Olsem Wanem Yu Save Lego

BLONG lego tabak, hem i olsem taem we yu stap lanem blong ron long baskel. I no long faswan taem we yu save winim. Taswe, sipos yu rili wantem lego tabak, yu mas rere blong traehad bakegen mo bakegen gogo yu winim. Sipos yu foldaon bakegen, yu no mas ting se yu no moa save winim. Tingbaot samting ya olsem wan traem we i stap tijim yu, wan smol trabol nomo long wan bigfala plan we yu stap mekem i kamtru. Hemia sam advaes we i bin givhan long sam narafala. Maet oli givhan long yu tu.

Mekemrere Tingting Blong Yu Blong Lego

■ Fastaem, yu mas bilif strong se rod ya we bambae yu traehad long hem, hem i stret rod blong folem. Mekem lis blong ol risen from wanem yu wantem stop, mo ademap ol gudfala samting we bambae i kamaot from. Nao, taem yu lego finis sigaret, i gud yu ridim lis ya bakegen blong bambae tingting blong yu i strong blong gohed long rod ya. Tingting blong wantem mekem God i glad, hemia i save pusum yu moa blong lego sigaret, i bitim ol narafala tingting. Baebol i talem se yumi mas laekem God wetem olgeta tingting, hat, laef, mo paoa blong yumi. Sipos yumi stap dipen long tabak, yumi no save mekem olsem.—Mak 12:30.

■ Tingtinggud long ol fasin blong yu, blong traem luksave wetaem mo from wanem yu yu stap smok. Maet i gud we yu raetemdaon evri taem mo evri ples we yu stap smok long hem long wan dei. Hemia bambae i givhan long yu taem yu stap traem blong lego. Olsem nao, yu save tingrere long ol samting we i save kamaot blong pulum yu blong smok bakegen.

Putum Wan Stret Dei Blong Stop

■ Jusum wan stret dei blong lego fasin blong smok, mo makem long kalenda. I moa gud blong jusum wan dei we yu no gat tumas wari. Nao long stret dei ya, yu mas stop fulwan wantaem.

■ Bifo long stret dei ya we yu makem, sakemaot ol mases mo laeta. Wasem ol klos blong yu we oli gat smel blong smok long olgeta.

■ Askem ol fren blong yu long wok mo ol narafala ples mo ol famle blong yu, blong givhan long yu blong stop. Yu no mas fraet blong askem narafala blong no smok klosap long yu.

■ Mekem plan from dei ya we yu jusum. Maet yu wokbaot i go samples we ol man oli no gat raet blong smok long hem, olsem wan museum no sinema. Maet yu mekem spot, olsem swim, ron long baskel no wokbaot.

Winim Filing Blong Wantem Smok Bakegen

Sipos yu bin smok plante, ating sam aoa nomo afta we yu finisim laswan sigaret blong yu, bambae filing i kam strong blong wantem smok bakegen. From samting ya, ating yu harem se yu kros, yu sot maen, yu wantem faet, yu wari, tingting i foldaon. No maet yu no save slip, yu wantem muvmuv oltaem, yu wantem kakae, mo yu wantem tumas wan sigaret. Maet dokta i save givim sam meresin we i givhan blong winim ol filing ya. Mo tu, i gat sam samting we yu yu save mekem blong winim faet ya.

■ Long ol faswan wik we oli had tumas, yu no mas kakae ol rij kakae, mo yu mas dring plante wota. Samfala oli luk se i gud blong kakae ligim we oli no dan, olsem karot mo seleri. Sipos yu wokbaot plante, bambae yu no save kam fatfat tumas mo tingting blong yu i save stap kwaet moa.

■ Yu no mas go long ol ples mo joen wetem ol man we oli save pulum yu blong smok bakegen.

■ Sakemaot ol tingting we oli save pulum yu blong smok. Sam long olgeta, hemia: ‘Bambae mi smok tede nomo blong winim strong taem ya.’ ‘Fasin blong mi i oraet lelebet. !Ol sigaret ya, hemia nomo nogud fasin blong mi!’ ‘Ating tabak i oraet nomo, from samfala oli stap smok tumas, be oli laef kasem 90 yia.’ ‘Mi mas ded samtaem.’ ‘Laef i rabis taem man i no gat tabak.’

■ Sipos yu rere blong tekem wan sigaret, wet fastaem. Sipos yu wet ten menet nomo, maet filing we i pulum yu blong wantem smok bakegen bambae i lus. Maet tingting ya se bambae yu neva mas smok bakegen i had tumas long yu. Sipos yu harem olsemia, tingbaot blong winim tede fastaem.

■ Sipos yu wantem mekem wok blong God, prea blong askem Hem blong givhan long yu. God i wokem mo i laekem yumi, nao hem i save “givhan long yumi, stret long taem we yumi trabol.” Hem i mekem olsem long olgeta we oli stap traehad blong mekem laef blong olgeta i stret long tingting blong hem. (Hibrus 4:16) Be yu no mas ting se wan merikel bambae i kamaot. Yu mas wok folem ol prea blong yu.

Gohed Blong No Moa Smok

■ Ol faswan tri manis oli strong moa. Be biaen tu, yu mas traehad blong no joen wetem ol man we oli smok, mo stap longwe long ol ples we oli save pulum yu blong smok bakegen.

■ Nating se yu lego fasin blong smok wan yia finis, yu no mas ting se bambae i oraet blong smok wanwan taem nomo.

■ Faet agensem tingting ya blong tekem “jes wan moa sigaret.” Wan i save lidim yu blong tekem wan moa bakegen, nao bambae i no longtaem yu save spolem ol hadwok we yu mekem finis blong stop. Be, sipos yu foldaon bakegen mo tekem wan sigaret, i no min se yu mas gohed blong smok. Stop bakegen.

Plante milian man blong smok oli lego finis. !Yu tu yu save mekem olsem sipos yu gat strong tingting mo yu gohed blong traehad!