, mi no kasemsave olsem wanem desisen ya bambae i jenisim laef blong mi.

Wan yangfala sista we nem blong Anna, hem tu i wantem stat long wok blong paenia. Ale, hem i kam stap wetem mifala, blong mitufala i save go prij tugeta. Long 1954, oli askem long mitufala blong go mekem wok blong spesel paenia long taon ya Perugia, we i stap 250 kilometa longwe long mifala. I no gat wan Witnes long taon ya.

!Hemia wan niufala samting long mi! Mi gat 20 yia nomo, mo bifo, mi aot long taon blong mi blong go wetem Papa mo Mama long ol asembli nomo. !Naoia mi harem se mi stap go long narasaed long wol! Papa i wari se i no sef blong mi mo Anna i stap mitufala nomo, ale hem i kam wetem mitufala blong faenem wan ples blong slip. Mitufala i rentem wan rum we mifala i yusum olsem Haos Kingdom tu. Blong smoltaem, mitufala nomo i stap long miting. Be mitufala i gat gudtaem long wok blong prij long Perugia mo ol smol taon mo vilej klosap. I no longtaem mitufala i faenem ol man we oli intres. Samwe long wan yia biaen, wan brata i muv i kam long Perugia, mo hem i lidim ol miting. Taem mitufala i aot long taon ya long 1957, i gat wan smol kongregesen i stap.

Mitufala i muv i go long wan smol taon long sentrol Itali, nem blong hem Terni. Mitufala i glad blong prij long Terni from we plante man oli intres. Be i no isi. Nating se rul blong ol Fasis i finis long 1943, samfala oli gohed blong traem blokem wok blong ol Witnes blong Jehova. Mo tu, oli stap talem se mifala i nidim wan laesens blong go long ol haos wanwan.

Plante taem ol polis oli folem ol Witnes blong Jehova. Samtaem mifala i haed taem mifala i joenem wan bigfala hip blong man we oli stap wokbaot, be i no oltaem. Polis i arestem mi tu taem. Long faswan taem, mi stap prij wetem eria elda. Oli tekem mitufala i go long polis stesen, mo mitufala i faen from we mitufala i no gat laesens blong prij. Mitufala i no pem faen ya from we mitufala i no stap brekem loa. !Hat blong mi i pam we i pam! Mi talem tangkiu long Jehova from we mi no stap mi wan. Ol gudfala tok blong Aesea 41:13 oli kam long tingting blong mi, we i se: “Yu no fraet. Mi bambae mi halpem yu.” Oli lego mitufala mo taem kot kes i kamaot, jaj i sakemaot kes agensem mitufala. Sikis manis biaen, oli arestem mi bakegen taem mi stap mi wan. Be bakegen, jaj i sakemaot kes ya.

Sam Moa Janis Blong Mekem Wok Blong Jehova

Mi glad tumas blong go long bigfala asembli long 1954 long Naples, long saot Itali. Mi volontia blong klinim ples blong asembli, mo oli givim wan wok long mi klosap long stej. Long ples ya, mi luk wan naes yangfala paenia brata, nem blong hem Antonio Caparelli we i kam long Libia. Long ol yia 1930, famle blong hem i aot long Itali i muv i go long Libia.

Antonio i smat mo i no fraet. Hem i yusum moto blong go long Draeples Long Libia blong faenem ol man Itali we oli laef longwe. Wanwan taem, mitufala i raetem leta long mitufala. Long 1959, Antonio i muv i kambak long Itali. Hem i spenem sam manis long Betel long Rom, mo afta, hem i go long taon ya Viterbo, sentrol Itali, blong mekem wok blong spesel paenia. Lav blong mitufala i gru, mo mitufala i mared long 29 Septemba 1959. Mi mi joenem Antonio long Viterbo.

Mitufala i nidim wan rum blong slip mo mekem miting. Mitufala i faenem wan rum we i olsem wan smol stoa wetem wan smol ples blong swim biaen. Mitufala i putum bed blong mitufala long kona blong rum, narafala haf i ples blong kuk mo sidaon blong mitufala, be long dei blong miting rum ya i kam Haos Kingdom. Rum ya i no nambawan, mo sipos mi wan nomo bambae mi no jusum blong stap long rum ya. Be mi glad se mi mo Antonio i stap tugeta.

Long 1961, oli askem Antonio blong mekem wok blong eria elda. Be fastaem, hem i mas go long wan skul blong ol elda blong wan manis. Mi harem nogud blong stap mi wan long smol rum ya, speseli long naet. Be mi glad se Jehova i givim blesing ya long Antonio. Mi stap bisi mo hemia i mekem taem i pas kwik.

Mitufala i travel plante, from we eria blong mitufala i stat long Veneto, long not Itali, i go kasem Sisili, long saot. Fastaem mitufala i no gat trak, mitufala i yusum pablik transpot nomo. Wan taem, mitufala i ron long bas long wan rabis rod long Sisili, mo taem mitufala i kasem ples, ol brata oli wet wetem wan dongki blong karem olting blong mitufala. Antonio i stap werem wan traoses, kot mo nektae, mo mi mi jenis gud olsem we mi go long miting. Ating ol man oli laf taem oli luk mitufala i wokbaot wetem ol fama mo wan dongki we i stap karem ol bokis mo taepraeta blong mitufala.

Ol brata oli gat gladhat blong serem olting blong olgeta nating se i smol nomo. Long sam haos i no gat ples blong swim mo tap wota. Long wan ples, mitufala i slip long wan rum we oli no yusum blong plante yia. Long naet mi muvmuv tumas mekem se Antonio i wekemap mi. !Taem mitufala i leftemap ol bedsit, mitufala i sek blong luk se matres i fulap long ol bebet! Mitufala i no save mekem wan samting long medel naet ya, taswe mitufala i jes ronem ol bebet mo traem slip bakegen.

Be i no ol samting ya we mi faenem i had moa. Bigfala problem se mi mi wan woman blong sem. Fastaem we mitufala i visitim wan kongregesen, i had blong mi mi mekem ol niufala fren. Be mi rili wantem givhan long ol sista, taswe mi traehad bigwan. Jehova i givhan long mi, nao long en blong wik, mi harem gud blong joen wetem ol brata mo sista. I wan bigfala blesing blong wok wetem olgeta mo luk se oli glad blong givim samting, oli holemstrong mo oli lavem Jehova.

Afta we Antonio i mekem wok blong eria mo distrik eldab blong sam yia, long 1977 oli singaot mitufala i go long Betel long Rom blong givhan blong mekem rere Intenasnal Asembli long 1978, we nem blong hem “Bilif i Win.” Sam manis biaen, mitufala i kam memba blong Betel famle, mo smoltaem biaen bakegen, Antonio i kam wan memba blong Branj Komiti.

Laef long Betel i wan niufala samting long mi, mo bakegen mi no harem gud fastaem from we mi sem tumas. Be Jehova i blesem mo i halpem mi, mo ol narafala long Betel tu oli givhan, nao i no longtaem mi harem se Betel i hom blong mi.

Narafala Samting We i Had

Long ol yia biaen, i gat wan narafala samting we i had, hemia ol problem blong helt. Long 1984, oli katem hat blong Antonio mo ten yia biaen hem i gat sam narafala problem long helt. Long 1999, hem i faenemaot se i gat kansa. Oltaem hem i wan man we i smat mo i wok had, be hem i no naf blong winim rabis sik ya. Mi mi harem nogud bitim mak blong luk we hem i stap lusum paoa. Mi prea wetem fulhat blong mi long Jehova blong hem i halpem mi blong sapotem gudfala hasban blong mi. Plante taem mi ridim Ol Sam. Oli kamfotem mi taem mi stap wari. Long 18 Maj 1999, Antonio i ded, afta we mitufala i mared blong klosap 40 yia.

Nating se i gat plante man raonabaot long yu, be taem yu harem nogud, i olsem se yu stap yu wan. Olgeta long Betel mo ol narafala brata mo sista aotsaed, oli soemaot bigfala lav mo kamfotem mi. Nating se i olsem, hat blong mi i soa, mo taem mi gobak long rum blong mi long Betel long naet, i no gat tok blong eksplenem olsem wanem mi harem nogud tumas. Prea, stadi, mo taem, i givhan long mi blong kam gud bakegen. Sloslo, mi harem gud blong tingbaot ol gudtaem we Antonio mo mi i serem. Mi laekem yet blong tingbaot ol samting ya, from we mi sua se Antonio i stap long memori blong Jehova mo bambae mi luk hem taem hem i laef bakegen.

Mi bin mekem plante defren wok long Betel, naoia mi wok long ples blong somap ol klos. Mi glad tumas blong mekem wok ya we i givhan long bigfala famle blong mi long Betel. Mo tu, mi traem blong bisi oltaem long wok blong prij. I tru, mi no save mekem plante wok olsem bifo, be mi harem gud yet blong talemaot gud nius blong Kingdom, wan wok we mi lanem blong laekem tumas taem mi wan yangfala nomo. Taswe oltaem mi enkarejem ol yangfala blong paenia. Mi save gud olsem wanem wok ya i save givim glad long yumi.

Taem mi tingtingbak long klosap 70 yia long fultaem wok blong Jehova, mi luksave olsem wanem hem i halpem mi mo blesem mi. Mi stap sem yet, taswe mi save se long paoa blong mi nomo mi no save mekem ol samting we mi bin mekem. Mi bin go long ol ples farawe, mi luk mo mi gotru long plante gudfala ekspiriens, mo mi mitim plante narafala we oli tijim mi long sam impoten samting. Mi save talem stret se bambae mi jusum sem rod bakegen.